Abaibburania 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obuwonia buhunuufu

¹ Mani sakira huhoyere ohwomiirira muno mubwadyeeri bu hwamala ohuwulira, hu awuleo esiindu syoosi esinyala ohutukosa.

² Nikali mbwe emboosi yi bakuuka yeefwe banyoola ohutula hu bamalaika yali eyadyeeri, haandi abo abatayiloonda oba bayifukiirira, banyoola ohusaandisibwa hubahoyera.

³ Bulaanu huba huchia ohweewonia hutye, nihulekeeresa obuwonia buhunuufu buno? Omwaami mweene niye owataangira ohulaangirira obuwonia buno, haandi abo abamuwulira batwomiisira bati bwadyeeri nibwo.

⁴ Haandi Nasaae yesi yeecha yameeda ohwomiisa emboosi eyo naahola obulolero neende ebiwuukisa alala neende eby'amayia bitaali nasilala, haandi naakaba ebiyaanwa koti lu adaha ebiyaanwa bya Mwooyo Mwoolerefu.

Oyo otwiimirira mu buwonia

⁵ Nasaae haba siyataao bamalaika ohuba abatuki b'esyaalo sichia ohwiicha, esyaalo si huli ohulomalomaho.

⁶ Ohutusaho koti lu syaboolwa abuundu wandi mu byandiiko byoolerefu siti, “Omuundu niye siina esikera ewe Nasaae wamubaasaho muno? Omuundu-namuundu niye naanu yodeebaho muno?

⁷ Wamuhola ohuba aasi wa bamalaika ebiha ebidiidi muno; wamufwaasa ekofia y'oluyaali neende efuma,

⁸ haandi wamuhola atuke ebiindu byoosi.” Siboola siti, Nasaae yamuhola “ohutuka ebiindu byoosi”; sino syekesera elalira siti yamuberesa ebiindu byoosi.

⁹ Nae hubona Yesu, owaholwa yabaaho aasi wa bamalaika hulw'esiha sidiidi, hwaanyale ohufwiira buli muundu hulw'embabaasi cha Nasaae. Bulaanu humubona nafwaasirwe ekofia y'oluyaali neende efuma hulw'ohufwa hwae.

¹⁰ Syali sihoyera Nasaae, owaloonga haandi oliinda buli siindu, ohuberesa Yesu obunyala bw'ohuyira abaandu mu buwonia ohubitira mu husaanda hwae, hwaanyale ohukera abaana baangi bakabaneho hu luyaali lwae.

¹¹ Alabya abaandu ohutula mu bibi byaabwe, mani oyo olabya neende abo abalabiswa, boosi bali neende Laata yaabwe mulala. Sakira Yesu saali neende esoni ohubalaanga abeebulanwa bae.

¹² Aboolera Nasaae ati, “Njia ohuboolera abaandu baange ebiindu bi wahola; njia ohuhufumia yi beebusiire alala.”

¹³ Haandi aboola ati, “Njia ohuta esuubi lyaange mu Nasaae.” Haandi aboola ehabi liindi ati, “Mbano ndi ano neende abaana ba Nasaae yamberesa.”

¹⁴ Koti abo ba Yesu alaanga abaana, bali abaandu b'omubiri neende ab'amabaanga, Yesu yesi yeehola yafwaana nabo mani yaakabana hu bw'omuundu bwaabwe. Yahola atyo hwaanyale ohusihirisa Sitaani, oli neende obunyala hu hufwa.

¹⁵ Yahola atyo, hwaanyale ohuboolola abo abali abahalaabani bawaambe mu bulamu bwaabwe bwoosi olwohuba bali batya ohufwa.

¹⁶ Sibonehera elalira siti, haba sahoonya bamalaika. Otusaho ahoonya abeechuhulu ba Abburahamu.

¹⁷ Sino syeekesa siti yali ahoyere ohweehola afwaanane neende bamwaanang'ina neende bambochoong'ene mu buli ngeri, hwaanyale ohuba Omulaamisi Muhuluundu waabwe mweesikwa, haandi ow'esisa mu huhalaabana hwae eyiri Nasaae, hu bibi by'abaandu binyale ohuleherwa.

¹⁸ Mani bulaanu anyala ohuhoonya abo abateemwa, olwohuba yesi omweene yateemwa haandi yasaanda.