Abakayi 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiibulwa hwa Samusooni

¹ Haandi Abaisiraeli beemao bonoona mu moni w'Omwaami, mani yesi yaleha Abafilisiti baabatuka ohumala embaka y'emyaaka amahumi kane.

² Nae mu ndaalo cheene echio yaliyo omusaacha wuundi owali n'alaangwa Manoa, ohutula mu siko sya Soora. Omusaacha wuno yali mulala hu baandu b'enono ya Daani. Nae omuhasi wae yali naali omukuumba.

³ Mani malaika w'Omwaami yeecha yamubonehera yaamuboolera ati, “Ewe obechaanga nooli omukuumba, nae bulaanu oli aambi ohuyera enda mani wiibule omwaana musyaani.

⁴ Mani weliinda otang'wechaangaho efiini yoosi oba kata amalwa koosi, oba ohulichaangaho ebyohulya by'omusiro daawe;

⁵ mani luunyuma lw'omwaana wao oyo ohwiibulwa, haandi omanyaanga otamubekaangaho efwiiri lyae elyo, olwohuba ohutulira elalira hu ludaalo lu yeebulirwaho, achia ohuba niyayaanwayo eyiri Nasaae ohuba Omunasareeti. Wuno niye ochia ohuchaakisa omulimo kw'ohununula Abaisiraeli ohutula hu Abafilisiti.”

⁶ Mani omuhasi oyo yaboolera wamwe ati, “Omuundu wa Nasaae yanjichireho, n'ali neende amatiichasi koti aka malaika wa Nasaae. Ese haba simuteebereho abuundu y'abeere n'atula, haandi yesi haba si yamboolereho eliita lyae daawe.

⁷ Nae yamboleere ati, mbwe ese njia ohuyera enda njibule omwaana musyaani. Haandi yamboleere ati, hae ohung'waaho efiini yoosi, oba kata amalwa koosi, ati haandi hae ohulyaaho ebyohulya byoosi ebyakairwa ohuliibwaanga, olwohuba omwaana musyaani oyo ahoyere ohuyaanwayo eyiri Nasaae koti omunasareeti obulamu bwae bwoosi.”

⁸ Bulaanu Manoa yaasaba eyiri Omwaami n'aboola ati, “Nookanya, ewe Omwaami, leha omuundu wa Nasaae oyo yotumire, atukobolere haandi atuboolere esiindu si huhoyere ohuholera omwaana oyo naaba n'amalire ohwiibulwa.”

⁹ Nasaae yesi yahola sa koti lu Manoa yali naasabire, mani malaika wae yakobola eyiri omuhasi oyo niyali niyehaale mu mukuunda. Nae Manoa wamwe haba siyali n'ali nae.

¹⁰ Mani omuhasi oyo yeeruha bwaangu mani yaachia yaamuboolera ati, “Ewe bonaho! Omuundu wula owecha yiindi ludaalo lula haandi mbano yahambonehera.”

¹¹ Manoa yaaluluha mani yasiingira yaloonda omuhasi wae. Yachia yasuda eyiri omuundu oyo mani yamuteeba ati, “Mani, ewe niiwe omuundu walomalomaho neende omuhasi waange wuno, kose?” Nae yamukobolamo ati, “Eee.”

¹² Bulaanu Manoa yeecha yaboola ati, “Mani bulaanu, ehuwa lyao elyo nilyaheebere mbwe hu lyoolereere, omwaana oyo aba achia ohuhola siina syeene? Bulamu bufwaana butye bu mwaana oyo aba achia ohuba nabwo?”

¹³ Malaika w'Omwaami nae yakobolamo ati, “Omuhasi wao wuno ahoyere ohwehaliirisa yaabona ati ohola buli sindu si muboleere.

¹⁴ Haba s'ahoyere ohulyaaho esiindu syoosi esitula hu misabbiibbu cheeng'we; haba s'ahoyere ohung'waaho efiini yoosi, kata neende amalwa koosi daawe, oba kata ohulyaaho esyohulya syoosi esy'omusiro. Ahoyere ohuhola buli sindu si muboleere.”

¹⁵ Mani Manoa yaboolera malaika w'Omwaami oyo ati, “Nookanya, leha efwe hu huhayireho, mani huhwiitire embusi njere.”

¹⁶ Malaika w'Omwaami oyo bulaanu yaboolera Manoa ati, “Eng'we nimuuhayiraho, haba siimba ndalya ebyohulya byeeng'we ebyo; nae nimudaha ohutekeha hooyo esiyaanwa sy'ohusaambwa, mani muba muchia ohusiyaana eyiri Omwaami.” (Olwohuba Manoa yali n'asisiiri ohumanya ati, oyo yali naali malaika w'Omwaami.)

¹⁷ Mani Manoa yesi yaakobolamo ati, “Ewe mani tuboolereho sa eliita lyao, hu efwe hunyale ohuhwisaamo oluyaali, amahuwa kao kano nikaba nikachia ohwoolerera abweene.”

¹⁸ Mani malaika yeecha yateeba ati, “Siina syeene esikera mwaadaha ohumanya eliita lyaange? Eliita lyaange liita eliwukisaanga.”

¹⁹ Mani Manoa yaakanya ohubukula embusi enjere, alala neende emere ndiidi hooho, mani yaabiyaanira hu alutaari y'olwaanda eyiri Omwaami omuholi w'ebiwukisa.

²⁰ Mani omuliro nikweecha kwaanyala ohwekolola nikutula hu alutaari eyo nikuniina muukulu, malaika w'Omwaami oyo yaniinira aakulu mu muliro okwo, Manoa neende omuhasi wae nibateereho emoni; mani nibakwa aasi mafumaame hu buloba.

²¹ Mani malaika w'Omwaami naahamyuuhao mu moni wa Manoa neende omuhasi wae. Abweene ao, Manoa naanyala ohumanyira elalira ati oyo hane yali n'ali malaika w'Omwaami.

²² Manoa yaboolera omuhasi wae ati, “Efwe hane hwoolere ohufwiira elalira, olwohuba mbano humalire ohubona Nasaae neende emoni cheefwe cheene!”

²³ Nae omuhasi wae yakobolamo ati, “Olwohuba Omwaami naaba n'adahire ohutwiita, haba s'aba n'afukiriire ebiyaanwa byeefwe; haba s'aba niyahanyalire ohutweekesa bino byoosi daawe, oba naaba natuboleere amahuwa kafwaana kati ebiha bino.”

²⁴ Omuhasi oyo yeemao yeebula omwaana musyaani mani yamukuliha eliita, Samusoni. Omwaana oyo yanyala ohuhula, mani Omwaami yaamuberesa ehabi choosi.

²⁵ Amaani k'Omwaami keecha kachaaka ohumwomiisa niyali n'ali akatikaati wa Soora neende Esitaoli mu Kaambi ya Daani.