Abaefeso 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omulimo ku Paulo yahola mu Bateende

¹ Mani hulw'esifune sino, ese Paulo, omuboye wa Kristo Yesu hulweeng'we abateende

² nimbaasa endi mwamala ohuwulira hu buliindi bw'embabaasi cha Nasaae, chi ndaberesebwa hulweeng'we,

³ koti lu syaama syambuulirwa ohubitira muhuboneherwa, koti lu nyandiikire mu bwiimbikiti.

⁴ Nimusoma sino, muchia ohumanya esibaaso syaange, esidiira hu syaama sino esya Kristo.

⁵ Esitabuulirwa abaandu boosi, mu njibulo chiindi echabita koti lu bulaanu simalire ohubwiihulirwa omutume wae mwoolerefu wuno, neende abanabbi ohubitira mu Mwooyo.

⁶ Esyaama siri mbwe, koti lu Bateende bosi bali abasiha, abaandu b'ohumubiri mulala, haandi abakabani bohu sisuubise ohubitira mu Kristo Yesu, haandi ohubitira mu Mboosi Ndai.

⁷ Emboosi Ndai yino, ese ndaholwa ohuba omuhalaabani wayo, ohweema hu siyaanwa sy'embabaasi cha Nasaae, si ndabereswa ohubitira mu buhalaabani bw'amaani kae.

⁸ Ese naange, kata neende lu ndi omudiidi ohira mu boolerefu boosi, ndabereswa embabaasi chino, hu nyale ohuchia ohuyaalira Abateende engaanga yitanyoolehanaanga eyiri mu Kristo,

⁹ haandi neende ohuchia ohuhola abaandu boosi banyale ohubona endekeha koti lu yiri ey'esyaama syali syakisibwa mu Nasaae waloonga ebiindu byoosi, hulw'endaalo nyiingi.

¹⁰ Ohubitira mu mukaanda kw'abafukiiriri, amakesi maangi kakabuhaane aka Nasaae, kanyale bulaanu ohwekeswa kaamanyihana eyiri obunyala neende amaani Muukulu.

¹¹ Sino syeema hu ndekeha yitaakama ya Nasaae yi yoseresera mu Kristo Yesu Omwaami weefwe,

¹² yi hulimo neende obusimbiifu neende obweesikwa ohusuda eyiri Nasaae ohubitira mu fukiirira mu Kristo.

¹³ Sakira ndi ohubasaba endi mutawaamo omwooyo ohubona koti lu ndi ohubanyaahanira, esyahabeere esy'oluyaali yi muli.

Obuheeri bwa Kristo

¹⁴ Hulw'esifune sino, sakira hubba aasi amahuumbo kaange mu moni wa Seefwe,

¹⁵ otulaho eliita lya buli lwaanyi oluli Muukulu oba hu syaalo,

¹⁶ hu mbwe, ohweema hu buungi bw'oluyaali lwae, anyale ohubaberesa obunyala bw'ohwomiiswa neende amaani mahoongo ohubitira mu Mwooyo wae, obuli muukati w'emyooyo kyeeng'we bweene.

¹⁷ Haandi mbwe, Kristo anyale ohumenya mu myooyo kyeeng'we ohubitira mu fukiirira; mbwe eng'we, nimuba nimumalire ohuwaanda neende ohwomiiswa mu buheeri,

¹⁸ munyale ohunyoola amaani k'ohufukiirisania neende aboolerefu boosi ohumanya obubaambali neende obulambiifu neende obuleeyi neende obwoloberefu,

¹⁹ haandi neende ohumanya obuheeri bwa Kristo ohufumaalira amakesi koosi, hu munyale ohwiichuswa neende obwiichufu bwa Nasaae.

²⁰ Bulaanu eyiri oyo yi hubitira mu maani kali ohutuholeramo, anyala ohutuholera ebiindu bibitiirifu muno ohuhirira elalira neende ohumusaba oba ohubaasaho,

²¹ oyo abereswe oluyaali mu mikaanda ky'abafukiiriri haandi neende mu Kristo Yesu eyiri enjibulo choosi, ebiha neende ebiha. Amiina.