2 Samueli 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi neende Mefibboseti

¹ Ludaalo luundi, Daudi yateeba ati, “Mani yirihooyo oyo yeesi owadoong'a hoo ohutula mu daala lya Saulo? Nikali mbwe alihooyo, ese ndahire njekese omweene oyo esisa hulwa Yonatani.”

² Nae yaliwo omuhalaabani wuundi owali ow'edaala lya Saulo owali n'alaangwa mbwe Sibba. Oyo niye owaboolerwa ohuchia eyiri Daudi. Omutuki oyo yamuteeba ati, “Mbwe ewe niiwe Sibba?” Nae yamukobolamo ati, “Nduwo ohuhuhalaabanira, omuhuluundu.”

³ Haandi omutuki oyo yamuteeba ati, “Aliwo oyo yeesi owadoong'ao mu daala lya Saulo, yi ese nyala ndeekesa obutiiririrwa bwaange, neende esisa syaange, koti lu ndali nindasuubisa Nasaae endi njia ohuhola, kose?” Nae Sibba yamukobolamo ati, “Asisiiriyo mulala hu baana ba Yonatani. Mulema niye.”

⁴ Omutuki oyo haandi yateeba ati, “Nae ali yeena bweene?” Sibba haandi yamukobolamo ati, “Ali mu daala lya Makiri omwaana wa Amieli oli mu Lodebbari.”

⁵ Omutuki Daudi wuno yatuma ati bachie bamuleete.

⁶ Mefibboseti, omwaana wa Yonatani, haandi omwiichuhulu wa Saulo niyoola, yaguunama aasi mu moni wa Daudi neende obutiiririrwa. Nae Daudi yaboola ati, “Mefibboseti,” Nae yaamukobolamo ati, “Nduwo ohuhuhalaabanira, omuhuluundu.”

⁷ Daudi yesi yamukobolamo ati, “Otatya daawe. Ese njia ohuhweekesa esisa hulwa Yonatani lataao. Ese njia ohuhukobosera eloba lyoosi elyali elya Saulo kuukaao, nihaandi esiha syoosi oli omulehuule ohwiichaanga noolya naange hu sideru silala.”

⁸ Mefibboseti yaguunama aasi mani yaboola ati, “Ese koti luwuumbona oti siinjolaho kata hu mbwa yafwa hale, omuhuluundu! Nae lwasiina wumbereere omulai waakiire ano oti?”

⁹ Bulaanu omutuki oyo yalaanga Sibba, owali omuhalaabani wa Saulo oyo, mani yaboola ati, “Ese mbano ndi ohuberesaanga Mefibboseti, omwiichuhulu w'owali omuhoongo wao, buli siindu syoosi esyali esya Saulo neende edaala lyae.

¹⁰ Mani ewe, neende abaana bao boosi, alala neende abahalaabani bao boosi, muchia ohulimaanga eloba lino hulw'edaala lya Saulo omuhoongo wao, mani muleteenge ekesa lyoosi, libecheenge ebyohulya by'edaala lyeene elyo. Nae Mefibboseti mweene, achia ohubeechaanga omukeni waange esiha syoosi hu sideru syaange.” (Sibba yali naali neende abasyaani ehumi neende bataanu, haandi neende abahalaabani amahumi kabiri amalaamba.)

¹¹ Sibba yakobolamo ati, “Ese njia ohuhola buli siindu si Ewe ow'Obunyala olagiire.” Mefibboseti yalichaanga hu sideru sy'omutuki esyo, naali sa koti mulala hu basyaani ba omutuki oyo.

¹² Mefibboseti kata katyo, yali neende omwaana musyaani owali n'alaangwa mbwe, Miika. Abaandu boosi abomu daala lya Sibba beehola baaba sa koti abahalaabani ba Mefibboseti.

¹³ Kata katyo, Mefibboseti, owali niyalema amakulu koombi, yamenya mu Yerusalemu, n'aliraanga ebideru byae byoosi hu meesa ndala neende omutuki oyo.