Abakayi 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ebiha nibyabitao hoo, Samusoni haandi yatula yaachia ohukeniya omuhasi wali owae oyo mu ndaalo ch'ekesa ly'engaano, mani naamuyirira ahabusi hameeme. Yachia yaboolera laatang'ene muhasi wali owae oyo ati, “Ese ndaha ohuchia mani nyingire mu siseenge sy'omuhasi waange oyo?” Nae muhweeng'ene oyo haba si yamukanya ohuchia yengiramo daawe.

² Mani yaboolera Samusoni ati, “Mubwadyeeri bweene, ese mbasaanga sa endi ewe wamala hale ohumusyuula byawa, mani ese ndeecha ndaamukaba omwiicha wao mweene oyo. Nae kata katyo, mwanaang'ina muyere ali neende esiiso ohumuhiraho. Mani ewe onyala wachia sa wamwekobosaho.”

³ Nae Samusoni yaboola sa ati, “Hu luno, ese haba siinjia hufunaanibwa esiindu siinja ohuba niihola Abafilisiti bano daawe!”

⁴ Mani Samusoni yadiira amabbwe emia chidatu (300). Yabukula buli amabbwe kabiri, kabiri, yakaboyaania emihira n'akaambania mani yaasosehaanga emuli enyomu mu buli sifuundiho.

⁵ Mani naatubusa omuliro hu muli echio, mani n'alehuula amabbwe ako nikawaao embiro nikachoomere mu mikuunda ky'engaano eky'Abafilisiti. Mani mu ngeri yino, yasaamba ataali engaano choong'ene echali nichikeserwe, nae neende engaano chali nichisyeemere nichisisiiri mu mikuunda. Emiseituuni kyoosi kyaya kyaakwa ekohe.

⁶ Mani Abafilisiti bachaaka ohuteebana ohumanya omuundu wali n'aholere esiindu sisiindusa siti, mani bafuumbula bati hane yali naali Samusoni niye owali naasiholere atyo, olwohuba muhweeng'ene wae, omusaacha wali naatula mu siko sya Timuna, yali naali niye owabukula owali omuhasi wa Samusoni, mani yaamukaba omwiicha wa Samusoni, haandi owali omusibirisa mu bugole bwae. Mani Abafilisiti baachia basaamba omuhasi oyo yaafwa, haandi baachia basaamba enyuumba ya laatang'ene yosi yaaya yaba ekohe.

⁷ Mani Samusoni bulaanu yaababoolera ati, “Hane yino niyo ehola yeeng'we! Mani ese haba sinjia huyeera ohwoola lu njia ohunyala ohubetuunga!”

⁸ Yabaseeta neende egiili mani yaanyala ohubeetamo abaandu abaangi muno. Haandi yachia yaamenya mu ng'uungu yali mu liina ly'olwaanda lwa Etamu.

Samusooni yoola ohuyiingira Abafilisiti

⁹ Bulaanu Abafilisiti beemao boombaha ekaambi mu Yuda, mani bosi baseeta esiko sya Lehi.

¹⁰ Abasaacha bali mu Yuda baabateeba bati, “Eng'we siina syeene esikera nimwiicha ni mutuseeta?” Nabo baabakobolamo sa bati, “Efwe hwiichire ohudiira Samusoni yeeng'ene mani huchie nae koti omuwaambe, hu hunyale ohumuhola koti luyatuhola.”

¹¹ Mani abasaacha ba Yuda bano, abasaacha elifu chidatu (3,000) beeruha mani baachia beekisa mu liina ly'olwaanda luno olwali mu Taamu, mani baboolera Samusoni bati, “Ewe, haba soomanyireho oti, Abafilisiti bano nibo abatuki beefwe hane? Mani tuboolereho esiindu syeene esyakera ewe woola ohutuhola otyo?” Nae yabakobolamo ati, “Ese ndabahola sa koti lu bali nibataangiire ohuhola ese mweene mberi.”

¹² Nabo bamuboolera sa bati, “efwe hwiichire ohuhuboya, hunyale ohuhubadiisa mu mahono kaabwe.” Samusoni nae yaboola ati, “Eng'we mani muutuumbulire alafu muti eng'we abeene haba sineeng'we abachia ohuunjita daawe.”

¹³ Nabo baboola bati, “Byabweene ebyo, efwe huchia sa ohuhuboya, mani humale huhute mu bunyala bwaabwe. Efwe beene haba si huchia ohuhwiita daawe.” Kata katyo, beecha baamuboya neende emikoye miyaaha kibiri emilaamba, mani bamutusa mu liina ly'olwaanda olwo.

¹⁴ Mani niyeecha yoola mu Lehi, Abafilisiti bakisuhayo beecha nibeeruha nibamuchoomere, nibamuubbiraho esihu. Mani esiha syeene esyo, amaani k'Omwaami nikeecha nikamwomiisa, mani naanyala ohuhalaka sa emikoye ekyo, ekyali nikimuli hu mahono, koti sa ekyali kimamuulwe neende omuliro.

¹⁵ Mani n'adoola ekuumba ly'olusaya lw'esuhiri, eyali niyifwiire sa endaalo echo. Yeyeneeresa yanyala ohuludoola, mani yanyala ohulwiitira abasaacha elifu ndala (1,000) enaamba.

¹⁶ Mani ao Samusoni yataamo ohweemba olweembo luno luti, “Neende ekuumba ly'olusaya lw'esuhiri sa, ndeeta abasaacha elifu ndala (1,000); Neende sa ekuumba ly'olusaya lw'esuhiri, ndababuunjiha ebituuli n'ebituuli.”

¹⁷ Niyamala atyo bulaanu yasukuna eyale ekuumba ly'olusaya elyo. Mani abuundu yi biindu bino byaholehanira yaakulihwa, Ramaati Lehi.

¹⁸ Bulaanu Samusoni yachaaka ohuwulira obuluwo nibumuluma, mani yalirira Omwaami n'aboola ati, “Ewe niiwe owumbereese ohuyiingira hw'amaani huno; nae bulaanu mbano ndi koti ochia ohufwa sa obuluwo, mani maambwe njirwe neende Abafilisiti bakafiiri bano?”

¹⁹ Mani, Nasaae yaanyala ohudomola eliina hu buloba, abweene ao mu Lehi, mani amaachi kachaaka ohufududusiramo. Samusoni yanyala ohukang'wa, mani yachaaka ohweeulira bulai muno. Mani esulo eyo yakulihwa Hakoore; yisisiiri mu Lehi, abweene ao ohwoola neende buti.

²⁰ Samusoni yeecha yaanyala ohwiimirira Yisiraeli ohumala embaka y'emyaaka amahumi kabiri, nae Abafilisiti nabo nibali sa nibatuka esyaalo syoong'ene.