2 Timoteo 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ebbarwa yitula eyiri Paulo, omutume wa Kristo Yesu ohweema hu hudaha hwa Nasaae, owatumwa ohuyaala obulamu bwasuubiswa bu huli nabwo alala neende Kristo Yesu.

² Eyiri Timoteo, omwaana waange muheerwa: Lehe Nasaae Seefwe, neende Omwaami weefwe Yesu Kristo bahubeerese ehabi, embabaasi neende omuleembe.

Ohwebaasa neende ohugumya

³ Ndeebasa Nasaae yihalaabaniranga neende omwooyo mulala, koti lu bakuuka yaange bahola. Mweebasaanga buli lu hwiichulisa mu hulaama hwaange esiro neende esideete.

⁴ Ninjichulisa amasika kao, ndekoombaanga muno ohuhubonaho haandi, hu mwooyo kwaange kunyale ohwiichula esangaalo.

⁵ Njichulisa efukiirira yao nyomiifu, efukiirira yiri koti yi nguhwaao Loisi neende Yunisi maakoo bali nayo. Haandi nyomiisa endi wesi oli nayo.

⁶ Mani hulw'esifune sino, sakira hwiichulisa onyale ohuta mu hola esiyaanwa si Nasaae yahuberesa nindahwiisaho amahono.

⁷ Olwohuba Nasaae haba siyatuberesa mwooyo w'obuti, nae yatuberesa mwooyo w'amaani, ow'ohuheera, neende ow'ohweetuka.

⁸ Sakira otadirwaanga esoni ohutusiraanga Omwaami weefwe, haandi kata ohutusira ese omuhalaabani wae, omuboye hulwa Kristo. Ohutusaho, ba silala naange mu husaandira Emboosi Ndai, koti lu Nasaae ahuberesa amaani kahunyalisa.

⁹ Nasaae niye owatuwonia haandi yatulaanga hube abaandu bae, ataali ohweema hu siindu syoosi si hwahola, nae hulw'endekeha yae, neende embabaasi chae cheene. Yatuberesa embabaasi chino ohubitira mu Kristo Yesu, esyaalo nisisisiiri ohuloongwa.

¹⁰ Nae bulaanu situbwihuliirwe ohubitira mu hwiicha hw'Omuwonia weefwe, Kristo Yesu. Kristo Yesu yamalawo amaani k'ohufwa, mani yaleeta obulamu haandi ohubitira mu Mboosi Ndai, yatuleetera obulamu butaakama.

¹¹ Nasaae yaanduma ohuyaala Emboosi Ndai yino koti Omutume haandi Omweekesa.

¹² Sino nisyo esifune sikera ndasaanda endi. Nae kata katyo, siinjia hutya, olwohuba manyire oyo yindasuubiriramo haandi nyomiisa endi, achia ohuniinda bulai ohwoola lu Ludaalo olwo luchia ohwoolera.

¹³ Yomiirira hu mboosi chadyeeri chindahweekesa, koti esyohuboneraho syohoyere ohuloonda, haandi doong'a mu fukiirira neende mu buheeri bi hunyoola mu bulala neende Kristo Yesu.

¹⁴ Liinda ebiindu bilai bibahudiisa, niwehoonyera Mwooyo Mwoolerefu oli mweefwe.

¹⁵ Omanyire oti buli muundu yeesi oli mu situundu sya Asia kata Figeelo neende Hamogene baangabuhanaho.

¹⁶ Lehe Omwaami akwiire esisa enyuumba ya Onesiforo, olwohuba yasangaasa amahabi maangi muno haandi esoni sichamudiira kata nindali mu jeela.

¹⁷ Haandi niyoola sa ati mu Rooma, yangoonya ohwoola lu yanjakaana.

¹⁸ Lehe Omwaami amubeerese ehabi y'ohukwiirwa esisa sy'Omwaami hu Ludaalo olwo! Olwohuba omanyire bulai esiindu si yaholera ni ndi mu Efeso.