Abaefeso 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaana neende abeebusi

¹ Abaana, ticheenge abeebusi beeng'we mu Omwaami, olwohuba sino nisyo esiindu sihoyera.

² “Yisaanga oluyaali mu lataao neende maakoo” (lino nilyo elako litaangira eliriho esisuubise),

³ “hu binyale ohuhubeera bulai haandi hu onyale ohuyiindira nooli omulamu hu syaalo huno.”

⁴ Balaata, mutachunianga abaana beeng'we boola ohudiirwa etima, nae mubahuseenge baba neende ebiima bilai neende ameeko k'Omwaami.

Abawaambe neende abaami baabwe

⁵ Abawaambe, muwulireenge abaami beeng'we bohu syaalo huno, nimutya haandi nimuteengereha, neende omwooyo mulala, koti mwahaholera Kristo;

⁶ ataali olwohuba mbwe ahubona, koti odaha ohusaangaasa sa abaandu, nae koti omuhalaabani owa Kristo, oli ohuholaanga bi Nasaae adaha neende omwooyo mulala.

⁷ Nooli ohuhalaabanaanga neende ohudaha koti lu wahaholeraanga Omwaami, haandi si koti oholeraanga abaandu,

⁸ n'omanyire oti hulwabuli siindu silai syoosi si muundu ahola, achia ohunyoola engaanga yichaaniraho ohutula eyiri Omwaami, kata naaba naali omuwaambe oba omulehuule.

⁹ Abaami, mwesi mubaholereenge mutyo, haandi mweliindeenge muhaya ohubeehanahanaanga, nimumanyire muti, oyo oli Omukali waabwe haandi niye Omukali weeng'we, ali Muukulu, haandi muti oyo abula neende ohuboona.

Ebilwaaniso bya Nasaae byoosi

¹⁰ Nimaliirisa, becheenge abomiifu mu Omwaami neende mu maani k'obukali bwae.

¹¹ Mwefwaale ebilwaaniso bya Nasaae byoosi, hu munyale ohweema tiiri nimweliindire obukodyo bwa Sitaani.

¹² Olwohuba sihuli hulwaana neende emibiri neende amabaanga sa, nae huli ohulwaania obutuki, ohulwaania amaani, ohulwaania abatuki bohu syaalo bali mu siirima siriho endaalo chino, ohulwaania omukaanda muhoongo kw'emisaambwa ech'obuhyaamu buli Muukulu.

¹³ Mani sakira bukule ebilwaaniso bya Nasaae byoosi, hu munyale ohuyinduulana mu ndaalo mbi, mani nimuba nimumalire ohuhola ebyo byoosi, mudoong'e nimweemere.

¹⁴ Mani mwemeenge nimumalire ohweboya olusibiro mu sibuno neende obwadyeeri, haandi nimumalire ohwefwaala ebbaati ly'ohusirifu elyobuluungifu,

¹⁵ haandi neende nimumalire ohufubiha mu makulu keeng'we ebyehoonyerwa by'Emboosi Ndai y'endaalo choosi.

¹⁶ Nimumalireho bino byoosi, bukule engabo y'efukiirira, yi munyala ohusimisira obuyiingo bumesa-mesana obw'omusuku Sitaani.

¹⁷ Haandi nimumalire ohubukula ekofia y'obuwonia, neende olugaanga lwa Mwooyo, oluli emboosi ya Nasaae.

¹⁸ Musabeenge ebiha byoosi mu Mwooyo, neende ohusabiraanga abasyeeng'we. Nimumaliirisa mutyo, mubecheenge meeso neende ohwesimiirisa hwoosi, nimusabiraanga aboolerefu boosi,

¹⁹ haandi hulwaange syesi, muti nyale ohulomalomaanga nitatya ninjaala esyaama sy'Emboosi Ndai,

²⁰ si ndeeholera wamwaanda oli mu minyororo; hu nyale ohuyiyaala nitatya, koti lu hoyeere ohuyilomaloma.

Amaheeso kamaliirihayo

²¹ Bulaanu hu mwesi mweemeo mumanye koti lu ndi, neende si ndi ohuhola, Tikiku omusyaani weefwe muheerwa, haandi omuhalaabani mweesikwa, mu Omwaami, mbao achia ohubaboolera buli siindu.

²² Mutumire yi muli hulw'esifune syeene sino, endi hu munyale ohumanya koti lu huli, haandi endi anyale ohuboomiisa emyooyo kyeeng'we.

²³ Omuleembe kube hu basyeefwe, neende obuheeri alala neende efukiirira, eyitula eyiri Nasaae Seefwe, haandi neende eyiri Omwaami Yesu Kristo.

²⁴ Leha embabaasi cha Nasaae chibe neende abo boosi abaheera Omwaami weefwe Yesu Kristo neende obuheeri butafwa.