Abakayi 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiloongaloongwe bya Miika

¹ Mu ndaalo echio, yaliwo omusaacha wuundi olaangwa mbwe Miika, owali yamenya mu syaalo sy'ebigulu-gulu esya Efuraimu.

² Ludaalo luundi, yeecha yaboolera ng'ina ati, “Omuundu niyahwiibaho ebituundu elifu neende emia ndala (1,100), eby'efeesa byao ebyo, wabwaaba omunyaka oyo. Ese omweene ndahuwulira n'ohola otyo. Mani, wewuunjeho, ese niise oli neende eseende echo. Ese niise owali nindachibukula.” Nae ng'ina yamukobolamo ati, “Mani Omwaami ahoya yahuberesa ehabi, ewe mwaana waange!”

³ Miika yakalusira ng'ina eseende echio, mani ng'ina haandi yaboola ati, “Ohukaira esibwaabo sino ohukwa hu mwaana waange wuno, ese omweene bulaanu mbano nyaanayo efeesa yino yeene eyiri Omwaami. Yichie yehoonyerwe mu huhola esifwaanani sy'embaao, esyaomwaho efeesa.” Mani Miika yaboola ati, “Ese bulaanu njia sa ohuhukobosera efeesa yino yoosi.”

⁴ Mani ao, Miika yanyala ohukobosera ng'ina efeesa eyo yoosi. Ng'ina oyo, mani yaabukulaho ebituundu by'efeesa emia chibiri (200), mani yaabidiisa omwiitaanyi, owanyala ohubiholamo esifwaanani, nasibaachire ohutula mu mbaao sa, haandi naasiwomereho efeesa. Esifwaanani esyo, syaleetwa syateebwa mu nyuumba yeene ya Miika.

⁵ Mani omusaacha wuno Miika, yebukanira abuundu wae yeeng'ene ow'ohwiinamiraanga nasaae wae. Haandi yameedaho banasaae baandi neende engubo ehiiha, mani naamala niyeehasa mulala hu basyaani bae ohuba omulaamisi wae.

⁶ Esiha syeene esyo, yali n'abulao omutuki yeesi, mu Yisiraeli yoosi; buli muundu yeesi yeholeraanga sa ebyo byaaba omweene n'adaha.

⁷ Haandi esiha syeene esyo, yali niyiriyo Omuleefi muyere, owali niyamenyaanga mu siko sya Bbetilehemu mu Yuda.

⁸ Omuleefi wuno yeecha yaatula mu Bbetilehemu, yaachia ohukoonya abuundu waandi yaanyala yaamenya. Mani niyali n'ali hu lukeendo lwae olwo, yanyala ohweduuya hu nyuumba ya Miika mu syaalo sy'ebigulu-gulu esya Efuraimu.

⁹ Miika yamuteeba ati, “Ewe otula yeena bweene?” Nae yaamukobolamo ati, “Ese ndi sa Omuleefi ohutula mu Bbetilehemu sya Yuda. Ndi ohukoonyaanga abuundu yinyala ndaamenya.”

¹⁰ Miika haandi yamuboolera ati, “Mani yicha omenye naange. Yicha haandi obe omukeraki waange, haandi omulaamisi waange, naange mba njia ohuhukabaanga ebituundu ehumi eby'efeesa hu buli mwaaka, engubo chiindi, alala neende ebyohulya byao byoosi.”

¹¹ Omuleefi muyere oyo yaafukiirira ohuchia amenye neende Miika, haandi ohweehola abe omwaana wae mweene.

¹² Mani Miika yaamudoola ohuba omulaamisi wae yeeng'ene sa, yaamenyaanga mu daala lya Miika lyeene.

¹³ Haandi Miika yaboola ati, “Eee, bulaanu koti luundi neende Omuleefi oli omulaamisi waange, bulaanu njia ohumanyira elalira endi Omwaami achia ohuhola ebiindu bichaake ohunjiraanga bulai.”