Abaibburania 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Bulaanu, Nasaae yatuberesa esisuubise hu hunyale ohunyoola obuwuluuhiro buyalomalomaho. Mani lehe hweliinde awuleo omuundu yeesi mweeng'we otahoyera ohunyoola obuwuluuhiro bu yatusuubisa obwo.

² Olwohuba fwesi hwawulira Emboosi Ndai koti lu bosi bawulira. Bawulira emboosi, nae haba siyabahoonya, olwohuba nibayiwulira haba sibayaakanira neende efukiirira.

³ Sakira efwe abafukiiririra, lehe hunyoole obuwuluuhiro bu Nasaae yasuubisa. Siri sa koti lu yaboola ati, “Etima lyandiira mani ndeechuba nimboola endi: ‘Haba sibacha ohwiingira kata nabudiidi mu buwuluuhiro bwaange!’ ”

⁴ Olwohuba abuundu wandi mu byandiiko byoolerefu, sino nisyo si biboola ebidiira hu ludaalo lwa hataanu-na-habiri: “Nasaae yawuluuha hu mirimo chae hu ludaalo lwa hataanu-na-habiri.”

⁵ Esiindu syeene sino haandi silomalomwaho siti: “Haba sibahengireho kata nabudiidi mu buwuluuhiro bwaange.”

⁶ Abo abataangira ohunyoola Emboosi Ndai haba sibanyala ohunyoola obuwuluuhiro obwo, olwohuba haba sibafukiirira. Mani aliwo abaandu baandi endaalo chino abachia ohufukiirirwa ohubunyoola.

⁷ Haandi Nasaae yataao oludaalo luundi lulaangwa luti, “Lwaleero.” Daudi hale yalomalomaho mu byandiiko byoolerefu n'aboola ati, “Olwaleero, nimuwulira ekono lya Nasaae, mutoomia emyooyo kyeeng'we.”

⁸ Yosua aba niyaberesa abaandu obuwuluuhiro, Nasaae haba siyahaboleere haandi ebidiira hu ludaalo luundi.

⁹ Nae koti lu siri, abaandu ba Nasaae basiidoong'ereyo neende obuwuluuhiro obuli koti ohuwuluuha hwa Nasaae hu ludaalo lwa chitaanu-na-chibiri.

¹⁰ Olwohuba buli muundu yi Nasaae aberesa ohuwuluuha, awuluuha emirimo chae, koti lu Nasaae yawuluuha echae.

¹¹ Mani sakira, lehe huteemeho koti lu hunyala ohunyoola obuwuluuhiro obwo. Sisihoyera omuundu yeesi hweefwe ohulekeeresa ekono lya Nasaae, koti lu bakuuka yeefwe bahola, mani hwaahaya ohunyoola obuwuluuhiro obwo.

¹² Olwohuba Emboosi ya Nasaae, namu haandi yihola, njoki ohuhira olugaanga lwooki enyaande chaalwo choombi. Yiheenga ohwoolera elalira yi mwooyo neende obulamu bibukaananira yi nyiingo neende obuchunjuuni bibukaananira. Yikabuhania obwekoombi neende ebibaaso byomu mwooyo ky'abaaandu.

¹³ Sibulao esiindu syoosi esinyala ohukiswa Nasaae; ebiindu biloonge byoosi biri alafu, haandi biikule mu moni wae. Efwe fweesi huchia ohwelomalomaho mu moni wae.

Yesu omulaamisi muhuluundu

¹⁴ Lehe bulaanu hwomiirire hu fukiirira yihutumbula. Olwohuba huli neende Omulaamisi Muhuluundu Ohiramo owamala ohwiingira ohwoola mu moni wa Nasaae bweene, oyo niye Yesu, Omwaana wa Nasaae.

¹⁵ Omulaamisi Muhuluundu yi huli nae, siniye oyo otatuchuunirwa hulw'obukata bweefwe. Ohutusaho, huli neende Omulaamisi Muhuluundu owateemebwa mu ngeri choosi koti chihuteemebwamo, nae haba siyaholaho esyonoono syoosi.

¹⁶ Mani lehe hube abomiifu husude aambi neende obwiihalo bwa Nasaae bw'oluyaali, eyiri embabaasi. Eyo niyo yi huchia ohuchia ohukwiirwa esisa, haandi hunyoole ehabi y'ohutuhoonya, buli lu huba nihudaha obuhoonyi.