2 Samueli 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi yeehaswa ohuba omutuki wa Yisiraeli neende Yuda

¹ Bulaanu enono choosi echa Yisiraeli chachia eyiri Daudi mu Hebburoni, mani chaamuboolera chiti, “Efwe huli ab'ohumubiri kwao kweene, haandi ab'amabaanga kao keene.

² Enyuma eyo, kata neende Saulo niyali n'asisiiri omutuki weefwe, ewe mweene weemirira abaandu ba Yisiraeli ohuchia ohulwaana ebiita, mani Omwaami yahusuubisa ati, ewe paka oliimiriraho abaandu bae, haandi obe omutuki waabwe.”

³ Sakira abeemirisi boosi aba Yisiraeli bachia eyiri Omutuki Daudi mu Hebburoni. Omweene yesi yahola obulala bwoolerefu nabo, baamuchuhaho amafuta, yeehola ohuba omutuki wa Yisiraeli.

⁴ Daudi wuno yali naali emyaaka amahumi kadatu amalaamba niyeehaswa ohuba omutuki, mani yaatuka hulw'embaka yiindi y'emyaaka amahumi kane amalaamba.

⁵ Yatukaanga Yuda naali mu Hebburoni, hulw'embaka y'emyaaka kitaanu-na-kibiri neende esituundu, haandi huyaachia mu Yerusalemu yi yanyala ohutukira Yisiraeli yoosi alala neende Yuda hulw'embaka y'emyaaka amahumi kadatu-na-kidatu emilaamba.

⁶ Bulaanu esiha syoola, si Mutuki Daudi wuno, alala neende abasaacha bae batula baachia ohuseeta Yerusalemu. Esiha syeene sino, Abayebbusi nibo abaandu bali nibamenya mu bweene omwo, mani nabo babaasa bati Daudi wuno haba siyali n'achia ohunyala ohuyiingira esiko sihuluundu sino daawe, mani baamuboolera bati, “Ewe haba s'ochia ohwiingiraho muno daawe; ewe kata sa abawofu neende abalema boong'ene, banyala ohuhwiirusa kata notoola aambi ano.”

⁷ (Nae kata katyo, Daudi yanyala ohuwaamba olukoba lwaabwe lwa Siyooni, mani esiko esyo syaamanyihana koti, “Yerusalemu.”)

⁸ Hu ludaalo lweene olwo, Daudi yaboolera abasaacha bae abo ati, “Ano aliwo hoo yeesi owasyuulaho Abayebbusi koti ese? Ohwoola ohubeeta? Muchie muniinire mu lwangaacha lw'amaachi luno museete abasaacha bateenyala balema haandi abawofu abo.” (Mani sakira silomwalomwaanga siti, “Abawofu neende abalema haba sibanyala ohwiingira mu nyuumba y'Omwaami daawe.)”

⁹ Mani nibamala ohuwaamba olukoba olwo, Daudi yamenya mu lweene olwo, mani yaalukuliha ati, “Yerusalemu.” Yoombahiraho esiko syalwebodoohania, ohuchaakira abuundu yali yechuswamo eloba hu lwaande lw'ebukwe w'esigulu esyo.

¹⁰ Mani yedinya ohuba neende amaani buli siha, olwohuba Omwaami Nasaae w'Obunyala yali ali nae.

¹¹ Omutuki Hiramu wa Tiiro yatumayo omukaanda kw'abaandu badaha ohuhola obuchurusi neende Daudi; yaamuyaanira ebituundu by'emiseengese, alala neende ababaachi b'embaao, haandi neende ababaachi b'amakina ohuchia bamwoombahire edooho.

¹² Mani katyo, Daudi yafuumbula ati hane Omwaami niye owali namwihaaseo ohuba omutuki wa Yisiraeli, haandi ati hane niye owali naahola obwaami bwae buno nibwemeeda ohuyiindiyala hulw'abaandu bae.

¹³ Luunyuma lw'ohutula mu Hebburoni neende ohuchia mu Yerusalemu, Daudi yachia yakiinga abahasi b'erwaanyi abahiraho neende abahasi bae beene obuungi, mani yeebula abaana basyaani abahiraho abaana bahaana obuungi.

¹⁴ Mani abaana baloondaho bano, nibo abeebulirwa mu Yerusalemu: Samua, Sobbabbu, Natani, Solomooni,

¹⁵ Yibbihaari, Elisua, Nefegi, Yafia,

¹⁶ Elisaama, Eliada, neende Elifeleti.

Ohuyiingira Abafilisiti

¹⁷ Bulaanu, Abafilisiti baboolerwa mbwe Daudi yali n'amalire ohwiihaswa ohuba omutuki wa Yisiraeli, mani amaye kaabwe keetekeha kaatula ohuchia ohumuwaamba. Nae Daudi niyawulira atyo, yasiingira mani yaachia abuundu yaliindwa neende olukoba.

¹⁸ Abafilisiti bano boola mu Hoondo ya Refaimu mani beehala mu bweene omwo.

¹⁹ Daudi nae yachia mani yeteeba hu Omwaami ati, “Mani ese njie seete Abafilisiti bano kose? Oba ochia ohunyalira nyiingire kose haba?” “Eee, ewe seeta-buseeta!” Omwaami yamukobolamo atyo. Haandi yamuboolera ati, “Ese njia ohuhunyalira oyiingire!”

²⁰ Mani katyo, Daudi yachia mu Bbaali Perasiimu, ebweene eyo niyo yi yayiingirira Abafilisiti abo. Yaboola ati, “Omwaami abitiirisaanie mu basuku baange koti amaachi k'ofwomboole.” Sakira abuundu ao alaangwa ati “Bbaali Perasiimu.”

²¹ Mani Abafilisiti abo beeruha baawaao, baeleha enyuma ebiloongaloongwe byaabwe, Daudi alala neende abasaacha bae baabikiinga beweerao nabyo.

²² Abafilisiti bano bakobolayo mu Hoondo ya Refaimu, mani beehala mu bweene omwo haandi.

²³ Haandi ehabi liindi, Daudi yachia yeteebaho hu Omwaami, mani Omwaami oyo yaamukobolamo ati, “Ewe otabaseeta nootulira ano bweene daawe, ohutusaho chia mani webodoohanie emukoongo eyo mani weetekehe ohuseeta nootulira hu lwaande luundi lula, aambi neende omusaala kwa Bbalisaamu.

²⁴ Noochia ohuwulira ekono ly'ohuhuumba niliri aakulu w'emisaala ekyo, ao niwo yi muba muchia mwesi ohuseetera, olwohuba ese mweene syesi ndaba nihuumbira mu moni weeng'we ohuchia ohuyiingira eye ly'Abafilisiti.”

²⁵ Daudi yahola sa koti lu Omwaami yali naamulagiire, yaanyala ohwiirusa Abafilisiti baakobola enyuma nibatula mu Gebba, ohwoola mu Geseri.