2 Samueli 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obujeemu bwa Seebba

¹ Yabaayo mu Giligaali omuundu otaali neende ebiima bilai olaangwa mbwe Seebba omwaana wa Bbikiri, ow'enono ya Bbenjamini. Yadiira eturumbete mani yaachaaka ohuubba niyehuuma ati, “Daudi akwe! Efwe haba sihuchia ohuloondakana nae daawe! Eng'we abasaacha ba Yisiraeli, mulehe hukoboleyo engo!”

² Mani Abaisiraeli batula hu Daudi baachia neende Seebba, nae abasaacha ba Yuda nabo badoong'a sa nibeesa oluyaali mu Daudi haandi nibaloondakana nae ohutulira elalira hu Yorodaani ohwoola mu Yerusalemu.

³ Daudi niyoola mu dooho lyae, elyali mu Yerusalemu, yabukula abahasi bae b'erwaanyi ehumi bala, ba yali niyaleha ohuliindaanga edooho elyo, mani naabata aasi w'obuliindi bw'amaani. Yachaaka ohubaberesaanga buli siindu sibadahaanga, nae haba siyeyalisaanga nabo daawe. Baliindwa muno obulamu bwaabwe bwoosi ohwoola lu bwaakamaanga, nibamenya koti abafwiirwe beene.

⁴ Omutuki oyo yaboola ati, “Chia mulaange abasaacha ba Yuda boosi beehuung'aanie alala mani okobole nabo bwaangu ano nabo oludaalo luloonda hu muchuli.”

⁵ Amasa yachia ohubalaanga, nae haba siyanyala ohukobolera mu biha bi mutuki yali naamuboleere ohukoboleramo.

⁶ Omutuki oyo yaboolera Abbisai ati, “Hane Seebba wuno achia ohuhuba ebidinyu ohuhiraho neende Abbusalomu. Bukula abasaacha baange bano, omuloondeho, ataali ao, anyala ohuchia yeengisa mu biko byasitwa bulai mani yatwiiruhaho.”

⁷ Abasaacha ba Yoabbu, abali nibali abaliindi bae abali nibamwiisamo oluyaali, alala neende abalwaani baandi boosi, batula mu Yerusalemu nibali alala neende Abbisai ohuchia ohwoonga hu Seebba.

⁸ Niboola hu lwaanda luhoongo muno mu Gibbeoni, Amasa yababukaana. Yoabbu yali niyefwaliire elalira koti ochia mu biita, naali neende olugaanga mu silaalo syalwo niluboyerwe hu luhoba lwae. Niyali naatulayo sa ati, ehaande lyasoboha mani lyaakwa aasi.

⁹ Yoabbu yaboolera Amasa ati, “Oliyo otye omwiicha waange?” Yamudiira esirefu neende omuhono kwae muluungi hu anyale ohumukwa mu sirifu.

¹⁰ Amasa wuno nae haba siyali niyeliindire olugaanga lu Yoabbu yali n'adiinire mu muhono kuundi, mani Yoabbu n'amuhubba ehaande mu mala, mani ebyomuunda byae byoosi nibiicha nibibbwomooha erwaanyi nibikwa hu loba. Yafwiira abweene ao, mani byaahaya Yoabbu engeri yiyahanyala ohwemeeda ohumuboosoleramo neende ehaande. Yoabbu alala neende Abbisai mwanaang'ina bemeeda ohuwaao nibabita mu Seebba.

¹¹ Mulala hu basaacha ba Yoabbu yeema aambi neende omulaambo kwa Amasa mani naamala niyehuuma n'aboola ati, “Buli oyo yeesi oli hu lubeka lwa Yoabbu neende Daudi, aloonde hu Yoabbu!”

¹² Mani omulaambo kw'Amaasa nikwali nikweedubire amabaanga, kwadoong'a nikukwiire akatikaati w'engira. Nae omusaacha wa Yoabbu mulala niyabona ati buli muundu obita ali ohweemaanga ali omulaambo okwo, yakudiira yakuhwehweesa naakutusa hu ngira mani n'achia naakusukuna mu siino mani naamala nakubwiihaho ebburungete.

¹³ Luunyuma lw'omulaambo okwo ohutuswa hu ngira, buli muundu yachaaka ohuloondaanga Yoabbu niboongere hu Seebba.

¹⁴ Seebba nae yachia yaahalakania mu syaalo sy'enono choosi echa Yisiraeli, naamala niyoola mu siko sya Abbeli-Bbeti-Maaka, mani abanaluyia boosi ab'enono ya Bbikiri bebuusa alala mani nibamuloondaho nibeengisania nae mu siko omwo.

¹⁵ Abaandu ba Yoabbu bawulira bati hane Seebba yali naali mu bweene omwo, mani nibachia nibadiira esiko esyo. Boombahira hu sida sy'erwaanyi sy'esiko esyo emibuumbi ky'eloba, haandi nibachaaka ohuyaba nibasohona aasi w'esida syeene esyo, mbwe hu sinyale ohukwa.

¹⁶ Nae yaliwo omuhasi mukesikesi mu siko omwo, owachaaka ohwehuumiraanga aakulu w'esida esyo n'aboola ati, “Tekeereseho! Eng'we mutekeereseho! Boolere Yoabbu yeechere abweene ano; Ese nyenya ohulomalomaho nae mberi.”

¹⁷ Yoabbu yesi yachia abweene ao mani omuhasi oyo yaamuteeba ati, “Mani ewe niiwe Yoabbu mweene, kose?” Nae yamukobolamo ati, “Eee, niise.” Omuhasi oyo nae yaboola ati, “Omuhuluundu taangira wundekeereseho mberi.” Nae Yoabbu yamukobolamo ati, “Ngaandi ese mbano hutekereese.”

¹⁸ Omuhasi oyo haandi yaboola ati, “Hale-na-ahaandi, abaandu babolaanga bati, ‘Ewe chia mani onyoole esikobolamo mu siko sya Abbeli’ mani batyo nilwo lu baandu abo baholaanga sa.

¹⁹ Esiko sino sihunuufu nisyo, haandi siri silala hu biko by'omuleembe, haandi ebiisa oluyaali mu Yisiraeli. Siina syeene esikera ewe noodaha ohusinyaasa? Oli ohudaha ohusihirisa ebiindu by'Omwaami, kose?”

²⁰ Yoabbu nae yakobolamo ati, “Haba! Ese haba siinjia ohusihirisa oba kata ohunyaasaho esiko syeeng'we sino daawe!

²¹ Eyo haba siniyo endekeha yeefwe daawe. Omusaacha olaangwa mbwe Seebba omwaana wa Bbikiri, owatula mu syaalo sy'ebigulu sya Efuraimu, niye owachaakisa ohujeemera Omutuki Daudi. Mutuberese omuundu mulala wuno yeeng'ene, mani mba njia ohutula mu siko muno.” Nae omuhasi oyo yaboola ati, “Efwe huchia sa ohuhulakasira omutwe kwae ohutulira aakulu w'esida sino.”

²² Yachia eyiri abaandu bamenya mu siko omwo neende endekeha yae yino, nibaheenga hu Seebba omutwe, nibamala nibakusukunira Yoabbu ohutulira aakulu w'esida. Yoobba eturumbete koti ahalolero eyiri abasaacha bae batule hu siko ohwo, mani baakobola engo waabwe. Yoabbu yekobolera mu Yerusalemu eyiri omutuki.

Abahunuufu ba Daudi

²³ Yoabbu yali naali niye omwiimirisi w'eye lya Yisiraeli; Bbenaya omwaana wa Yehoyada nae yali owiimirira abaliindi ba Daudi;

²⁴ Adoniramu yali owiimirira abahalaabani bayiikwa; Yehosafati omwaana wa Ahiluudi yali owiimirira neende ohwandikaanga ebikwiireo;

²⁵ Sefa nae yali omwandiiki womu siina; Sadoki neende Abbiataari bali nibo abalaamisi,

²⁶ nae Yira ohutula mu siko sya Yairi yesi yali mulala hu balaamisi ba Daudi.