Abakayi 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lwa Debboora neende Bbaraki

¹ Hu ludaalo olwo, Debboora neende Bbaraki omwaana wa Abbinoamu beemba olweembo luno bati:

² Omwaami afumisibwe! Abaisiraeli bamaliirira ohulwaana; Abaandu beyamaanga neende esangaalo.

³ Tekeerese, eng'we abatuki! Muwuliirise, eng'we abeemirisi! Njia ohweemba, haandi hubbe olweembo ninyembera Nasaae wa Yisiraeli, Omwaami.

⁴ Ewe Omwaami, niwatula hu ngulu cha Seyiri, niwatula mu situundu sy'esyaalo sya Edomu, esyaalo syadengaana, haandi efula yaakwa ohutula muukulu. Eee, amaachi kabbwomooha aasi ohutula mu maleesi.

⁵ Engulu chahinaakiriha mu moni w'Omwaami wa Sinai, mu moni w'Omwaami, Nasaae wa Yisiraeli.

⁶ Mu ndaalo cha Samiga omwaana wa Anaati, mu ndaalo cha Yaeli, enyaali ch'abachurusi chaakama ohuhalakanianga mu syaalo sino, haandi abachurusi beehoonyeraanga engira ch'emukutu.

⁷ Ebiko bya Yisiraeli byadoong'a nibidaangaalire, ewe Debboora; byadoong'a ebihaya ohwoola lu ewe weecha, weecha koti ng'ina Yisiraeli.

⁸ Mani ebiita byakwaao mu syaalo Abaisiraeli nibali nibedoleere banasaae bayaaha. Hu basaacha elifu amahumi kane (40,000) abali mu Yisiraeli, simwali hoomo owakiingaho engabo kata sa efumo?

⁹ Omwooyo kwaange kwadoong'a sa hu bahoongo b'eye lya Yisiraeli, neende hu baandu beyamaanga ebihaya. Omwaami afumisibwe!

¹⁰ Musilomalomeho bulai, eng'we abasolera hu suhiri charachaari, nimwihaale hu biseero, neende eng'we, abakeendaanga neende amakulu buli yi muchiira.

¹¹ Tekeerese! Oluyoka lw'emikaanda kyebodoohaanie esulo ekyeemberana ohuyiingira hw'Omwaami, ohuyiingira hw'abaandu ba Yisiraeli! Abaandu b'Omwaami nibasiikuhayo ohuhuumba nibeehirira nibayiindikana ohutula mu biko byaabwe.

¹² Yimiriramo, ewe Debboora, yimiriramo nihuwaao! Yimiriramo nihuwaao! Yembaanga olweembo! Yimiriramo nihuwaao! Chia emberi, ewe Bbaraki omwaana wa Abbinoamu, yimiriramo abawaambe bao n'obatusayo!

¹³ Mani abo abali abeesikwa beetusayo beecha eyiri abeemirisi baabwe; abaandu b'Omwaami beleeta yaali nibali abeetekefu ohulwaana.

¹⁴ Beleeta nibatula mu Efuraimu nibeehirira mu hooho, enyuma w'enono ya Bbenjamini neende abaandu bayo. Abahoongo b'eye nabo beehirira nibatula mu Makiri, abahunuufu abo nibeehirira nibatula mu Sebbuluuni.

¹⁵ Nae abeemirisi ba Yisakari beechera alala neende Debboora; eee, Yisakari yeecha haandi Bbaraki yesi yeecheraho, mani boombi beecha bamuloondaho beengirana nae mu hooho bweene. Nae enono ya Rubbeeni yakabuhanamo; mani byaabahaya ohuheengao bosi nibanyala ohwiicha.

¹⁶ Lwasiina beehalaka enyuma neende amakoondi? Ohutekeeresaanga sa koti lu baayi balaanga ebyaayo kose? Eee, enono ya Rubbeeni yakabuhanamo; mani bosi byaabahaya ohuheengao ohwiicha.

¹⁷ Enono ya Gaadi nayo yeehalaka sa yadoong'a ebukwe wa Yorodaani, nae enono ya Daani yehalaka sa yadoong'era aambi neende emeeri. Enono ya Aseri nayo yadoong'a sa niyamenya hu lwaasi lw'enyaanja; badoong'a sa hu sikobero bweene.

¹⁸ Nae abaandu ba Sebbuluuni neende Nafutaali beyaana obulamu bwaabwe baachia hu sipaapi sy'ebiita.

¹⁹ Hu Tanaki, hu ndulo wa ahaalo ha Megido, abatuki beeyiha beecha balwaana; abatuki ba Kanani balwaana; nae sibayiraho kata efeesa yoosi daawe.

²⁰ Eng'ining'ini chalwaanira muukulu; nichakeendaanga nichihalakania ekulu, chalwaania Siseera.

²¹ Ehulukusi ya Kisoni yabeeya yaachia nabo Omwaalo kwa Kisoni okw'ehulukusi yeene. Ese naange njia ohuhuumba sa, ohuhuumba ninjianakana, neende amaani maangi!

²² Mani efaraasi chosi nichiicha nichisola, ebirekeyi byachio nibihubba embiindo hu loba.

²³ Malaika w'Omwaami nae yaboola ati, “Ewe bwaaba Merosi,” “ewe bwaaba, esibwaabo sibe hu abo boosi abamenya omwo. Olwohuba haba sibeecha ohuhoonyaho Omwaami daawe, sibeecha koti abanamaye ohumulwaanirira daawe.”

²⁴ Yaeli, omuhasi w'ehabi ohiramo mu Yisiraeli, omuhasi wa Hebberi Omukeeni omuhasi ohiramo ehabi mu bamenya mu mayeema.

²⁵ Siseera yasaba amaachi, nae yaamuberesa amabeere; yamuleetera amafuta mu bbakuli enyirifu muno.

²⁶ Yadiira esihoongo sy'eyeema mu muhono mulala, nae enyuundo y'omuhomi mu muhono kuundi; yayuunda Siseera yaamusasakula esyaanganga; yamudomola omutwe yaakutusira ebuleka.

²⁷ Yehirira kaala neende amahuumbo, mani yaakwa aasi, yalaambaala mu makulu k'omuhasi. Mu makulu k'omuhasi hala, Siseera yeeha kaala hu mahuumbo kae mani yaakwa aasi; yakwa yoola hu buloba bweene, yaafwiirao.

²⁸ Ng'ina Siseera yaleengeesera mu dirisa; yadaangaalira emukoongo w'epasya. Yeteeba ati, “Lwasiina leero luno esigaari syae sihiindire ohukobola?” “Esuhiri chae leero nga cheng'oyaniisye ohukobola?”

²⁹ Abeecha bae bahiramo obukesi bamuteebaanga, haandi omweene yekobolaangamo sa amahabi neende amahabi,

³⁰ “Mbaasa bali sa hu hukabula ebiindi bi bibapeeyere, mani baakabana, omuhasi mulala-mulala oba abahasi babiri-babiri, hu buli musaacha mulwaani mulala, engubo ch'ebbei nachio cha Siseera, emiyaadi mikohobe nakio kichiira omutuki muhasi.”

³¹ Mani abasuku bao boosi bahoya baafwa sa batyo, ewe Omwaami, nae abeecha bao bahoya baaduhaanga sa koti elyuuba litula! Mani omuleembe kweecha kwaabaao mu syaalo omwo ohumala embaka y'emyaaka amahumi kane.