2 Samueli 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi abala abaandu

¹ Hu habi liindi, Omwaami yanyoolerera Yisiraeli, mani yaahola Daudi yaabaleetaho ebidinyu. Omwaami yamuboolera ati, “Ewe chia mani obale abaandu ba Yisiraeli neende Yuda.”

² Mani Daudi yatusa elako eyiri Yoabbu, omuhoongo wa eye lyae ati: “Ewe chia neende abahoongo bao mu nono choosi echia Yisiraeli ohutulira elalira hu njakamo y'esyaalo sino, ohwoola hu yiindi, mani obale abaandu. Ese ndaha ohumanya endi balimo baanga.”

³ Nae Yoabbu yamukobolamo ati, “Ow'Oluyaali, Omwaami Nasaae wao ahoya yaahola abaandu ba Yisiraeli amahabi emia ndala obuungi ohuhiraho koti lu bali bulaanu, nae ewe ohoya wabaao omulamu ohwoola lu olibona n'asihola atyo. Nae ni liina, ewe ow'Oluyaali, odaha ohuholeramo sino?”

⁴ Nae omutuki oyo yahola Yoabbu neende abahoongo bae bakanye ohwiisa oluyaali mu malako kae; batula mu moni wae mani baachia erwaanyi ohubala abaandu ba Yisiraeli.

⁵ Bachia baambuha Yorodaani mani baamala boombaha ekaambi emwaalo wa Aroeri, esiko siri akatikaati w'ehooho, mu syaalo sya Gaadi. Nibatula eyo, bachia baaniina emukulu mu Yaseeri,

⁶ mani haandi bemeeda baachia mu Gileadi, haandi mani mu Kadesi, mu syaalo sy'Abahiiti. Bachia mu Daani, haandi ohutula mu Daani baachia emuumbo mu Sidoni.

⁷ Mani haandi beeha emwaalo mu siko sya Tiiro esyabodoohanwa olukaka, haandi mu biko byoosi eby'Abahiifi haandi neende Abakanani, mani muhumaliirisa, boola mu Bberisebba, mu situundu sy'emwaalo wa Yuda.

⁸ Mani luunyuma lw'emyoosi kitaanu-na-kine, neende endaalo amahumi kabiri bakobola mu Yerusalemu, nibamalire ohukeenda baamalaho esyaalo esyo syoosi.

⁹ Baboolera omutuki oyo obuungi bw'abasaacha banyala obuhalaabani bw'amaye bati: elifu emia chitaanu-na-chidatu (800,000) mu Yisiraeli neende elifu emia chitaanu (500,000) mu Yuda.

¹⁰ Nae luunyuma lwa Daudi ohuba niyali n'amalire ohubala abaandu, ebibaaso byae byachaaka ohumuchuuna, mani yaboolera Omwaami ati, “Ese mbano holere esyonoono syamatiichasi mu huhola esiindu sino! Nookanya, ndehere. Holere esiindu sy'obusiru syeene.”

¹¹ Mani Daudi niyasimuha nibuhyeere, emboosi y'Omwaami hu Gaadi omunabbi, haandi owali omunabbi wa Daudi niyiboola yiti,

¹² “Ewe chia mani oboolere Daudi oti, ‘Omwaami aboola ati, ebiindu bidatu nibyo biihuberesa odooleho silala syoong'ene, syooba noodaha oti huholere.’ ”

¹³ Mani Gaadi yachia yaali yaamuboolera bi Omwaami yali n'amuboleere, mani yateeba ati, “Siina syeene esihoyere ohubaao? Emyaaka kidatu eky'enjala mu syaalo syao muno, oba emyoosi kidatu eky'ohwiiruhiramo ohutula hu basuku bao, oba endaalo chidatu ech'oluumbe mu syaalo syao muno? Bulaanu, ewe sibaaseho haandi buyaaha, mani omale wumboolere ekaluso ly'ohukoboserayo Omwaami.”

¹⁴ Nae Daudi yakobolamo ati, “Ese ndi mu bulamu obutaliindirisa daawe! Nae ese haba siindaha ohusaandisibwa neende abaandu sa. Leha Omwaami mweene niye oba abe oyo ochia ohutusaandya, olwohuba oyo w'esisa niye.”

¹⁵ Mani, Omwaami yatuma oluumbe hu Yisiraeli yoosi, olwabaao ohutulira elalira echuli ohwoola hu biha bi yali omweene nadoolereo. Ohutulira elalira hu njaakamo y'esyaalo ndala ohwoola hu yiindi, mani Abaisiraeli elifu amahumi kataanu-na-kabiri (70,000) baafwa.

¹⁶ Nae malaika w'Omwaami niyali naali aambi ohuchaaka ohusihirisa Yerusalemu, Omwaami yakaluuhania ebibaaso byae, ohutula hu husaandya abaandu, mani yaboolera malaika wali naali niye oli ohubetaanga ati, “Yakama! Esyo simala!” Malaika oyo yali naali mu syuubbakiro sy'Arauna, Omuyebbusi.

¹⁷ Daudi yabona malaika wali naali ohwitaanga abaandu, mani n'aboolera Omwaami ati, “Ese niise omusobya syeeng'ene. Ese niise owahola esiindu sitahoyera daawe. Mani siina syeene si baandu batanyala ohwehoonya abeene bano baholere? Mani ewe ohoyere ohusaandya ese neende edaala lyaange fweeng'ene.”

¹⁸ Mani ludaalo lweene olwo, Gaadi yachia eyiri Daudi mani yaamuboolera ati, “Ewe chia abuundu w'ohuubbakiranga wa Arauna, mani omale woombahe alutaari eyiri Omwaami.”

¹⁹ Daudi yafukiirira elako ly'Omwaami mani naachia nga lu Gaadi yali naamuboolere.

²⁰ Arauna nae yatingaala aasi mani naabona omutuki alala neende abahoongo bae nibaniina yaali. Yehubba aasi, mu moni wa Daudi;

²¹ mani yamuteeba ati, “Ewe ow'Oluyaali, siina syeene esikera nooba nooli ano?” Daudi nae yakobolamo ati, “Ohukula abuundu wohuubbakirwaangao mani male nyombaheyo alutaari ey'Omwaami, hu hunyale ohwaakamia oluumbe luno.”

²² Arauna nae yaboola ati, “Siyire sa, Ewe ow'Oluyaali,” “mani omale oyaanire Omwaami esyo syoosi syooba noodaha. Ano mbano huliwo neende endaau ech'ohusaamba koti esiyaanwa hu alutaari eyo; ano mbano huli neende amakoombo kachio, haandi neende omuhubbakiro kw'ohwehoonyera koti eehwi.”

²³ Arauna yaberesa omutuki oyo abuundu ao woosi mani naamala naamuboolera ati, “Omwaami Nasaae wao, ahoya yaafukiirira esiyaanwa syao.”

²⁴ Nae omutuki oyo yakobolamo ati, “Haba, ese njia ohukula abuundu ao sa. Ese haba siinjia ohuyaana eyiri Omwaami Nasaae waange ebiyaanwa biitatungiireho esiindu syoosi daawe.” Yakula abuundu wohuubbakirwaangao, haandi neende endaawu hulw'ebituundu by'efeesa amahumi kataanu.

²⁵ Mani yoombahira Omwaami alutaari, haandi n'ayaana ebiyaanwa bisaambwa, haandi neende ebiyaanwa by'obusaangirani. Omwaami yakobolamo amasaayo kae, mani oluumbe lwali mu Yisiraeli yoosi niluwa.