Abaibburania 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Engeri y'ohusangaasarimo Nasaae

¹ Muchiiririre ohuheerana koti Abakristo.

² Mutebiriraanga ohwakaanira abakeni mu madaala keeng'we. Olwohuba aliwo abaandu baandi abahola batyo, mani baakaanira bamalaika nibataamanyire.

³ Yichulisenge abaandu bali mu jeela, koti mwahaba nimuli alala nabo mu jeela. Yichulisenge abamanani koti mwahaba nimusaandira alala nabo.

⁴ Abaandu boosi bahoyere ohwiisa oluyaali mu bulamu bw'ohudeehisania. Abaandu badeehisania baheeraneenge ataali ohutula erwaanyi w'ohudeehisania hwaabwe. Olwohuba Nasaae achia ohuheengera abacheke neende abayirani omusaango.

⁵ Mweliinde mutaba neende obwekoombi bw'eseende, haandi ebiindu bi muli nabyo bibamaleenge. Olwohuba Nasaae yaboola ati, “Siinjia hubaleha; siinjia hubajwaang'a.”

⁶ Hulw'esyo hube abomiifu mani huboole huti, “Omwaami niye omuhoonyi waange, haba siinjia hutya. Omuundu anyala ohuholaho siindu siina?”

⁷ Yichulise abeemeresi beeng'we ababeekesa emboosi ya Nasaae. Baaseho koti obulamu bwaabwe bwali, mani muloondakane neende efukiirira yaabwe.

⁸ Yesu Kristo haba saakaluuhana, niye nasilala oyo, ekulo, nyaanga yino, neende endaalo choosi.

⁹ Mutakanya enjekesa ngeni chikabuhaane chitaali echaadyeeri chabakosa ohutula hu ngira yadyeeri. Silayi emyooyo kyeefwe ohunyoola amaani katula mu mbabaasi cha Nasaae ataali ohutula mu hwooseresa amalako kadiira hubyoohulya akatahoonya kata abo abakaliinda.

¹⁰ Huli neende alutaari yi balaamisi ba Nasaae bomu yeema lya ly'Esiyudaaya batafukiirirwa ohuyiryaaho.

¹¹ Omulaamisi Muhuluundu w'Esiyudaaya ayira amabaanga k'ebisolo Abuundu Ahiramo Obwoolerefu, mani yakayaana koti esiyaanwa sy'ebyonoono; nae ebisolo byeene bisaambirwa erwaanyi w'eyeema.

¹² Sakira Yesu yesi yafwiira erwaanyi w'esiko, hwaanyale ohulabya abaandu ohutula hu bibi byaabwe neende amabaanga kae keene.

¹³ Mani sakira lehe hutule huchie yaali erwaanyi Abuundu yi baandu bamenya, hudiirirwe alala nae esoni.

¹⁴ Olwohuba hu syaalo huno hubulaho esiko siyiindira; ohutusaho hukoonya esiko sichia ohwiicha.

¹⁵ Sakira lehe buli siha huwaanire Nasaae esiyaanwa syeefwe sy'ohumufumia ohubitira mu Yesu Kristo, esiri koti esiyaanwa situla mu minwa chi mutuumbula koti Omwaami.

¹⁶ Muteebirira ohuholaanga esilai neende ohuhonyanaanga, olwohuba bino nibyo ebiyaanwa bisangaasa Nasaae.

¹⁷ Muwulireenge abeemeresi beeng'we haandi mubeseengemo oluyaali. Olwohuba nibo abaliinda obulamu bw'emyooyo kyeeng'we nibatawuluuha, olwohuba bahoyere ohutusa obuloli eyiri Nasaae obudiira hu buhalaabani bwaabwe.

¹⁸ Mutulaamireenge eyiri Nasaae buli siha. Olwohuba humanyire huti, huli neende ebibaaso bilai, haandi hudaha ohuhola ebiindu bilai ebiha byoosi.

¹⁹ Haandi ndemeeda ohubekweeda muno endi, munaamire eyiri Nasaae anyale ohuungalusa bwaangu yi muli.

Ohusaba humaliirihayo

²⁰ Mani lehe Nasaae w'omuleembe, owasyuuhisa Omwaami weefwe Yesu ohutula mu bafu, Yesu Omwaayi Muhuluundu w'amakoondi ohubitira mu Muukulu kae akomiisa endagaano yitaakama,

²¹ ababerese buli si mudaha, hu munyale ohuhola ebiindu by'adaha. Nasaae oyo atuholeremo ebimusangaasa, n'abitira mu Yesu Kristo. Nasaae oyo ohoyere ohubeereswa oluyaali endaalo choosi. Amiina.

Emboosi chimaliirihayo

²² Basyaange mbekweeda mutekeerese neende ohwesimiirisa emboosi chino echibagumia emyooyo. Olwohuba ebbarwa yi mbaandikiire yino haba sindeeyi muno.

²³ Mbeekesa mumanye muti, owasyeefwe Timoteo yamala ohulehuulwa ohutula mu jeela. Nae niyeecha bwaangu njia ohwiicha nae ohubabona.

²⁴ Mutuheesere abeemeresi beeng'we neende abaandu ba Nasaae boosi. Abafukiiriri basyeefwe bali mu Yitalia bosi baabatumira amaheeso.

²⁵ Lehe embabaasi cha Nasaae chibe naang'we mweesi. Amiina.