Abaibburania 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu Omulaamisi muhuluundu weefwe

¹ Sino nisyo esiindu sihuluundu mu biindu bi hulomaloma; huli neende Omulaamisi Muhuluundu, owihaale Muukulu hu muhono muluungi kw'esisaala sy'obutuki sya Nasaae w'Oluyaali Lwa aakulu.

² Ahalaabana koti Omulaamisi Muhuluundu, Abuundu Ahiramo Obwoolerefu, mu yeema lyadyeeri li Omwaami yoombaha ataali li muundu yoombaha.

³ Buli Mulaamisi Muhuluundu, adoolebwa ohuwaanira Nasaae esiyaanwa sy'esolo neende ebiyaanwa biindi, sakira Omulaamisi Muhuluundu wuno yesi, ahoyera ohuba neende esiyaanwa syohuyaana.

⁴ Aba naali owohu syaalo huno, haba siyahabeere omulaamisi olwohuba aliwo abaandu baandi, abayaana esiyaanwa ohuchaanakana neende amalako k'Esiyudaaya.

⁵ Abalaamisi bahuluundu bano, omulimo ku bahola, kufwaanaho sa haandi siiniha sa esy'ebiindu biholebwa Muukulu. Siri sa koti lu byali hu Musa. Niyali naali aambi ohwombaha Eyeema Lyoolerefu lya Nasaae, Nasaae yamuboolera ati, “Bona oti ohola buli siindu ohweema hu ngeri yibahukereramo nooli hu lugulu.”

⁶ Nae koti lu biri, Yesu yamala ohubeeresebwa omulimo kw'omulaamisi muhuluundu muno, ohuhira okw'abalaamisi abo, koti endagaano yi yatekeha akatikaati wa Nasaae neende abaandu yosi yihira ehale, olwohuba lyeema hu bisuubise by'ebiindi bihiramo

⁷ Endagaano yitaangira yiba niyitaalimo esyonoono syoosi, endagaano yohubiri haba siyahadahiibwe.

⁸ Nae Nasaae yanyoola esyonoono hu ndagaano yataangira, sakira yaboola ati, “Omwaami aboola ati endaalo chiri ohwiicha, chiinjia ohuholeramo endagaano njaaha neende Abaisiraeli alala neende abaandu b'enono ya Yuda.

⁹ Endagaano eyo haba siyichia ohuba koti yi ndahola neende bakuuka yaabwe; hu ludaalo lu ndabadiirira hu muhono nimbeemerera ohubatusa mu syaalo sy'e Misiri. Olwohuba haba sibali neende obweesikwa hu ndagaano yi ndahola nabo, sakira haba sindabadeebaho.

¹⁰ Mani yino niyo endagaano yiinjia ohuhola neende Abaandu Baisiraeli Omwaami aboola ati, mu ndaalo chiicha: njia ohuta amalako kaange mu bibaaso byaabwe, haandi njia ohukaandiika mu myooyo kyaabwe, mani njia ohuba Nasaae waabwe, haandi nabo ohuba abaandu baange.

¹¹ Haandi abulao omuundu yeesi ochia ohweekesa owaasye oba ochia ohuboolera owaasye ati, ‘Manya Omwaami,’ olwohuba boosi bachia ohuumanya, ohutulira elalira hu muundu ohiramo obudiidi, ohwoolera elalira hu muundu ohiramo obuhoongo.

¹² Njia ohulehera ebyonoono byaabwe haandi siinja hwiichulisa ebyonoono byaabwe luundi.”

¹³ Nasaae ohulomaloma hu ndagaano njaaha, yakofusa endagaano yataangira; nae buli siindu sikofula mani syawaamo obuhoonyi siba siri aambi ohusihirira.