Abaefeso 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ohutula eyiri Paulo, omutume wa Kristo Yesu, ohweema hu hudaha hwa Nasaae. Yichiire aboolerefu bali mu Efeso, abeesikwa mu bulamu bwaabwe nibuli alala neende Kristo Yesu:

² Embabaasi neende omuleembe bitula eyiri Nasaae Seefwe neende Omwaami Yesu Kristo bibe naang'we.

Ehabi cha Mwooyo echiri mu Kristo

³ Hweebase muno Nasaae haandi Laatang'ene Omwaami weefwe Yesu Kristo! Olwohuba ohubitira mu bulala bweefwe neende Kristo, yatuberesa ehabi, natuberesa ehabi cha buli ngeri echa Mwooyo chiri mu syaalo syo Muukulu.

⁴ Kata neende esyaalo nisyali nisitaloongwa, Nasaae yali niyamala ohutudoola hube abaandu bae ohubitira mu huba bulala neende Kristo, hu hunyale ohuba aboolerefu haandi abataaliho obubi bwoosi mu moni wae. Ohweema hu buheeri bwae

⁵ Yatutekehera ohuba mu buheeri, ohuba abaana bae ohubitira mu Yesu Kristo, ohweema hu sichiiririrwa sy'ohudaha hwae,

⁶ afumisibwe hulw'embabaasi chae ch'oluyaali, chi yatuberesera mu muheerwa wae.

⁷ Mu mweene oyo nimwo mu huli neende ohununulibwa ohubitira mu mabaanga kae, ohuleherwa ohw'ebyonoono byeefwe, ohweema hu buungi bw'embabaasi chae

⁸ chi yatusiindihira mu buungi muno.

⁹ Olwohuba yatubwiihulirao hwaamanya ohubitira mu makesi koosi, neende ohubaasa hwoosi, esyaama sy'ohudaha hwae, ohweema hu sichiiririrwa syae si yatuteera mu Kristo

¹⁰ koti endekeha y'esiha nisyahoole, ohumuwambaanisiramo ebiindu byoosi, ebiindu biri Muukulu neende ebiindu biri mu syaalo.

¹¹ Ebiindu byoosi biholwaanga ohweema hu ndekeha neende eheengao ya Nasaae; haandi Nasaae yatudoola ohuba abaandu bae beene mu bulala neende Kristo ohweema hu sichiriirirwa syae, ohweema hu ndekeha yae.

¹² Lehe efwe abachaaka ohweesika humenye mu bulamu bufumia haandi obuberesa Nasaae oluyaali.

¹³ Mu mweene oyo, eng'we mwesi, abamala ohuwulira emboosi y'obwadyeeri, Emboosi Ndai y'Obuwonia bweeng'we, haandi mani mwamala mwamufukiiriramo, mwamala ohufuundihirwa neende esisuubise sya Mwooyo Mwoolerefu,

¹⁴ oli esyomiisira elalira esuubi ly'ohunyoola obusiha bweefwe, ohwoola lu hulinyalira ohubunyoolera elalira, hulwohufumia oluyaali lwae.

Esaala ya Paulo

¹⁵ Mani ohweema hu sifune sino, olwohuba ndamala ohuwulira ebidiira hu fukiirira yeeng'we mu Omwaami Yesu neende hu buheeri bweeng'we eyiri baandu boolerefu boosi,

¹⁶ haba sindeheraangaho ohubeebasira Nasaae, nimbeechulisaanga mu hulaama hwaange hwoosi,

¹⁷ endi Nasaae w'Omwaami weefwe Yesu Kristo, Seefwe w'oluyaali, anyale ohubaberesa omwooyo w'amakesi, neende owohwiikulirwao mu humumanya hwae,

¹⁸ emoni ch'emyooyo kyeeng'we nichimalire ohwaamuuha, hu munyale ohumanya esuubi lihoyere lyeene li yabalaangira, neende engaanga yeene koti lu yiri ey'obusiha bw'oluyaali obuli mu boolerefu,

¹⁹ haandi neende koti lu buhunuufu bubitiirifu buli, obw'obunyala bwae buli mweefwe abafukiirira, ohweema hu huhola hw'obunyala bwae bukali muno

²⁰ bu yooseresera mu Kristo niyamusyuuhisa yaamutusa mu bafu, haandi yaamuhola yaanyala ohwiihala hu muhono kwae muluungi Muukulu,

²¹ obuli aakulu muno ohuhira obutuki bwoosi neende obunyala bwoosi, neende amaani koosi, neende obuhunuufu bwoosi, haandi neende aakulu ohuhira buli liita lyoosi elikulihwaanga, ataali mu ndaalo chino choong'ene, nae neende mu ndaalo chiichayo;

²² haandi yamala ohuta ebiindu byoosi aasi w'amakulu kae, haandi yamala ohumuhola ohuba omutwe kw'ebiindu byoosi, hulw'omukaanda kw'abafukiiriri boosi,

²³ okuli omubiri kwae, obwiichufu bwae owiichusira elalira byoosi mu byoosi.