Abakayi 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Samusoni naali mu Gasa

¹ Ludaalo luundi, Samusoni yachia mu siko sy'Abafilisiti esya Gasa, yi yachia mani yanyoola omuhasi mucheke wuundi, yaamala yeeyalisa nae.

² Abaandu ba Gasa bosi beecha baamanya bati hane, Samusoni yali n'ali mu bweene omwo, mani beecha beebodoohania abuundu ao baamuliindirira esiro syoosi, nibali mu siruwa sy'esiko esyo. Bakona esiro esyo syoosi nibanyisaanie, nibebaasaho bati, “Efwe huchia ohuliinda sa ohwoola lu bunahya, mani humale humwiite.”

³ Nae Samusoni yakonaho sa mu buliri ohwoola esiro akati byoong'ene. Mani yasiingira yaachia hu mulyaango kw'esiruwa mani yaakukinguula aakulu neende enjiki cheene, neende emisiruunga kyahwo kyoosi neende ebifuuli byeene nibiriho. Yabyedwiiha huubeka mani yasiingira yabibedyaa-bedya yabiyira yaabisukuna eyale muno, aakulu w'olugulu lutingaalire Hebburoni.

Samusoni neende Delila

⁴ Sino nisyawa sityo, Samusoni haandi yadiira obwiicha neende omuhasi wuundi owali n'alaangwa mbwe Delila, owali niyamenya mu Hooho lya Soreki.

⁵ Mani abatuki Abafilisiti bataanu nibeecha nibebuusa alala nibachia yi ali mani nibamuboolera bati, “Kaadiirisaho Samusoni oyo anyale ohuhuboolera esikeraanga naaba neende amaani maangi kakiire ao katyo, haandi neende koti lu hunyala hwamuyiingira, mani hwanyala ohumuboya omudacho, hwaamuhola yaahaya ohubaamo amaani maangi katyo. Buli mulala hweefwe, aba achia ohuhuberesaanga ebituundu emia ehumi neende ndala (1,100) echa efeesa.”

⁶ Kata katyo, Delila yaboolera Samusoni ati, “Nookanya, mboolereho sa esiindu sikeranga n'oba neende amaani maangi kakiire ao katyo. Omundu yeesi naaba naadahire ohunyala ohuhuboya omudacho mani waawa amaani kao ako, ahola atye?”

⁷ Nae Samusoni yamukobolamo ati, “Nibaamboya neende eesya njaaha kitaanu-na-kibiri eky'obuyiingo echitooma, mba njia ohweehola omukata koti lu buli muundu lwaali.”

⁸ Abatuki Abafilisiti bano baleetera Delila emikoye miyaaha chitaanu-na-chibiri ech'obuyiingo, ekyali nikitoomere, mani yaamuboya yaamukakadya.

⁹ Omuhasi wuno yali n'atekeehe abasaacha baandi nibaliindiriire sa mu siseenge siindi, mani n'achaaka ohuhuumula n'aboola ati, “Ewe Samusoni! Abafilisiti mbao bali ohwiicha!” Nae niyaamumuha mu ndoolo yanyala sa ohuhalaka-halakamo eesya echio koti obuwuusi bwahadonyoha omuliro nikubwegeeng'ereho. Mani kata katyo, haandi sibanyala ohufuumbula esyamubeechaanga amaani ako katyo.

¹⁰ Haandi Delila yakobola eyiri Samusoni, mani yamuboolera ati, “Ewe bonaho, koti lu wuuholaanga nifwaana koti omuundu musiru wakiire ano, koti lu ohayaanga ohumboolera obwadyeeri bweene. Mani ewe omweene, hola obukanye, wumboolere koti lu muundu anyala ohuhuboya omudacho.”

¹¹ Mani haandi Samusoni yaamuboolera ati, “Nibaamboya neende emikoye miyaaha ekitehoonyerwaho, mba njia ohweehola mbe omukata koti lu buli muundu yeesi lwali.”

¹² Delila yaachia yanyoola emikoye miyaaha kyeene, mani yaamuboyera. Mani niyehuuma haandi n'aboola ati, “Ewe Samusoni! Abafilisiti mbao beecha!” Abasaacha abo bali nibeliindiriire sa mu siseenge siindi. Nae niyasimuha, yahalaka-halakamo emikoye ekyo niyeemala hu mahono kae koti yahahalaka-halakamo obuwuusi sa.

¹³ Delila haandi yaboolera Samusoni ati, “Ewe, okera nimboneha koti omusiru mweene, ohayire ohumboolera obwadyeeri bweene. Ewe mboolere koti omuundu yeesi yahanyala ohuhuboya omudacho.”

¹⁴ Delila haandi yamudeemberesa yaakona, yaabukula emikoye ky'efwiiri lya Samusoni yaakiluha alala yaakiboya hu sihoongo, yaamala yehuumula n'aboola ati, “Ewe Samusoni! Abafilisiti mbao beecha!” Nae niyaamumuha mu ndoolo yanyala ohung'uulula efwiiri lyae ohutula hu sihoongo esyo.

¹⁵ Delila haandi yaboolera Samusoni ati, “Ewe wahepaahaanga otye oti waaheera, noteekesaho oti waaheera? Wahaahola ndaabonehana ohuba omusiru amahabi kadatu amalaamba, nae haandi kata bulaanu buti, otoola ohumboolera esikeraanga syeene nooba neende amaani kakiire ao katyo.”

¹⁶ Omuhasi oyo yalumirira sa atyo ohumutebaanga buli ludaalo. Samusoni yalwaala muno omwooyo neende okusinye kw'ohumunyasaanga niyeeboyere hu siindu silala sino

¹⁷ ohwoola lu yamutuumbulira obwadyeeri bweene. Yamuboolera ati, “Efwiiri lyange lino haba siribekwaangaho daawe. Ndayaanwa eyiri Nasaae ohuba Omunasareeti, ohutulira elalira nindali omudoto. Mani efwiiri lyange lino nilibekwaho, mba njia ohuwaamo amaani kaange kano, mani ndeehole sa omukata koti omuundu yeesi.”

¹⁸ Delila niyeemao yaamanya ati hane amalire ohumutuumbulira obwadyeeri bweene, yatuma ehuwa eyiri abatuki Abafilisiti bala, n'aboola ati, “Eng'we, koboleho eno ehabi liindi. Wuno nguno amalire ohunduumbulira obwadyeeri bweene leero.” Mani abatuki abo baakobola nibakingire eseende chira.

¹⁹ Delila yaanyala ohudeemberesera Samusoni hu mataango kae, mani endoolo chaayira Samusoni, mani Delila yalaanga omusaacha mulala, oweecha yaanyala ohumubekaho enyiriri chitaanu-na-chibiri ech'efwiiri lyae elyo. Delila yachaaka ohumusaandya, olwohuba yali n'amalire ohuwaamo amaani kae koosi.

²⁰ Delila yehuuma n'aboola ati, “Ewe Samusoni! Abafilisiti mbao bali ohwiicha!” Samusoni haandi yaamumuha mu ndoolo chae echio mani yachaaka ohubaasa mu mwooyo kwae ati, “Ngandi ese njia sa ohwesiingirira mani ndeboolole ndeweereo, koti buli nyaanga.” Nae haba siyali n'amanyire ati Omwaami wae yali n'amalire hale ohumutulaho.

²¹ Abafilisiti beecha baanyala ohumuwaamba, bamudomolamo emoni chae. Nibamala batyo, bamuyira mu Gasa, mani baamuboya neende eminyororo ky'omugasa, haandi baamala baamuta hu lukina aholeenge n'abodoohania olukina lusya obusye olwali mu jeela.

²² Nae kata katyo, efwiiri lyae lira lyeecha lyachaaka ohwehulira ni lyefunyirao abweene.

Ohufwa hwa Samusoni

²³ Abatuki Abafilisiti bano bulaanu beehung'aania alala ohwesaangasa neende ohuyaana ebiyaanwa bihunuufu bihaya eyiri nasaae waabwe olaangwa Dagoni. Beemba bati, “Nasaae weefwe atudiisire Samusoni omusuku weefwe.”

²⁴ Mani abaandu baandi nibamuubbyaho emoni chaabwe, bemeeda sa ohukiniaanga nasaae waabwe oyo; nibaboola bati, “Nasaae weefwe wuno niye sa onyalire ohutudiisa mu mahono keefwe omusuku weefwe wuno, obereenge omusihirisi w'esyaalo syeefwe sino, haandi owatwiitamo abaandu baangi muno.”

²⁵ Mani emyooyo kyaabwe nikyamala ohusangaala kityo, haandi beecha baboola bati, “Eng'we mutulaangireho Samusoni yeeche ano, atubayireho otubayo.” Mani balaanga Samusoni yatula mu jeela, mani yachaaka ohubabayira mu moni waabwe. Bamuhola yeema akatikaati w'emisiiro ky'enyuumba eyo.

²⁶ Samusoni yamoonyesera ahaana hasyaani hali nihamudiirire oluhuuchiro ati, “Ewe njire ndegeeng'eho hu misiiro kiyambaniaanga enyuumba yino yoosi alala. Ese ndaha sa ohukyegeeng'aho.”

²⁷ Enyuumba eyo yali niyichuule muno abaandu, abasaacha neende abahasi sidubaanie. Abatuki b'Abafilisiti bala bataanu boosi bali nibali mu bweene omwo, mani alala bali abaandu aambi abasaacha elifu chidatu (3,000) enaamba, haandi n'omeedereho abahasi bosi, abali nibali hu sirama ohwo, nibeechere ohwehoyera Samusoni naabasaangasa.

²⁸ Samusoni ya laamira mu mwooyo kwae ati, “Ewe Omwaami w'Obunyala bwoosi, nookanya njichulise hooho; n'okanya, ewe Nasaae waange, ngobosereho sa amaani kaange kala ehabi liindi lala lino lyoong'ene, hu nyale ohwehoonyera ehabi lala lino lyoong'ene li njia ohuhuba, nyale ohwetuunga hu Abafilisiti bano abweene, hu lw'ohuundomolamo emoni chaange chino chibiri.”

²⁹ Kata katyo, Samusoni mani yadiira emisiiro kibiri ekyali nikiri akatikaati w'enyuumba eyo. Mani n'ahola koti owesiirira omuhono mulala-mulala hu buli mu siiro, yaahola koti okisiindiha endulo

³⁰ mani niyehuuma n'aboola ati, “Leha ese fwe neende Abafilisiti bano!” Mani yasiindiha neende amaani kae koosi, mani esyoombahe esyo nisichaaka ohukwa, mani nisikwa hu batuki bala bataanu boosi, neende abaandu baandi boosi abali nibasirimo. Samusoni hu ludaalo lu yafwiiraho, yeeta abaandu baangi muno ohuhiraho abo boosi bayeeta n'asisiiri omulamu.

³¹ Mani, bamwaanang'ina boosi, alala neende abaandu boosi badoong'ereo abali abomu daala waabwe, beehirira ohweenda omubiri kwae. Bamubukula baamukobosa engo, mani baamusiiha akatikaati wa Soora neende Esitaoli, mu ng'ani ya Manoa laatang'ene. Yali ni yahaba omwiimirisi wa Yisiraeli hulw'embaka y'emyaaka amahumi kabiri.