2 Timoteo 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omulwaani mweesikwa wa Kristo Yesu

¹ Nae ewe, mwaana waange, ba neende amaani ka hwanyoola ohubitira mu mbabaasi cha Kristo Yesu.

² Bukula emboosi chi wawulira ninjekesa mu lwichuule lw'abaandu, mani ochidiise abaandu beesikwa, abacha ohunyala ohweekesa abaandu baandi bosi.

³ Nyoola omukabo kwao mu husaanda koti omulwaani wa Kristo Yesu mweesikwa.

⁴ Abulao omulwaani weyingisaanga mu bihole by'abaandu babuli ludaalo olwohuba adaha ohusangaasa omuhoongo wae omuberesa amalako kamutuka.

⁵ Mu ngeri nasilala eyo omwiiruhi okerana embiro saanyala hunyoola esirabo yesi n'ataloonda amalako k'ohwiiruha.

⁶ Omulimi oholere omulimo kw'amaani ahoyera ohunyoola omukabo kutaangira okw'ekesa.

⁷ Baasa hu biindu biindi ohuboolaanga, olwohuba Omwaami achia ohuhuhoonya omanye amahuluundu kabyo byoosi.

⁸ Yichulisa Yesu Kristo yi Nasaae yasyuhisa ohutula mu bafu, owali omwichuhulu wa Daudi. Yino niyo Emboosi Ndai yi njaala.

⁹ Olwohuba njaala Emboosi Ndai sakira bulaanu saanda haandi ndaboywa mu minyororo koti omuundu muhola-mbi muhoongo. Nae Emboosi ya Nasaae haba siyaboyebwa mu minyororo.

¹⁰ Mani sakira ngumira ebiindu byoosi hulw'obulai bw'abadoole ba Nasaae hu bosi banyale ohunyoola obuwonia buli Kristo Yesu alala neende oluyaali lutaakama.

¹¹ Yino nomanoma yadyeeri eyiboola yiti: Nihwafwa alala nae, fwesi huchia ohuba abalamu alala nae.

¹² Nihuchiiririra ohuguma ohusaanda fwesi huchia ohutuka alala nae. Nihumwekaana, yesi achia ohutwekaana.

¹³ Nihutaba abeesikwa, adoong'a naali omweesikwa sa olwohuba saanyala ohwekaana omweene.

Omuhalaabani osiimwa

¹⁴ Yichulisanga abaandu bao esiindu sino, haandi balabulire elalira mu moni wa Nasaae, oti sibahoyere ohuyiinganira ebidiira hu mboosi sa. Olwohuba abulao obuhoonyi bwoosi bu banyoola ohutusaho binyaasa sa ababiwulira.

¹⁵ Teemaho koti lu onyala ohusangaasa Nasaae, koti omuhalaabani yi soni chitadiira hulw'omulimo kwae, haandi koti omweekesa weekesa bulai Emboosi ya Nasaae yadyeeri.

¹⁶ Lehana neende embaha ch'obusiru chitahoonya, olwohuba chiirusira elalira abaandu ohutula hu Nasaae.

¹⁷ Enjekesa yifwana yityo yiri koti ehwaaku eyichiiririra ohulya enyama. Hamenesi neende Fileeto nibo abasaacha bali ohweekesa enjekesa yino.

¹⁸ Bano bamala ohuleha engira y'obwadyeeri, nae bulaanu bali ohudoondobania efukiirira y'abafukiiriri baandi nibaboola bati, ohusyuuha hw'abaandu hwamala ohubaao.

¹⁹ Nae omusiingi kw'amaani ku Nasaae yataawo haba sikunyala hudengaanisibwa; haandi chino nicho emboosi chi bakwandiikaho: “Omwaami amanyire abaandu bae” haandi “Abaandu boosi abelaanga ohuba ab'Omwaami bahoyere ohwakamira elalira ohwonoona.”

²⁰ Mu nyuumba hoongo mulimo amabbakuli neende ebiindu by'embya chikabuhaane; ebiindi byaholwa mu feesa, esaabbu, nae ebiindi by'embaao neende eloba; ebiindi byehoonyerwaanga hu miholo mihoongo, nae ebiindi nabyo byehoonyerwa buli ludaalo.

²¹ Omuundu yeesi niyenyirisa yetusaho ebiindu bibi ebyo, achia ohwehoonyerwa bilai, olwohuba aba yaawulibwa mani ali neende obuhoonyi eyiri Omwaami wae, naali omwetekefu ohwehoonyerwa hu mulimo mulai kwoong'ene.

²² Lehana neende obwekoombi bw'esiraaga, mani olwaanilire obuluungifu, efukiirira, obuheeri, neende omuleembe, alala neende abo abalaama Omwaami neende omwooyo mulai.

²³ Nae lehana neende ohuyingana hw'obusiru embaasa yitaalimo obuhoonyi; olwohuba omanyire oti ebiindu ebyo bileeta sa obusoolo.

²⁴ Omuhalaabani w'Omwaami haba s'ahoyere ohuba omuundu musoolani. Nae ahoyere ohuba ow'esisa eyiri abaandu boosi, Haandi ahoyere ohuba omuundu onyala ohweekesa bulai naali neende ohwesimiirisa,

²⁵ haandi okolola abamuyiingania neende obuloonga. Olwohuba si nyala ohuba siti Nasaae achia ohubaba ehabi y'ohwefunaka mani bamale bafukiirire obwadyeeri.

²⁶ Mani ao niwo abacha ohukoboleramo ebibaaso, mani baone omuteego kwa Sitaani okuba nikwabadiira, haandi okuba kwakera nibahola bi Sitaani adaha.