Abarooma 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Niise Paulo, omuhalaabani wa Kristo Yesu, owalaangwa ohuba omutume, haandi owaawulwa ohuyaala Emboosi Ndai ya Nasaae.

² Emboosi Ndai eyo niyo yi Nasaae yasuubisa ohutula hale n'abitira mu banabbi neende mu byandiiko byoolerefu.

³ Emboosi Ndai yino yidiira hu Mwaana wae, oyo koti omuundu, otula hu lwiibulo lwa Daudi.

⁴ Nae olw'obunyala bwae, obutula mu bwoolerefu bu yali nabwo mu Mwooyo, neende mu husyuuha hwae ohutula mu bafu, yeyekesa koti lwali Omwaana wa Nasaae. Niye Yesu Kristo, Omwaami weefwe,

⁵ ohubitira mu Kristo, Nasaae yamberesa embabaasi neende obutume, mu liita lyae huyirire ebyaalo byoosi obuwulisi butula muhufukiirira.

⁶ Mwese muli mu abo, abalaangwa ohuba Yesu Kristo.

⁷ Eng'we mweesi abaheerwa ba Nasaae abali Rooma, haandi abalaangwa ohuba aboolerefu bae: Lehe Nasaae Seefwe, neende Omwaami Yesu Kristo bababerese embabaasi neende omuleembe.

Esaala y'ohweebasa.

⁸ Ndaangira ohweebasa Nasaae waange nimbitira mu Yesu Kristo hulweeng'we mweesi, ohufukiirira hweeng'we hulomalomwaho mu syaalo syoosi.

⁹ Olwohuba Nasaae yi halaabanira neende omwooyo kwaange kwoosi, ninjekesa abaandu Emboosi Ndai ch'Omwaana wae, niye obona koti lu mbeechulisa buli siha

¹⁰ mu saala chaange nimusaba endi n'aba n'asiima, ngeende bulai ehabi lino nyale ohwoola yi muli.

¹¹ Olwohuba ndekoomba muno ohubabona, hu nyale ohukabanaho naang'we ebiyaanwa bya mwooyo ohubagumia.

¹² Amahuluundu mbwe, hugumisanie hulw'ohufukiirira hwa buli muundu, ohweeng'we neende ohwaange.

¹³ Basyaange, ndaha mumanye muti ndahatekeha amahabi maangi muno ohwiicha yi muli, nae buli lu ndeemaho siriwo esiindu singayiraanga ohwiicha. Ndaha nyooleho abafukiiriri mweeng'we, koti lu ndanyoola mu Abateende baandi.

¹⁴ Olwohuba ndi neende omulimo muhoongo muno okw'ohuhalaabanira abaandu boosi, Abagiriki neende abakafiiri, abakesi basoma alala neende abasiru batasomaho.

¹⁵ Sakira ndi neende obwekoombi ohuyaala Emboosi Ndai eyiri eng'we mwesi abali mu Rooma.

Amaani k'Emboosi Ndai.

¹⁶ Ese haba sindiirwaangaho esoni kata nabudiidi hulw'Emboosi Ndai; olwohuba Emboosi Ndai yino, niyo amaani ka Nasaae akawonia abo boosi abafukiirira. Abayudaaya nibo abataangira, mani Abagiriki bosi nibaloondaho.

¹⁷ Olwohuba ohubitira mu Emboosi Ndai, obuluungifu bwa Nasaae bwaambwiihulirwa ohubitira muhufukiirira hwoong'ene. Koti lu byandiiko byoolerefu biboola biti, “Omuundu muluungifu yahabecheenge omulamu hulw'ohufukiirira.”

Ohubaaho omusaango hw'abaandu boosi

¹⁸ Etima lya Nasaae lyamala lyeyekesa ohutula Muukulu hu abo boosi abatamwiisamo oluyaali neende abahola-mbi boosi, abakera obwadyeeri bwa Nasaae ni buhaya ohumanyihana hulw'ebiholwa byaabwe bibi.

¹⁹ Olwohuba abaandu boosi bamanyire obwadyeeri budiira hu Nasaae, olwohuba Nasaae mweene niye oweekesera elalira obwadyeeri buno.

²⁰ Ohutulira elalira lu syaalo syaloongerwa, efwaani yae yitaaboneha, amahuluundu mbwe, obunyala bwae butaakama neende obunasaae bwae, bibonehera bulai bweene haandi bimanyihanira mu ebyo bi yaloonga. Mani sakira abaandu abo haba sibaliho neende esiindu syoosi sibahediisa ohuhaya ohumumanya!

²¹ Abaandu bamanya Nasaae, nae bahaya ohumwiisamo oluyaali lu muhoyera, haandi haba sibamweebasa daawe. Ohumalaho, beesiruwasa, mani embaasa yaabwe yibulamo obuhoonyi yeechula esiirima.

²² Buli lu bemeeda ohwelaanga abakesi, nilwo lu bemeeda ohweekesa koti lu bataamanyire esiindu syoosi daawe;

²³ mu siha bw'ohwiinamira Nasaae otafwa, beenamira ebifwaanani biholwa byaafwaana koti abaandu bafwa, oba amayoni, oba ebisolo, oba ebisolo byambaaka.

²⁴ Nasaae sakira yesi yabaleha bachiiririra neende ohuhola ebiindu bibi bi myooyo kyaabwe kyekoomba, mani baaholana ebiindu bidiisa esoni.

²⁵ Baleha obwadyeeri budiira hu Nasaae mani bomiirira hu bubacha; beenamira haandi baahalaabanira ebiindu bi Nasaae yaloonga mu bweyaango bw'ohwiinamira Omuloongi mweene, ohoyere ohufumisibwa endaalo choosi! Amiina.

²⁶ Sakira Nasaae yabaleha bemeeda ohutukwa neende obwekoombi bw'esoni budoondobanu. Abahasi baabwe badoondobania mani nibahaya ebyo bi mibiri kyaabwe kyaloongerwa, nibakyehoonyerwaanga ebyo bi kitaloongerwa.

²⁷ Mu ngeri nasilala, abasaacha bosi baleha ohuholegana neende abahasi koti lu Nasaae yatekeha, mani bachaaka ohwekoombana abeene-na-beene. Abasaacha baholana ebiindu by'esoni, mani esitulamo beleetera abeene ohusaandisibwa huchaanakana neende ebihole byaabwe bibi.

²⁸ Olwohuba abaandu abo bahaya ohuta ebibaaso byaabwe hu makesi kadyeeri kadiira hu Nasaae, Nasaae yabaleha ohwemeeda mu bibaaso byaabwe bidoondobanu, mani nibahola ebiindu bibatahoyera.

²⁹ Mani beechula omufuto kwa buli ngeri, obubi, omutoolyo, neende ebiindu bitahoyera ohuholwa; beechula ehiinda, obwiiti, ohulwaana, obubacha, neende ohubaasira abaandi obubi. Bamoonya,

³⁰ haandi balomalomanaho ebiindu bibi; sibadaha Nasaae, banyekani, beepaaha, haandi beeniinia; bakoonyeresa engeri nyiingi ch'ohwonooneramo; sibawulira abeebusi baabwe;

³¹ babulamo ebibaaso bilai; sibooseresa bi basuubisa, haandi haba sibakwiira sisa, oba ohusaasira abasyaabwe.

³² Bamanyire bati amalako ka Nasaae kaboola kati, abaandu bali mu bulamu bw'engeri yino, bahoyera ohufwa. Nae, esihiramo obubi, sibaakama ohuhola ebiindu byeene bino, nae basiima kata abaandu baandi abahola ebiindu biri nasilala koti ebyo.