Abafilipi 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obuluungifu bwadyeeri

¹ Nimaliirisa basyaange, mwehoyere mu Omwaami. Ohubandiikira ebiindu bifwaanana neende koti bi ndabaandiikiraho hale, haba sibinjuuna, nae hoyeere hole endyo hulw'obulai bweeng'we.

² Mweliinde embwa, mweliinde abonooni, mweliinde abo abeheenga-heenga emibiri.

³ Olwohuba efwe niifwe ohuhebwa hwadyeeri, abeenamira Nasaae mu mwooyo, haandi abeninisirya mu Kristo Yesu, haandi abateesikaho emiholo kidiirana hu mubiri kata nabudiidi.

⁴ Kata neende ese mweene andahaba ni ndi neende esifune sy'ohweesika omubiri kwosi. Omuundu wuundi yeesi n'aliwo obaasa ati, niye oli neende esifune esy'ohweesikaho omubiri kwosi, ese niise oli neende esihiraho esyo muno,

⁵ ese owahebwa hu ludaalo lwa chitaanu-na-chidatu, omuundu otula hu baandu Baisiraeli, ow'enono ya Bbenjamini, Omuibburania webulwa neende Abaibburania; ohweema hu bi malako ka Musa kadaha, Omufarisaayo omweene,

⁶ ohweema hu huchuunirwa ediini omwiiti w'abafukiiriri, ohweema hu buluungifu bweema hu malako ka Musa, otaaliho neende esyonoono syoosi.

⁷ Nae kata katyo, engaanga yoosi yi ndali nindanyoola, ndeecha ndayibala koti ohufwiirwa huhaya hulwa Kristo.

⁸ Mubwadyeeri bweene mbala buli siindu syoosi koti ohufwiirwa huhaya hulw'obulai bubitiirifu obuli mu humanya Kristo Yesu Omwaami waange. Hulw'omweene oyo, ndabitira mu buchuuni bw'ohufwiirwa ebiindu byoosi, mani ndabibala ohuba koti obunyaka buhaya, hu nyemeo nyale ohuyindiyala mu Kristo

⁹ mani njakaanibwe nimulimo, nitanyoolere obuluungifu obwaange omweene, obweema hu malako ka Musa, nae obwo obubitira mu fukiirira mu Kristo, obuluungifu butula eyiri Nasaae, haandi obweema hu fukiirira;

¹⁰ hu nyale ohumumanya neende ohumanya amaani kohusyuuha hwae haandi hu nyale ohukabana hu husaandisibwa hwae, fwaanane nae mu hufwa hwae,

¹¹ endi nibinyaliha, syesi nyale ohunyoola ohusyuuha ohutula mu bafu.

Ohwiiruha niwechoomere esisuubirwa

¹² Sisiri mbwe ndamala ohunyoola esisuubirwa sino, oba oti ndamala ohuba otaalihooho esyonoono syoosi; nae ndi ohwedinya ninjiiririra nyale ohusinyoola omweene, olwohuba Kristo yamala ohuhola ohuba owae mweene.

¹³ Basyaange, haba si ndi ohusiyira endi omweene niise owenyalira ohusinyoola; nae esiindu silala syoong'ene si ndi ohuholaanga siri mbwe, ndi ohwiibiriranga ebyo byoosi ebiri enyuma waange, neende ohwedinyaanga ohuchia mu moni endi njole eyiri esyo esiri emutwe waange,

¹⁴ Ndi ohwedinyirisaanga ninjia mu moni eyiri esisuubirwa hu nyale ohunyoola esisiimo siri Muukulu esya Nasaae esibitira mu Kristo Yesu.

¹⁵ Lehe efwe abali abahuluundu hube neende embaasa yino; nae nikali aliwo mu siindu syoosi syooba nobaasiramo buundi, Nasaae mweene niye ochia ohuhubwiihulirao syosi esiba nisiri esihoyera hu siindu esyo syosi.

¹⁶ Ohutusaho, lehe efwe hwomiirire hu bwadyeeri bu hwamala ohunyoola.

¹⁷ Basyaange, mweyaambaanie hu hundekeraaniaho, mani mubalihe bulai abo abali ohumenya koti eng'we muli, koti lu muli neende esyohuboneraho mweefwe.

¹⁸ Olwohuba abaandu baangi muno, ba buli siha ndi ohubalomalomaangaho yi muli, haandi baandi bulaanu ohubalomalomaho yi muli neende amasika maangi, bamenya nibali koti abasuku b'omusalabba kwa Kristo.

¹⁹ Ohumaliiriha hwaabwe huchia ohuba ohusihirira, nasaae waabwe ni olusooso, nae haandi beeniinisirya sa mu soni chaabwe, neende ebibaaso byaabwe nibyaandira hu biindu by'ohusyaalo.

²⁰ Nae efwe, obwiihalo bweefwe fweesi, buli Muukulu, mani ebweene eyo niyo yihulilindira Omuwonia, Omwaami Yesu Kristo,

²¹ ochia ohukaluuhania emibiri kyeefwe kyitaalimo echamu, kibe koti omubiri kwae kw'oluyaali, niyehoonyera amaani akamunyaliraanga endaalo chino, ohutechaanga ebiindu byoosi aasi wae omweene.