2 Samueli 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abbusalomu ayiingirwa haandi yeetwa

¹ Omutuki Daudi yahung'aania abasaacha bae boosi alala, mani naamala naabakabuhaniamo emikaanda midiidi-diidi ekya buli kutula nikulimo abasaacha elifu ndala (1,000), ekiindi nikirimo abasaacha emia, mani naamala naabataaho abahoongo bakiimirira.

² Mani naamala naabatuma mu mikaanda kidatu emihoongo, neende Yoabbu neende Abbisai mwanaang'ina Yoabbu, haandi neende Yitai ohutula mu Gaati, buli otula niyemiriire omukaanda mulala-mulala. Mani omutuki oyo naaboolera abasaacha bae abo ati, “Ese syesi omweene njia ohuchiaana naang'we.”

³ Bosi bamukobolamo bati, “Ewe haba sohoyere ohuchia alala naafwe daawe.” Haandi nibameedaho bati, “Haba sisicha huba esy'engabuhania ehoongo muno eyiri omusuku weefwe oyo kata efwe fweesi nihukaluuhana mani hweeruha, oba kata esituundu syeefwe syoosi nisyoola syeetwa; nae ewe ohira kata efwe elifu ehumi. Syahabeere esilai sihiramo ewe nodoong'a sa ano mu siko muno, ohututumiraanga sa obuhoonyi nibwiicha yi huli.”

⁴ Omutuki oyo nae yabakobolamo ati, “Ese mani lehe hole esyo syoosi si muba nimubaasa muti nisyo esihiramo obulai.” Mani yeema endulo w'esiruwa koti abasaacha bae bali nibahuumba nibatula mu siko nibali mu mikaanda kya elifu ndala, nae ekiindi nikiri ekya emia ndala.

⁵ Yaberesa Yoabbu, Abbisai, alala neende Yitai elako n'aboola ati, “Hulwaange, ese omweene, mbekweeda mutanyaalaho Abbusalomu omwaana musyaani muyere oyo daawe.” Haandi abalwaana abo boosi bawulira Daudi mweene naatusa elako lino, n'aliberesa abasaacha bahoongo bae.

⁶ Eye lya Daudi lyosi lyatula lyaachia lyaweera mu ngoongo, mani nililwaania Abaisiraeli abali nibali mu Sichaha sya Efuraimu.

⁷ Abaisiraeli bano bayiingirwa neende abasaacha ba Daudi; ohuyiingira hubitiirifu hweene, ohwalimo abasaacha elifu amahumi kabiri (20,000) abeetwa ludaalo lweene olwo.

⁸ Ohulwaanakana ohwo hwalaandaala hwaamala engoongo choosi, mani abasaacha abaangi bafwiira sa mu sichaha kata ohuhiraho neende abo abeeterwa mu biita byeene.

⁹ Abweene ao, Abbusalomu yeduuyanaho neende abasaacha ba Daudi baandi. Abbusalomu mweene oyo yali naali ohwiiruhiraanga hu suhiri, mani niyali hu yeyindikania niyibita aasi w'omutuumba muhoongo kwatabaala amasaga, omutwe kw'Abbusalomu kweesaga mu masaga. Esuhiri eyo nayo niyemeeda sa ohwiiruha niyiwaao, Abbusalomu nae yaalehwa nadeembera mu masaga mu miyaka.

¹⁰ Nae omusaacha mulala hu basaacha ba Daudi yanyala ohumubona mani n'aboolera Yoabbu ati, “Ewe omuhuluundu, ese mbweene Abbusalomu n'alereechera mu masaga k'omutuumba muhoongo!”

¹¹ Nae Yoabbu yakobolamo sa ati, “Ewe nikali mbwe omubweeneho, lwasiina mani somwitiire sa abweene ao? Ese mweene yoobona wuno, mba nyalire ohuhwebeera omweene ebituundu by'efeesa ehumi ebilaamba, alala neende oluhoba lwaange lweene luno.”

¹² Nae omusaacha oyo yakobolamo ati, “Ewe kata neende nooba noonyalire ohuumberesa ebituundu by'efeesa elifu enaamba, haba kata sindahanyalire ohusiingisira hu mwaana w'omutuki weefwe oyo kata olwaala lulala lwoong'ene daawe. Ngaandi efwe fweesi hubeere nihuwuliire omutuki naahulagira ewe mweene, Abbisai neende Yitai ati, ‘Hulwaange ese omweene, mutateemaho kata budiidi ohunyaala Abbusalomu omwaana musyaani muyere oyo.’

¹³ Mani ese naange niimba ninjemeere omutuki waange oyo mani ndeeta Abbusalomu, omutuki oyo aba yahasiwuliire olwohuba oyo nae awuliraanga buli siindu syoosi haandi ewe mweene haba siwahanyalire kata ohuungaya omusaango okwo daawe.”

¹⁴ Yoabbu nae yaboola ati, “Ese haba siinja ohunyaasaho ebiha biindi byoosi ninyiinganaanga naawe daawe.” Mani yaabukula amafumo kadatu amalaamba yaakabbaaya yaakamalira mu sirifu sy'Abbusalomu n'asisiiri omulamu omweene naabona neende emoni chae, naalereechera mu masaga k'omutuumba.

¹⁵ Abweene ao mani abasaacha balwaani ba Yoabbu ehumi abalaamba baweera hu Abbusalomu mani nibamaliirisa ohumwiita.

¹⁶ Byayika sa Yoabbu ohuubba eturumbete hu naanyala ohwaakamya ohulwaana, mani abalwaani bae boosi nibakobolayo engo nibalehera ao ohwiiruhania Abaisiraeli.

¹⁷ Babukula omubiri kw'Abbusalomu, mani baakusukuna mu buko buleeyi muno mu sichaha, haandi nibakubbiibaho esituuli esihoongo muno esy'amakina. Abaisiraeli boosi beeyiruhira beweerao mu biko by'engo waabwe.

¹⁸ Niyali n'asisiiri omulamu, Abbusalomu yali niyeloongera esiloongaloongwe syae omweene mu Hoondo ly'Omutuki, olwohuba haba siyali niyeebulaho omwaana musyaani owohuchiiririsaanga eliita lyae daawe. Sakira yali niyasikuliha eliita lyae lyeene, mani ohwoola endaalo chino, sisyeekeswaanga koti Esiloongaloongwe sy'Abbusalomu.

Daudi abihirwa ohufwa hwa Abbusalomu

¹⁹ Ahimaasi, omwaana wa Sadoki n'aboolera Yoabbu ati, “Ewe leha ese njiruhe mani njie eyiri omutuki weefwe neende amakeni malai kano mbwe Omwaami amalire hale ohumuwonia ohutula hu basuku bae boosi.”

²⁰ Yoabbu nae yaboola ati, “Nyaanga yino ewe haba soochia ohuyirayo amakeni malai daawe. Nae awuundi hu ludaalo luundi nilwo lu ochia ohuholera otyo, nae enyaanga yino haba daawe, olwohuba omwaana w'omutuki mweene niye ofwiire.”

²¹ Yaboolera omuwaambe wae Omuitiopia ati, “Ewe niiwe oba ochie mani oboolere omutuki weefwe omweene byoobweene bino.” Omwaambe oyo yeenama aasi, mani yaamala yeeruha yeweerao.

²² Nae Ahimaasi yemeeda sa ohwesiisinia n'aboola ati, “Ese haba sifwaayo esyo syoosi esichia ohubaao; nookanya leha sa ese mweene njie syesi nyale ohuyira amakeni ako.” Yoabbu yesi yemeeda ohumuteeba ati, “Siina syeene esikera ewe mweene wesi waadaha ohuhola otyo, musyaaning'ene. Ewe haba soochia ohunyooleraho esiyaanwa syoosi daawe.”

²³ Haandi Ahimaasi yaboola sa ati, “Kata siina syeene sibeeo, ese ndaha sa ohuchia.” Yoabbu ao bulaanu yaboola sa ati, “Mani ewe wechiire.” Ahimaasi yatimuha embiro yeweerao niyeehirira neende engira yihalakania mu Hoondo lya Yorodaani, mani bwaangu bweene yaanyala ohubita mu muwaambe oyo.

²⁴ Daudi nae esiha esyo yali niyeeyihaliire akatikaati w'esiruwa syomuukati neende esiruwa sy'erwaanyi, eby'esiko esyo. Omutingaali yaniina aakulu bweene w'esida niyeemere hu sirama sy'engira yichia ena siruwa; yaasiingisa emoni mani yaabona omusaacha niyeeruha yeeng'ene.

²⁵ Yehuuma yaboolera omutuki oyo owali naali aasi, nae omutuki n'aboola sa ati, “Nikali mbwe oyo ali yeeng'ene, mani aba ali ohuleeta amakeni malai.” Omwiiruhi oyo yemeeda sa ohusuda aambi.

²⁶ Omutingaali oyo haandi yasiingisa emoni chae aakulu mani yaabona omusaacha wuundi naali ohwiiruhaanga yeeng'ene niyeecha, haandi n'ahuumula omuliindi w'esiruwa owali aasi ati, “Ewe bonaho! Haandi yiriyo omusaacha wuundi oli ohwiiruha yesi niyeecha!” Nae haandi omutuki oyo yakobolamo sa ati, “Haandi sa owuundi oyo yesi ali ohuleeta amakeni malai.”

²⁷ Omutingaali oyo haandi yaboola ati, “Ese ngaandi ndi ohubona endi omusaacha otangiiremo wula ali ohwiiruha sa koti Ahimaasi.” Omutuki nae yaboola ati, “Naali oyo, musaacha mulai niye, mani ali ohuleeta amakeni malai.”

²⁸ Ahimaasi niyoola yehuuma naheesa omutuki oyo, niyehubba aasi hu buloba mu moni wae, yaboola ati, “Omwaami Nasaae wao afumisibwe, oyo ohubereese ohuyiingira omusaacha yali niyahujeemera, Ewe ow'Obunyala!”

²⁹ Omutuki nae yamuteeba sa ati, “Ewe, Abbusalomu omwaana muyere oyo ali abweene, kose?” Nae Ahimaasi yakobolamo ati, “Omuhuluundu, esiha si omuhoongo wao oyo Yoabbu yaandumiiremo ohwiicha yooli, mbweene naaliwo ohusaanguluha ohuungi, nae ese haba simbeere nimanyire esibeere nisiri ohuholehana daawe.”

³⁰ Omutuki yamuboolera ati, “Ewe yema eyale naange.” Yesi niyeseenda niyeemaho eyale nae.

³¹ Abweene ao Omuitiopia muwaambe yesi niyoola n'aboolera omutuki ati, “Ese ndi sa neende amakeni malai eyiri Ewe ow'Oluyaali! Nyaanga yino, Omwaami amalire ohuhuberesa ohuyiingira abo boosi abali nibahujeemera!”

³² Nae omutuki niyamuboolera ati, “Ewe, mani Abbusalomu omusyaani muyere oyo ali abweene, kose?” Nae omuwaambe oyo yakobolamo ati, “Ese naange ndekoomba sa endi esimweeholehaaneho biba nibinyaliha esyeene esyo syosi syahaholehaane hu abasuku bao boosi, omuhuluundu, haandi neende hu abo boosi abachia ohuhujeemeraanga.”

³³ Omutuki oyo abweene ao yayiingirwa neende esibeera. Yasiingira mani yaniina aakulu mu siseenge syali nisiri aakulu w'engira yichia ena siruwa mani n'alira muno. Koti lu yali n'akeenda n'aniina ebweene eyo yalichiingi n'alira ati, “Wuuwi Omwaana waange! Abbusalomu omwaana waange! Ewe Abbusalomu, omwaana waange mweene! Biba mbwe ese mweene niise ofwiire mu bweyaango bwao, ewe omwaana waange! Abbusalomu, Omwaana waange mweene!”