Abaefeso 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohutula mu hufwa, ohuchia mu bulamu

¹ Hale mwali mwafwa mu mwooyo ohweema hu buhyaamu bweeng'we neende ebyonoono byeeng'we

² bi mwakeenderaangamo, nimuloondakana neende ehola y'esyaalo sino, nimuloondakirira ow'obunyala w'amaani k'emboo, mwooyo oli bulaanu ohuholeraanga mu baana bahayuha.

³ Mu beene bano, nimwo mweefwe fweesi hwali hwamenya mu obwekoombi bw'emibiri kyeefwe, nihuloondakana neende obwekoombi bw'emibiri neende ebibaaso, mani ohweema hu byeene ebyo, mu bwiibulanwa hwali abaana b'egiili, koti sa abaandu baandi badoong'ereyo.

⁴ Nae Nasaae, oli neende esisa sibitiirifu ohutulana hu buheeri buhunuufu bu yatuheereramo,

⁵ kata neende nihwali nihwamala ohufwa, ohubitira mu bwonooni bweefwe, yatuhola hwaaba abalamu ohubitira mu Kristo (esyeekesa mbwe mwaonisibwa hulw'embabaasi sa).

⁶ Haandi yatusyuuhisa alala nae, mani yaatwiihasa alala nae mu bweyaango bwo Muukulu ohubitira mu Kristo Yesu,

⁷ ati hwaanyale mu ndaalo chiichayo ohweekesa obubitiirifu bw'embabaasi butanyala ohukerwa mu hutukwiira esisa ohubitira mu Kristo Yesu.

⁸ Olwohuba ohubitira mu mbabaasi, mwaonisirwa ohubitira muhufukiirira; haandi sino haba sisyali esiholwa syeeng'we abeene, nae syali esiyaanwa sya Nasaae

⁹ esiteemere hu biholwa oti hu muundu yeesi anyale ohwefumia.

¹⁰ Olwohuba efwe fweesi huli omulimo kw'amahono kae keene, abaloongwa buyaaha ohubitira mu Kristo Yesu huholeenge emirimo milai, ki Nasaae yatekeha hale, ati efwe hukikeendereengemo.

Ohuba bulala mu Kristo

¹¹ Mani sakira muhoyere ohwiichulisa muti, eng'we hale abali Bateende mu mubiri, nimulaangwa mbwe ohutahebwa neende abali nibelaanga bati ohuhebwa, huholerwaanga sa mu mubiri, haandi nihuholwa sa neende amahono

¹² mwiichulise muti, esiha syeene esyo mwali nimwakabulwa ohutula hu Kristo, nimwakaluuhanisibwa ohutula hu bulala bwa Yisiraeli, haandi nimuli Abateende ohweema hu ndagaano y'esisuubise, nimutaaliho neende esuubi lyoosi haandi nimutaaliho neende Nasaae mu syaalo muno.

¹³ Nae bulaanu mu Kristo Yesu, eng'we hale abaandu bali eyale muno, mwasudisibwa aambi ohubitira mu mabaanga ka Kristo.

¹⁴ Olwohuba oyo niye omuleembe kweefwe, oyo owatuhola fweesi hwaaba esiindu silala, haandi yamala ohulikulira elalira esida sy'obusuku syali nisitukabuhaanie.

¹⁵ Yamalirao elalira amalako k'Esiyudaaya neende ebilagiro byako n'abitira mu mubiri kwae, hu yeemeo anyale ohweholeramo omweene abaandu bayaaha abali silala nae, hu mu ngeri nasilala eyo anyale ohutaao omuleembe,

¹⁶ haandi hwaanyale ohutusasaania neende Nasaae nihuli omubiri mulala ohubitira mu musalabba, abweene ao niyaakamisira elalira obusuku bwaliwo obwo.

¹⁷ Mani yaabayaalira omuleembe eng'we hale abali nimuli eyaale muno haandi yayaala omuleembe eyiri abo hale abali nibali aambi;

¹⁸ olwohuba ohubitira mu mweene oyo nilwo lu huba fweesi alala huba huchia ohunyoola obunyala bw'ohusuda aambi neende Seefwe nihuli mu Mwooyo mulala.

¹⁹ Mani sakira, eng'we haba simusisiiri abateende oba bawalukeenda, nae muli abeebulanwa alala neende aboolerefu, haandi muli abaandu bomu Nyuumba ya Nasaae,

²⁰ eyoombahwa hu musiingi kw'abatume neende abanabbi, Kristo Yesu mweene naali ekina lyomu soonda,

²¹ yi syoombahe syoosi syeyambaaniaho alala, haandi syemeeda ohuhulaanga nisyeehola Enyuumba ya Nasaae njoolerefu ohubitira mu Omwaami;

²² yi mwesi mwoombahirwamo ohuba obumenyo bwa Nasaae ohubitira mu Mwooyo.