Abaibburania 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Amalako k'Esiyudaaya kali sa koti esiiniha sy'efwaanani sy'ebiindu bilai bichia ohwiicha, nae haba sikali efwaani yadyeeri yeene y'ebiindu by'elalira bino. Sakira ebiyaanwa bibeeresebwa buli siha, haba sibinyala ohulabisira elalira abaandu basuda eyiri Nasaae.

² Ebiyaanwa ebyo biba nibinyala ohulabisira elalira abaandu beenamira Nasaae, ebiyaanwa ebyo haba sibyahayaanirweyo buli siha, olwohuba ababiyaanayo bahabeere nibalabiswa elalira ehabi lala nibataaliho neende esyonoono mu myooyo kyaabwe.

³ Nae koti lu siri, ebiyaanwa ebyo bibeechulisa sa ebyonoono byaabwe buli mwaaka.

⁴ Olwohuba amabaanga k'esurusi neende amabaanga k'embusi haba sikanyala ohumalao ebyonoono.

⁵ Mani ohweema hu sifune esyo, Kristo niyali aambi ohwiicha mu syaalo, yaboolera Nasaae ati, “Ewe haba siweenya ebiyaanwa neende ebiindu bituswa, nae wandekehera omubiri.

⁶ Ebiyaanwa by'esolo chisaambwa hu alutaari, oba ebiyaanwa bimalao ebyonoono haba siwabisangaalira.

⁷ Sakira ndaboola endi, ‘Nasaae, mbano ndi ano, ohuhola sy'odaha, koti sa lu syanyandiikwaho mu sitabo sy'Amalako.’”

⁸ Yataangira ohuboola ati, “Haba siwadaha haandi haba siwasangaalira ebiyaanwa neende ebiindu bituswa, oba neende ebisolo bisaambwa hu alutaari, neende ebiyaanwa bimalao ebyonoono.” Yaboola sino kata neende syahaba siti ebiyaanwa bino byatuswa ohuloondakana neende bi malako ka Musa kadaha.

⁹ Mani yeecha yaboola ati, “Nasaae, mbano ndi ano ohuhola sy'odaha.” Sakira Nasaae yamalawo ebiyaanwa bihale byoosi, mani yatao esiyaanwa sya Kristo abuundu waabyo.

¹⁰ Olwohuba Yesu Kristo yamala ohuhola esiindu si Nasaae yadaha ahole, sakira efwe fweesi bulaanu hwamala ohulabiswa ohutula mu byonoono, hulw'esiyaanwa siyaanayo esy'omubiri kwae kweene, ehabi lala lyoong'ene.

¹¹ Buli mulaamisi w'Esiyudaaya yeesi, buli ludaalo n'ayaana ebiyaanwa nasilala ebyo amahabi maangi; nae ebiyaanwa bino haba sibinyala ohumalao ebyonoono daawe.

¹² Nae Kristo yawaayo esiyaanwa silala syoong'ene, hulw'ebyonoono ehabi lala lyoong'ene, mani yeehala hu muhono muluungi kwa Nasaae.

¹³ Ohutula olwo, bulaanu yalindirira ohwoola lu Nasaae yahahole abasuku bae ohuba koti esiteeni syawuluusiraho amakulu kae.

¹⁴ Olwohuwaayo esiyaanwa sia alala esyo, yamala ohulabisira elalira abo bayoosaho ebyonoono.

¹⁵ Haandi Mwooyo Mwoolerefu yesi atuberesa obuloli bwae. Ohutaangira aboola ati,

¹⁶ “Yino niyo endagaano yiinjia ohuhola nabo Omwaami aboola: mu ndaalo chiichayo, njia ohuta amalako kaange mu myooyo kyaabwe mani kandiike mu bibaaso byaabwe.”

¹⁷ Haandi ameeda n'aboola ati, “Haba siinja hwiichulisira elalira ebyonoono byaabwe, neende ebiholwa byaabwe bibi.”

¹⁸ Mani ebyonoono bino nibimalire ohuleherwamo, esiyaanwa sy'ohumalao ebyonoono haba sisiba nisidahibwa.

Lehe husude aambi neende Nasaae

¹⁹ Sakira basyaange, ohubitira mu hufwa hwa Yesu, bulaanu hunyala ohwiingira Abuundu Ahiramo Obwoolerefu ataali ohutya.

²⁰ Yatwikulirawo engira njaaha, engira enamu, eyibita mu pasya, esyeekesa siti, ohubitira mu mubiri kwae kweene.

²¹ Bulaanu huli neende Omulaamisi Muhuluundu oliinda Enyuumba ya Nasaae.

²² Mani lehe husude aambi neende Nasaae neende omyoyo kutaalimo esyonoono, okwichuule efukiirira, nihuli neende emyooyo kilabiiswe ohutulamo ebibaaso bibi, neende emibiri chooseebwe neende amaachi malafu.

²³ Lehe hwomiirire hu suubi li huli nalyo, olwohuba Nasaae otusuubisa mweesikwa niye.

²⁴ Lehe hubaaseho hu basyeefwe, huhoonyane abeene-na-beene nihweekesa ohuheerana haandi nihuhola ebiindu bilai.

²⁵ Hutaleha ebiima by'ohwebuusa alala, koti lu baandu baandi bahola. Ohutusaho, lehe hwemeede ohugumisania emyooyo, koti lu hubona huti, Oludaalo lw'Omwaami lusudire aambi.

²⁶ Nihumalire ohumanya obwadyeeri, nae abeene hwaheengao ohwemeeda ohwonoona, mani humanye huti, abulao esiyaanwa siindi esichia ohumalao ebyonoono.

²⁷ Ohutusaho esidoong'ere nihwo ohuliindirira nihutiire ohuheengerwa omusaango haandi nihutiire omuliro mwaalaba kuchia ohusihirisa abo abayiingania Nasaae.

²⁸ Olwohuba buli muundu otawulira amalako ka Musa yeetwa ataali ohusaasirwa n'amalire ohuheengerwa omusaango ohumuhira ohweema hu sifune sy'abaloli babiri oba abahira babiri, abomiisa bati yahola esyonoono.

²⁹ Bulaanu mubaasa muti omuundu olekeeresa Omwaana wa Nasaae, mani yaayira amabaanga k'endagaano ya Nasaae akamwoosaho esyonoono koti esiindu sibulamo obuhoonyi, haandi onyoolesa Mwooyo w'embabaasi, haba saachia hunyoola husaandisibwa huungi muno hwahoyerwa?

³⁰ Olwohuba humanyire omuundu waboola ati, “Ohwetuunga hwaange nihwo, mani njia ohwetuunga”; haandi owaboola ati, “Omwaami achia ohuheengera omusaango abaandu bae.”

³¹ Siindu syohutya muno omuundu ohudiisibwa mu maani ka Nasaae mulamu.

³² Mwiichulise koti lu byali mu ndaalo chabita. Mu ndaalo echo, obulafu bwa Nasaae nibumalire ohubahosaho, mwasaanda ebiindu biingi muno, nae haba simwayingirwa mu hulwaana hweeng'we.

³³ Endaalo chiindi mwanyekwaanga mu moni w'abaandu, haandi baabasaandiya. Haandi endaalo chiindi mwali abeetekefu ohweyambaania hu baandu basaandisibwa batyo.

³⁴ Mwakwiira abaandu bali mu jeela esisa, haandi nibabang'uula ebiindu byeeng'we mwesimiirisira ebidinyu ebyo neende esangaalo, olwohuba mwali mwamanya muti, mwali nimusisiiri neende esiindu silai sihirao, esiyiindira emyaaka choosi.

³⁵ Sakira mutalehana neende obugumu bweeng'we, olwohuba bucha ohubaleetera omusaara muhoongo muno.

³⁶ Muhoyere ohwesimiirisira ebidinyu, hu munyale ohuhola si Nasaae adaha, mani munyoole si Nasaae yasuubisa.

³⁷ Olwohuba koti lu byandiiko byoolerefu biboola biti, “Hulw'esiha sidiidi muno, mani oyo oli ohwiicha achia ohwiicha, haba saacha huhiinda daawe;

³⁸ nae omuluungifu waange niye ochia ohubaao omulamu hulw'efukiirira, nae naatya mani yakobola enyuma, omwooyo kwaange haba sikuba kuchia ohumusangaalira daawe.”

³⁹ Nae efwe haba sihuli abaandu batya mani hwakobola enyuma mani husihiriswe daawe, nae huli hu abo abali neende efukiirira haandi abaliinda bulai obulamu bwaabwe.