Abaefeso 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obulala bw'omubiri

¹ Mani sakira ese omuboye hulw'Omwaami, mbekweeda ohumenya obulamu buchaana neende ohulaangwa hu mwalaangwa,

² obw'ohweyisa aasi koti lu bihoyera, neende obuloonga, neende obwesimiirisi, neende ohwesimiirisiraanga abasyeeng'we mu buheeri,

³ abali neende amaofu k'ohuliinda obulala bwa Mwooyo muhukeendera mu muleembe.

⁴ Kuliwo omubiri mulala neende Mwooyo mulala, koti lu mwalaangwa ohuba neende esuubi lala elichaana neende ohulaangwa hweeng'we.

⁵ Omwaami mulala, efukiirira ndala, ohubatiisibwa hulala.

⁶ Nasaae mulala haandi Seefwe fweesi, oli aakulu wa byoosi haandi obitira mu byoosi, haandi oli mu byoosi.

⁷ Nae embabaasi chabereswa buli mulala hweefwe ohukeraania neende esikero, sy'esiyaanwa sya Kristo syaaba nasyo.

⁸ Mani sakira silomalomwaanga siti, “Ni yaniina aakulu yali niyemiriire obuungi bw'abawaambe, haandi yaberesaanga abaandu ebiyaanwa.”

⁹ (Mu huboola ati, “Yaniina,” siba syeekesa siina syeene, ataali mbwe yeeha aasi w'esyaalo bweene?

¹⁰ Mani oyo oweeha niye omweene oyo haandi owaniina aakulu muno ohubita neende ekulu, hwaanyale ohwiichusa ebiindu byoosi.)

¹¹ Niye yi biyaanwa byae byali biti abaandu baandi banyale ohuba abatume, abaandi abanabbi, abaandi abayaali, abaandi abaayi neende abeekesa,

¹² ohuberesaanga abaandu ba Nasaae ebiindu bihoyera omulimo kw'obuhalaabani, hu banyalirwe ohwoombaha omubiri kwa Kristo,

¹³ ohwoola lu fweesi hunyoola obulala bw'efukiirira neende obw'ohumanya Omwaana wa Nasaae, ohwoola hu bwaangafu bweene, ohwoola hu sikero sy'emera ya Kristo mu bwiichufu;

¹⁴ hu bulaanu efwe huhaye ohudoong'a nihusisiiri abayere, nihusuubwa era neende eno haandi nihuyuuywa neende buli miyaka ch'enjekesa chikabuhaane, ohutula hu baandu babachirisi, ohweema hu bukodyo bw'engano chaabwe.

¹⁵ Ohumalaho ohulomalomaanga obwadyeeri mu buheeri, hunyale ohuhulira mu buli ngira yoosi, mu mweene oyo oli omutwe, mu Kristo,

¹⁶ yi mubiri kwoosi, kweyambaaniaho haandi kweediiraho alala, mu buli nyiingo, yikwabereswa, buli situundu nisihola bulai, sikera omubiri kuhula, haandi kweyoombaha mu buheeri.

Obulamu buyaaha mu Kristo

¹⁷ Bulaanu sino syomiisa haandi ndaasitusira obuloli mu Omwaami endi, eng'we simuhoyere haandi ohuchiiririra nimumenya koti Abateende bamenyaanga, mu buhyaamu bw'ebibaaso byaabwe;

¹⁸ ohumanya hwaabwe hwamaliyisibwa, bakabuhana neende obulamu bwa Nasaae olwobutamanya bubalimo, obweema hu bwaangalafu bw'emyooyo kyaabwe;

¹⁹ bamala ohweehola ebitahoyera haandi baamala ohwewerayo elalira mu obwekoombi, batolyoohera ohuhola buli ngeri y'ebihole by'omufuto.

²⁰ Mani sino nisyo simweeka ohutula hu Kristo!

²¹ nimbaasa endi, mwamala ohuwulira akamudiiraho, haandi endi mweekeserwa mu mweene oyo, koti lu bwadyeeri buli Yesu.

²² Mwefwaalulemo obulamu bweeng'we buhale, obuchiana neende ebiima by'obulamu bweeng'we buhale, obwamala ohubiiyira mu bwekoombi budoondobanu,

²³ mani mukaluuhanisibwe mube abayaaha mu myooyo ky'ebibaaso byeeng'we,

²⁴ mani mwefwaale obulamu buyaaha, obwaloongwa obufwanana neende Nasaae, mu buluungifu bwadyeeri neende obwoolerefu.

²⁵ Mani sakira, muhwetusaho obwebachirisi, lehe buli muundu yeesi alomalomeenge obwadyeeri neende owaasye, olwohuba fweesi huli esiindu silala mu Kristo.

²⁶ Beecheenge neende etima nae mutonoonaanga; mutalehaanga elyuuba likwa nimusisiiri neende etima,

²⁷ hu muhayeenge ohuberesa Sitaani obweyaango bwosi.

²⁸ Lehe omwiibi yeesi ahaye ohuchiiririra ohwiiba, nae leha ahole emirimo, naahola omulimo kw'obwadyeeri neende amahono kae omweene, hu yeemeo anyale ohukabaho abo abali neende obumanani.

²⁹ Mumanyaanga emboosi mbi chitulaho mu minwa kyeeng'we, ohutusaho echiri endai, echiusa, echihoonya, haandi echoombaha abachiwulira.

³⁰ Haandi mutanyoolesaanga Mwooyo Mwoolerefu wa Nasaae, yi mwaliindirwamo ohwoola hu ludaalo lw'ohununulirwaho.

³¹ Mulehe obululu bwoosi neende obwaalaba neende etima neende ohwekanyiirisa, neende obumoonyi, bituswe mweeng'we, alala neende ehiinda yoosi,

³² mani buli muundu akwireenge sa owaasye esisa, neende omwooyo mudotoo-doto, buli muundu naleheraangamo owaasye, koti lu Nasaae ohubitira mu Kristo yabaleheramo.