Abaibburania 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiinamira hwohu syaalo neende ohwo Muukulu

¹ Endagaano yataangira yali neende amalako k'ohwiinamiramo Nasaae neende abuundu wombahwa neende abaandu aw'ohwiinamiramo.

² Boombaha Eyeema lifwaana liti: Esiseenge sy'erwaanyi, esilaangwa Abuundu Woolerefu, mwalimo esiteeni sy'ohutaaho etaara, neende emeesa yiriho omugaati kuyanirwa Nasaae.

³ Enyuma w'epasya yohubiri, yaliyo Eyeema li balaanga, Abuundu Ahiramo Obwoolerefu.

⁴ Mu yeema omwo mwalimo alutaari y'esaabbu, yibanioheseraho obubbaani, neende Esanduuku ly'Endagaano elyabwiihwa neende esaabbu enyaande choosi. Mu Sanduuku omwo mwalimo enjaagi y'esaabbu, omwalimo mana, endabuhi ya Arooni yali yasebuhaho amasaafu, neende makina kabiri akandiikwaho amalako ka Nasaae.

⁵ Aakulu w'Esanduuku, hwaliho Abakerubbi beekesa oluyaali lwa Nasaae, nibabambuule embaya chaabwe, abuundu yi bibi bireherwamo. Nae bulaanu, sino si nisyo esiha sy'ohutotola buli siindu mu bwiichufu.

⁶ Yino niyo engeri yi biindu bino byatekeherwamo. Abalaamisi beengiraanga mu Yeema ly'erwaanyi buli ludaalo ohuhola omulimo kwaabwe.

⁷ Nae Omulaamisi Muhuluundu yeeng'ene niye owengiraanga mu yeema ly'omuukati, haandi yaholaanga atyo ehabi lala hu buli mwaaka. Omulaamisi Muhuluundu wuno haba siyengirangamo n'atakiingire amabaanga k'acha ohuyaanira Nasaae hulw'ebyonoono byae omweene neende ebyonoono bi baandu bahola nibakoterwe bati bali nibahola ebyonoono.

⁸ Mu biindu bino byoosi, Mwooyo Mwoolerefu yeekesa ati, engira yoola Abuundu Ahiramo Obwoolerefu, yali niyisisiiri ohumanyihana, eyeema litaangira nilisyemereo.

⁹ Sino syali esifwaanani sa, esyeekesa ebiindu biholehana bulaanu. Ohweema hu ndekeha yino, ebiyaanwa neende ebisolo biyaanirwa Nasaae, haba sibinyala huhola omwooyo kw'omuundu wiinamira Nasaae kwaaba omwoolerefu elalira.

¹⁰ Ebyo byalichiingi sa ebiindu koti ebyohulya, eby'ohung'wa, neende emiduunga miingi chikabuhaane ech'ohulabiswa. Bino byoosi byali sa amalako k'ohumukulu, akahola ohwoola hu biha bi Nasaae achia ohuteerao ehola njaaha.

¹¹ Nae Kristo yeecha koti Omulaamisi Muhuluundu w'ebiindu bilai biriwo ebilamu. Sakira eyeema lyahalaabaniramo, ly'oluyaali luungi muno haandi lyoolerefu ohuhirao. Eyeema lino haba silyaholwa neende amahono k'abaandu, esyeekesa siti, haba siriri ely'ohusyaalo huno.

¹² Kristo niyabita mu yeema, mani yeengira ehabi lala lyoong'ene Abuundu Ahiramo Obwoolerefu. Kristo haba siyengira Abuundu Ahiramo Obwoolerefu neende amabaanga k'embusi neende ak'esurusi ohuwaanira Nasaae. Nae yabukula amabaanga kae keene, mani yeengira nako mani yatunyoolera obuwonia butaakama.

¹³ Olwohuba amabaanga k'embusi neende ak'esurusi neende ekohe ly'emoosi saambe ebiyaanywa hu baandu bataali abalabiswa, mani bino bibalabya humukulu hwoong'ene.

¹⁴ Sino nisiri esyadyeeri, mani amabaanga ka Kristo otaaliho esyonoono syoosi kachia ohulabya ebibaaso by'emyooyo nikabitusa mu biholwa bifu bihale, hu banyale ohuhalaabanira Nasaae mulamu.

¹⁵ Hulw'esifune sino, Yesu niye oleeta endekeha y'Endagaano Njaaha, mani abo ba Nasaae yalaanga banyale ohunyoola ehabi yi Nasaae yasuubisa. Sino sinyalihana olwohuba yamala ohubaao ohufwa hununula abaandu ohutula hu bibi bi bahola, nibasisiiri mu Ndagaano lyataangira.

¹⁶ Yi silaamo syandiike yi siri, ahoyere ohubaao esiindu syomiisa siti omuundu wasyandiika yamala ohufwa.

¹⁷ Olwohuba esilaamo syandiike esyo sibulamo obuhoonyi, omuundu wasihola n'asisiiri omulamu; haandi haba sibasiholeraho, omuundu oyo n'asisiiri ohufwa.

¹⁸ Esyo nisyo esikera Endagano yataangira yosi kata siyanyala ohwomiiswa amabaanga nikasisiiri ohwiidiha.

¹⁹ Nae Musa niyamala ohuboolera abaandu ebilagiro byoosi koti lu biri mu malako, yabukula amabaanga k'esurusi neende ak'embusi, mani yakasasaania neende amaachi, mani yamala yakawaanya hu baandu boosi niyehoonyera olusaala lulaangwa luti yisopu oluboyerweho obwooya bw'amakoondi bwa ranjaayi, mani yabwinihamo, mani yaamala yakawaanya hu sitabo sy'amalako, neende hu baandu boosi.

²⁰ Mani Musa n'aboola ati, “Kano niko amabaanga akomiisa endagaano yi Nasaae yabalagira ohwooseresa.”

²¹ Haandi mu ngeri nasilala eyo, Musa yawaanya amabaanga hu Yeema neende hu biindu byoosi ebyehoonyerwa mu hwiinamira Nasaae.

²² Olwohuba mu malako ka Musa, aambi buli siindu silabisibwa neende amabaanga, haandi sisireherwamo amabaanga nikasisiiri ohwiidiswa.

Ohwewaayo hwa Kristo humalao ebyonoono

²³ Ebiindu bino ebiri koti efwaani y'ebiindu byo Muukulu, byali bihoerwa ohulabya abaandu mu ngeri eyo. Nae ebiindu byo Muukulu bidaha esiyaanwa silai sihiraho ebyo muno.

²⁴ Olwohuba Kristo haba siyengira Abuundu Ahiramo Obwoolerefu yi baandu bahola sa, esyali koti esifwaanani sy'obwiihalo bwadyeeri bweene. Kristo yeengira Muukulu bweene, yaali bulaanu mu moni wa Nasaae hulweefwe.

²⁵ Omulaamisi Muhuluundu w'Esiyudaaya yengiraanga buli mwaaka Abuundu Ahiramo Obwoolerefu neende amabaanga k'ebisolo. Nae Kristo haba siyengira Muukulu ohweyaanayo omweene amahabi maangi.

²⁶ Olwohuba Kristo yahabeere n'ahoyera ohusaanda amahabi maangi ohutulira elalira mu huloongwa hw'esyaalo. Nae bulaanu, yabonehana ehabi lala lyoong'ene mu ndaalo chaakamayo chino, ohumalao ebyonoono ohweema hu siyaanwa silala sy'obulamu bwae syeene.

²⁷ Koti lu siri, buli muundu yeesi wohufwa ehabi lala, haandi n'amalire ohufwa, Nasaae amuheengere omusaango.

²⁸ Mu ngeri nasilala eyo, Kristo yesi yawaanwayo ehabi lala ly'ong'ene koti esiyaanwa simalao ebyonoono by'abaandu baangi. Haandi achia ohubonehana ehabi lyohubiri. Haba siyaheeche ohulwaania esyonoono haandi, nae yaheecha ohuwonia sa abo abamuliindiriire.