Abakolosaayi 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Abaami, yireenge abawaambe beeng'we koti lu sidahibwa haandi bulai, nimumanyire muti, eng'we mwesi muli neende Omwaami oli Muukulu.

Amakerako

² Muchiiririre neende obwomiifu mu hulaama, ni mweetekeheramo neende ohweebasaanga;

³ haandi mutulaamirenge fwesi, hunyale ohuyalaanga ebyaama bya Kristo, esifune syakera ese ndaaba ni ndi mu jeela,

⁴ muti nyale ohulomaloma bulai koti lu hoyeere.

⁵ Mweebisireenge mu ngira y'amakesi eyiri abataali mu mukaanda kweefwe, nimuhola ebihoyera ohuholwa esiha syoosi.

⁶ Lehe enomanoma cheeng'we chibecheenge echesiroonyo buli siha, echiluungirwemo omuunyu, hu munyale ohumanya koti lu muhoyere ohukobolaanga mu buli muundu.

Amaheeso kamaliiriha

⁷ Tikiku, achia ohubaboolera ebidiira hu mirimo kyaange; musyaani weefwe mukoosi muno haandi omuhalaabani mweesikwa haandi omuhalaabani wasyaange mu Omwaami.

⁸ Mutumire yeeche yi muli hulw'esifune syeene sino, endi munyale ohumanya koti lu huli haandi endi hunyale ohubakobosamo omwooyo,

⁹ haandi mbao Onesimo yesi ali ohwiicha nae, omusaacha mweesikwa haandi omuheerwa haandi atula hu mukaanda kweeng'we okwo. Boombi bachia ohubakaniayira bulai bweene ako koosi akeholeheenge eno.

¹⁰ Arisitaruko, omuboye wasyaange abaheesa, haandi neende Mariko mwaanang'ina Bbarinabba (yi munyoolere amakerako kamudiiraho, niyoola yi muli, mumubukaanire bulai),

¹¹ neende Yosua olaangwa Yusito yesi abaheesa. Bano nibo abasaacha bahebwa boong'ene mu bahalaabani basyaange abahalaabanira Obwaami bwa Nasaae, haandi babeere nibaangumia muno omwooyo.

¹² Epafura, mulala hweeng'we abahalaabani ba Kristo Yesu, yesi abaheesa, koti lu yanala ebiha byoosi naabechulisira elalira mu hulaama Nasaae hwae, ati munyale ohweebisa koti abahuluundu haandi nimuli neende esuubi liichufu mu biindu bi Nasaae adaha.

¹³ Olwohuba syesi mukwiira endi yabahalaabanira neende esinani siingi, neende abo abamenya mu Laodesia neende mu Hierapooli.

¹⁴ Luka omusirihi muheerwa alala neende Deema bosi babaheesa.

¹⁵ Yira amaheeso keefwe eyiri abasyeefwe bali mu Laodesia, neende Nimufa, alala neende abafukiiriri bomu nyuumba yae.

¹⁶ Mani n'omala ohusoma ebbarwa yino, teemaho muno koti lu onyala yinyale haandi ohusomwa mu nyuumba ya amalaamo eyiri mu Laodesia yosi. Haandi nasilala otyo, muhoyere musomere ebbarwa eyo woosi-woosi yi bafukiiriri bali mu Laodesia bweene omwo, baba nibachia ohuhutumira.

¹⁷ Haandi muboolere Arikipo “Ewe ohoyere obone oti omaliirisa ohuhola omulimo okwo ku watumwa mu buhalaabani bw'Omwaami weefwe buno.”

¹⁸ Neende omuhono okwaange ese omweene, mbano nyandiika endi: Amaheeso ohutula eyiri Paulo. Nae muteebiriraanga eminyororo kyaange kino! Embabaasi cha Nasaae chibe naang'we.