Abaibburania 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae Seefwe

¹ Olwohuba efwe koti lu huli neende esidiiyiha sihoongo sy'abaloli sitwebodohaanie, lehe hweetuseho buli siindu syoosi esitwehiingamo, neende esyonoono syatwomeraho muno, mani hwiiruhe neende esinani embiro chituli mu moni.

² Lehe huhayisire emoni cheefwe hu Yesu, yi fukiirira yeefwe yeemaho ohutula elalira hu huchaaka ohwoolera elalira hu njakamo! Yesu haba siyatyaho omusalabba! Nae ohweema hu sangaalo lyali nilimuliindire mu moni, haba siyabaasa hu soni ch'ohufwiira hu musalabba chi yali achia ohunyoola, nae bulaanu yehaale hu muhono muluungi kw'esisaala sy'obutuki sya Nasaae.

³ Baaseho hu bidinyu biyabitamo; koti lu yesimiirisira ebidinyu byakiire ao, ohutula mu mahono k'abahola-mbi! Mani mutakanya omwooyo kweeng'we kwawaamo amaani mani mwaakwa.

⁴ Olwohuba mu hulwaana hweeng'we neende esyonoono, musisiiri ohwoola hu hwiidisa amabaanga keeng'we.

⁵ Eng'we mwiibiriire emboosi chigumia chi Nasaae yalomaloma naang'we koti abaana bae ati, “Mwaana waange, otalekeeresaanga Omwaami n'ahukolola, haandi otawechaangamo omwooyo Omwaami n'ahusaandya.

⁶ Olwohuba Omwaami akolola buli muundu y'adaha, haandi asaandya buli muundu yayira koti omwaana.”

⁷ Mwesimiirireenge ohusaanda hu munyoola koti esibonereso situla eyiri Laata yeng'we. Aliwo omwaana yeesi yi laatang'ene ataboneresaangaho n'adaha ohumukolola?

⁸ Nimutanyoola ohusaandisibwa koti abaana bae boosi bali, sino syeekesa siti haba simuli baana bae badyeeri, nae muli abaana b'erwaanyi.

⁹ Haandi buli muundu hweefwe, ali neende laatang'ene omukolola, haandi hu beesamo oluyaali. Mani bulaanu efwe sihuhoyere ohuba abaloonga muno eyiri seefwe w'omwooyo mani hwanyoola obulamu?

¹⁰ Baseefwe abo bateemaho ohutukolola hulw'esiha sidiidi koti lu babona bati silai yi bali ohutukolola. Nae Nasaae atukolola natusaandya hulw'obulai bweefwe, hwaanyale ohutukabaho hu bwoolerefu bwae.

¹¹ Nihunyoola ohusaandisibwa nibatukolola, esiha esyo, ohusaandisibwa ohwo hutubonehera koti esiindu sibi, esituleetera obuchuuni sa. Nae luunyuma abomiisibwa neende esibonereso sifwaana sityo, banyoola omusaara kw'esangaalo lw'obulamu buluungifu.

Amakerako neende ohulabula

¹² Siingise aakulu amahono keeng'we kajoong'ere ako, haandi yomiise amahuumbo keeng'we kateengereha ako!

¹³ Keendereenge buli siha hu ngira ngololofu, hu hukulu hulema huhaye ohulemera elalira, nae huwone.

¹⁴ Teemeho koti lu munyala ohubona muti, muli neende omuleembe neende buli muundu yeesi, nimukeendera mu bulamu bwoolerefu, olwohuba abulao omuundu yeesi ochia ohubona Omwaami naabula obwoolerefu.

¹⁵ Mweliinde awuleo omuundu yeesi okobola enyuma mani yaafwirwa embabaasi cha Nasaae. Haandi lehe omuundu yeesi ateehola koti omusaala mululu okwemeeda ohuhula mani kwanyaasa echaasye neende obusiba bwakwo.

¹⁶ Mweliinde omuundu yeesi ateehola omucheke haandi otatya Nasaae koti hale Esau owakusa ehabi yae y'obusiha koti omwaana muhuluundu hulw'esideru sy'ebyohulya silala.

¹⁷ Mumanyire koti luunyuma yateemaho ohukoonya ehabi cha laatang'ene nae baahaya ohumuba olwohuba haba siyanyala ohunyoola engeri yoosi eyohukaluuhaniamo ebibaaso bya laatang'ene, kata neende ayahaba niyateemaho ohwekweeda neende amasika kae.

¹⁸ Musisiiri ohwoola huhudiira hu biindu bi munyala ohudiiraho koti Abaisiraeli bali, koti hu lugulu lwa Sinai, olwali neende omuliro kuwuuma; musisiiri ohwoolaho hu siirima neende enang'oong'o, neende omuyaka kududuma,

¹⁹ ekono ly'eturumbete, oba ekono ly'omuundu. Abaandu nibawulira ekono elyo, beekongooya bati batawuliraho emboosi yiindi,

²⁰ olwohuba sibanyala ohwesimiirisira esilagiro sy'aboola siti, “Kata esisolo syoosi nisyegeeng'a hu lugulu olwo, sihoyeerwe ohuhubbwa amakina syaafwa.”

²¹ Ebiindu bi babona byali nibitiisa muno mani byaakera Musa yaboola ati, “Ndi ohutengereha haandi obuti bundiirire!”

²² Ohutusaho, mwiichire hu lugulu lwa Siyooni, neende mu siko sya Nasaae mulamu, Yerusalemu sya Muukulu, si bamalaika basyo bali elifu neende elifu.

²³ Mwiichire eyiri omukaanda kw'abafukiirira Kristo, abaana ba Nasaae b'amberi, ba baandiika ameeta kaabwe Muukulu. Mwiichire eyiri Nasaae, oheengera abaandu boosi emisaango, neende eyiri emyooyo ky'abaandu balai abaholwa aboolerefu.

²⁴ Mwiichire eyiri Yesu, owatekeha Endagaano Njaaha, neende eyiri amabaanga keediswa akasuubisa ebiindu bilai muno ohuhiraho amabaanga ka Abbeli.

²⁵ Sakira mweliinde, haandi mutahaya ohuwulira emboosi ch'omuundu oli ohulomaloma. Nisiri siti, abo abahaya ohuwulira omuundu olomaloma n'abeekesa ebidiira hu hweliinda hwomu syaalo muno haba sibaona, bulaanu naafwe hunaone hutye nihuubbira omukoongo omuundu olomaloma n'atula Muukulu n'adaha ati hweliinde.

²⁶ Mu biha ebyo, ekono lyadengaania esyaalo, nae ebiha bya bulaanu yasuubisa ati, “Haandi njia ohudengaania ataali esyaalo syoong'ene nae Ekulu lyosi!”

²⁷ Emboosi chino, “Haandi ehabi liindi,” cheekesa bulai chiti, bachia ohudengaania haandi ohusindikisa buli siindu siloonge, nae ebiindu bitanyala ohudengaanisibwa byoong'ene nibyo ebichia ohudoong'a.

²⁸ Mani sakira, olwohuba muchia ohunyoola obwaami butanyala ohudengaanisibwa, lehe hweebase Nasaae mani humwiinamire mu ngeri yimusangaasa, nihuli neende obuloonga neende ohutya;

²⁹ olwohuba Nasaae weefwe, ali omuliro kusihirisa.