2 Samueli 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esanduuku ly'Endagaano lileetwa mu Yerusalemu

¹ Haandi ehabi liindi, Daudi yalaanga yabuusa alala abasaacha balwaani bahirimo obulai mu Yisiraeli, mani boola obuungi bwa elifu amahumi kadatu (30,000),

² yabeemirira yabayira mu Bbaala mu Yuda, ohuchia ohukiinga Esanduuku ly'Endagaano balituse ebweene eyo, mani balileete, eliriho eliita ly'Omwaami w'Obunyala, yi sisaala sy'obutuki syae siri aakulu w'abakerubbi.

³ Bachia baalitusa mu daala lya Abbinadabbu hu sigulu, nibamala nibalita hu sigaari sy'efaraasi siyaaha. Wusa neende Ahio, abasyaani b'Abbinadabbu, nibali nibo abali ohwiirusaanga esigaari esyo,

⁴ Ahio naali ohukeenderaanga emberi.

⁵ Daudi alala neende Abaisiraeli boosi nabo bali nibali ohuhinaanga neende ohwembaanga neende amaani kaabwe koosi, nibeesa oluyaali mu Omwaami. Bali nibali ohuubbaannga obuhana, amaduungu, eng'oma, manyaanga, alala neende nyaangili.

⁶ Mani nibali mbwe huboola hu lwaanyi lw'ohuhubbakiraangaho lwa Nakoni, endaawu cheegumula, mani Wusa yeyeneeresa yadiiraho hu Sanduuku ly'Endagaano elyo.

⁷ Esiha syeene esyo, Omwaami Nasaae yanyoolerera Wusa muno mani yamwiitira abweene ao hulw'obutaali obutiiririrwa bwae. Wusa wuno yafwiira endulo w'Esanduuku ly'Endagaano elyo,

⁸ mani sakira abuundu ao yakulihwa mbwe Peresi Wusa ohutula hu ludaalo olwo. Daudi yalula muno olwohuba Omwaami yali n'asaandiise Wusa neende etima lyae.

⁹ Nibyoola ao Daudi yatya Omwaami oyo mani yaaboola ati, “Bulaanu, ese nyala endye ohuchia neende Esanduuku ly'Endagaano lino?”

¹⁰ Mani yaheengao ohuhaya ohuchia nalyo mu Yerusalemu; abuundu ao, yakabuha hu ngira, mani n'aliyira mu nyuumba ya Obbedi-Edomu, owali omwiibulanwa w'esiko sya Gaati.

¹¹ Lyadoong'a ao ohumala embaka y'emyoosi kidatu emilaamba, mani Omwaami yaberesa Obbedi-Edomu ehabi enyiingi muno alala neende edaala lyae lyoosi.

¹² Omutuki Daudi yawulira ati ohweema hu Sanduuku ly'Endagaano elyo, Omwaami yali naabereese Obbedi-Edomu alala neende edaala lyae lyoosi ehabi, alala neende ebiindu biindi byoosi bi yali ali nabyo; mani yaachia yaabukula Esanduuku ly'Endagaano elyo, yaalitusa mu nyuumba ya Obbedi oyo ati aliyire mu Yerusalemu neende omuholo muhunuufu muno.

¹³ Nae luunyuma lw'abasaacha bali nibakiingire Esanduuku ly'Endagaano elyo ohukeendaho amakulu kasaasaba koong'ene, Daudi yabeemesa mberi mani yayaanira Omwaami esiyaanwa esy'eng'oombe surusi, alala neende emoosi enginu.

¹⁴ Daudi, niyali niyefwaalire engubo y'elaasi yoong'ene ohwebodoohania esibuno, yahina neende amaani kae koosi ohuberesa Omwaami oluyaali.

¹⁵ Mani katyo, omweene oyo alala neende Abaisiraeli boosi baanyala ohuyira Esanduuku ly'Endagaano elyo ohwoola mu Yerusalemu neende engalaakasa ch'esaangaalo alala neende ohuubba hw'eturumbete.

¹⁶ Esanduuku elyo nilyali huliri ohwiingiswa mu siko, Mikaali, owali omuhaana wa Saulo, yalengeesera erwaanyi mu dirisa, yaanyala ohubona Omutuki Daudi naali ohuhina naduumakala mu mahina moolerefu, mani yaamusinyihira muno.

¹⁷ Kata katyo banyala ohuleeta Esanduuku elyo mani baalita abuundu walyo mu Yeema li Daudi yali yalyoombahira. Mani yaayaana ebiyaanwa, eby'obusaangirani eyiri Omwaami.

¹⁸ Mani niyali n'amalire ohuyaana ebiyaanwa ebyo, yaberesa abaandu ehabi mu liita ly'Omwaami w'Obunyala

¹⁹ mani haandi yaamala yaakabula abaandu boosi ebyohulya. Yanyala ohuberesaanga buli musaacha haandi neende buli muhasi mu Yisiraeli, omugaati, esidonye sy'enyama esaambe, alala neende ekeeki chiindi. Mani buli muundu yeweerao yeekobolera ewae.

²⁰ Luunyuma lw'ebyo, Daudi niyakobola engo wae ohuheesania neende ab'edaala lyae, Mikaali yatula erwaanyi ohumubukaanira mani yaboola ati, “Omutuki wuno yeholeere eliita ehunuufu enyaanga yino!” Haandi ati, “Yefunuule koti sa omuundu musiru omaliirihayo mu moni wa bahalaabani b'esihasi b'abahoongo bae!”

²¹ Daudi nae yakobolamo ati, “Ese mbeere nihinaanga ohuberesa Omwaami oluyaali, oyo owandoola yaaleha lataao neende ab'edaala lyae, mani yaahola syesi ndaaba omwiimirisi wa Yisiraeli abaandu bae. Mani haandi ese njia ohwemeeda sa ohuhinaanga endyo niimberesa Omwaami oluyaali,

²² ese njia ohwediisa esoni ohuhiraho neende ao. Ewe onyala ohubaasa oti ese ndi ebihaya byeene, nae abahasi abo bachia ohuumbukula ohuba ow'akulu muno!”

²³ Mani, Mikaali, omuhaana wa Saulo, haba siyeebulaho omwaana kata mulala ohwoola lu yafwiira.