Abakolosaayi 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani nimwasyuuhiswa alala neende Kristo, mwekoombeenge ebiindu ebiri aakulu muukulu, yi Kristo yaali, niyehaale hu muhono muluungi kwa Nasaae.

² Mutecheenge ebibaaso byeeng'we hu biindu biri aakulu, ataali hu biindu biri hu syaalo.

³ Olwohuba mwamala ohufwa, mani obulamu bweeng'we bwamala ohukiswa alala neende Kristo mu Nasaae.

⁴ Mani Kristo obulamu bweefwe naliicha, ao niwo yi mwesi mwaheechere alala nae mu luyaali.

Obulamu buhale neende obuyaaha

⁵ Mani sakira mwiitire alala esiindu syoosi esibalimo esy'esyaalo sino koti: obucheke, omufuto, obwekoombi, ohwekoomba ohwoonoona, neende obucheke bw'ediini, obuli koti ohwiinamiraanga emisaambwa.

⁶ Olwohuba ohweema hu biindu bino byoosi, etima lya Nasaae lichia ohwiicha.

⁷ Hale wesi wakeenderaanga mu biindu byeene bino, koti wali niwabimenyamo.

⁸ Nae bulaanu mubyemaleho byoosi: etima, obwaalaba, ehali-hali, obumoonyi, neende enomanoma yi yemula ohutula mu minwa kyeeng'we.

⁹ Mutabachanaanga abeene-na-beene, olwohuba mwamala ohwefwaalula obulamu buhale alala neende ebihole byabwo

¹⁰ haandi mwamala ohwefwaala obulamu buyaaha, obuli ohweyobululaanga mu humanya ebichiana neende efwaani y'omuloongi wabwo.

¹¹ Mani ano haba saanyala hubaao Omugiriki neende Omuyudaaya, omuhebe neende otaali omuhebe, omutaanu, omwiiti w'abaandu, omuwaambe, omuundu mulehuule, nae Kristo niye ebiindu byoosi, haandi oli mu biindu byoosi.

¹² Mani mwefwaale, koti abadoole ba Nasaae, aboolerefu, haandi abaheerwa, esasaakisi, esisa, ohweyisa aasi, obuloonga, neende ohwesimiirisa,

¹³ muhonyeenge abasyeeng'we, omuundu wuundi naali neende esiindu siyekanyiirisa owaasye, nimulehaniraangamo; koti lu Omwaami yamala ohubalehera, mani eng'we mwesi muhoyere ohuleheraangamo abasyeeng'we.

¹⁴ Mani ohumeeda hu bino byoosi, mwefwaaleenge obuheeri, nibwo obuboya alala buli siindu neende esiroonyo sihoyeere.

¹⁵ Mani mulehe omuleembe kwa Kristo kutukeenge emyooyo kyeeng'we, esihuluundu syeene si mwalaangirwa ohuba mu mubiri mulala. Mani mweebasaanga.

¹⁶ Lehe Emboosi ya Kristo yimenyeenge endaalo choosi mweeng'we mu buungi, yekeseenge haandi nimwoolobana abeene-na-beene neende amakesi koosi, haandi mweembeenge esabbuli neende enyembo neende enyembo ch'emyooyo alala neende ohweebasaanga muno Nasaae, mu myooyo kyeeng'we.

¹⁷ Nabuli siindu si muhola, mu mboosi oba mu biholwa, musiholeenge mu liita ly'Omwaami Yesu, nimumweebasiraangamo Nasaae Seefwe.

Ohuholera alala hw'abaandu mu bulamu buyaaha

¹⁸ Abahasi, yiseenge oluyaali mu basaacha beeng'we, olwohuba esyo nisyo esihoyera abali mu Omwaami.

¹⁹ Abasaacha, heereenge abahasi beeng'we, haandi mutabayiraanga neende obwaalaba.

²⁰ Abaana, wulireenge abeebusi beeng'we mu buli siindu syoosi, olwohuba esyo nisyo esisangaasa Omwaami.

²¹ Abeebusi, mutataanganaanga abaana beeng'we, olwohuba banyala beeyendehereera emyooyo.

²² Abawaambe, wulirenge mu buli siindu syoosi, abaami beeng'we bohu syaalo huno, ataali nibababona sa, koti abasangaasa sa abaandu, nae neende omwooyo mulala, mutya Omwaami.

²³ Mutecheenge omwooyo hu buli siindu si muhola, musiholeenge koti abahalaabanira Omwaami ataali omuundu sa,

²⁴ nimumanyire muti Omwaami niye ochia ohubakaba omukabo kweeng'we koti omusaara; Olwohuba muli ohuhalaabanira Omwaami Kristo.

²⁵ Olwohuba omuhola-mbi yeesi achia ohutuungwa hulw'ebibi byaaba niyaholaanga, mani abulao ohukwiira hwoosi.