2 Samueli 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Husaai abachirisa Abbusalomu

¹ Esiha nisyali nisitaabitao esihoongo muno luunyuma lw'ebyo ohubaao, Ahitofeeli yaboolera Abbusalomu ati, “Leha ese ndoole abasaacha elifu ehumi neende chibiri (12,000), mani muchuli ndule njie noonde hu Daudi.

² Njia ohumuseeta n'ajoong'ere haandi nasinyiihe. Achia ohutya, mani abasaacha bae boosi bachia ohwiiruha baweeo. Mba njia ohwiita omutuki

³ haandi ndeete abasaacha bae boosi yooli, koti omweeya muhasi naakobola eyiri wamwe. Ewe mbao odaha ohwiita omusaacha mulala yeeng'ene, nae abaandu badoong'ereo boosi baba bachia ohuba mu muleembe.”

⁴ Yino yabonehana koti engeraka endai eyiri Abbusalomu, haandi neende eyiri abeemirisi Abaisiraeli boosi.

⁵ Abbusalomu haandi yaboola ati, “Bulaanu ewe laangaho Husaai yeeche, mani olehe huwulireho syaaba n'adaha ohuboolaho.”

⁶ Husaai niyoola yi bali, Abbusalomu yamuboolera ati, “Yino niyo engeraka yi Ahitofeeli atubereese; hu yiloonde kose? Nihutahola hutyo, ewe tuboolereho esiindu sihuba huhole.”

⁷ Husaai nae yakobolamo ati, “Engeraka yino yi Ahitofeeli ababereese ehabi lino haba sindai daawe.

⁸ Ewe omanyire bulai bweene oti Daudi lataao alala neende abasaacha bae balwaani bajiing'u nibo, nihaandi abeene abo baalaba sa koti enani ehasi linyuulirwe abaana balyo. Lataao oyo mulwaani mumanyirifu muno, haandi sabeechaanga abuundu alala neende abasaacha bae abo esiro daawe.

⁹ Awuundi ebiha bino anyala ohuba niyeekisire mu ng'uungu, oba abuundu waandi ataamanyihaane daawe. Daudi n'aseeta ati abasaacha bao, oyo yeesi oba anasiwulira aba achia ohuboola sa ati ngaandi abasaacha bao abo mbao bamalire ohuyiingirwa luweere.

¹⁰ Kata abasaacha bahiramo obululu, abataalimo amatiichasi koti edalang'i, baba bachia ohutya-butya olwohuba buli muundu yeesi oli mu Yisiraeli amanyire sa bulai bweene ati, lataao oyo mulwaani muhunuufu, haandi ati abasaacha bae bosi balwaani baangalafu muno.

¹¹ Ekerako lyaange liri liti, ewe chia oleete Abaisiraeli boosi bebuuse alala ohutula buli mbeka choosi ech'esyaalo, mu buungi bwaaka koti emoni ch'omusenye echiri hu lwaasi lw'enyaanja, mani omweene obeemirire muchie mulwaane ebiita.

¹² Efwe huchia ohukoonya Daudi eyo yoosi yaachia ohuba naali, mani humuseete n'asisiiri ohumanyaho esichia ohukwaao. Omweene oyo alala neende abasaacha bae boosi yibulayo kata mulala ochia ohuluwonamo.

¹³ Nikali mbwe anyala yeseenda yaachia yeengira mu siko, abaandu beefwe boosi baba bachia ohuleeta emikoye mani bahweese esiko esyo siweere mu hooho liri aasi bweene ao. Abulao kata ekina lala elichia ohulehwaho aakulu w'esigulu esyo syoosi daawe.”

¹⁴ Abbusalomu neende Abaisiraeli boosi baboola bati, “Nga mbano hane engereka ya Husaai ndai yihirira eya Ahitofeeli eyale muno.” Omwaami yali n'amalire ohuheengao ati, engeraka endai ya Ahitofeeli, haba siyichia ohuloondwa daawe, hu omusihiriro kukwe hu Abbusalomu.

Daudi alabulwa mani yeeyiba

¹⁵ Bulaanu Husaai mani yaboolera abalaamisi, Sadoki neende Abbiataari engeraka yi yali n'abereese Abbusalomu alala neende abeemirisi Abaisiraeli boosi, haandi neende engeraka yeene yi Ahitofeeli yali naatusire.

¹⁶ Husaai yameedaho ati, “Bwaangu bweene bulaanu! Tuma emboosi yiche eyiri Daudi atateemaho ohumala esiro aambi neende ebyaambuhiro biri mu sichiimi, nae ati yaambuhe Yorodaani bwaangu, hu mani ye alala neende abasaacha bae batoola ohudiirwa beetwa daawe.”

¹⁷ Yonatani omwaana wa Abbiataari, alala neende Ahimaasi omwaana wa Sadoki, bali nibaliindiriire hu sulo ya Enirogeeli, huundulo wa Yerusalemu, olwohuba abo haba sibanyala ohubonwa nibeengira mu siko omwo. Omuhalaabani muhasi yali niyetechaangaho sa ohuchichaanga n'ababoolera esyalichiingi nisiri ohuholehana, hu bulaanu banyale ohuchia mani baboolera Omutuki Daudi oyo.

¹⁸ Nae ludaalo luundi, omwaana wuundi yababona, mani yaachia yaboolera Abbusalomu; mani beeyina baawaao ohuchia beekise mu nyuumba y'omusaacha wuundi owali niyamenya mu Bbahuriimu. Omusaacha wuno yali ali neende ediba niliri aambi neende enyuumba yae, mani nibaliingiramo nibooloberera aasi bweene ohweekisa.

¹⁹ Omuhasi w'omusaacha oyo yabukula esifuuniho syahwo, naamala n'asibwiiha hu munwa kw'esulo kwoosi, yasibakalaho emere humukulu wasyo, hu muundu yeesi ahaye ohumanyaho esiindu syosi-syoosi daawe.

²⁰ Abahoongo ba Abbusalomu boola aambi neende enyuumba eyo, baateeba omuhasi oyo bati, “Ahimaasi neende Yonatani bali yeena bweene?” Nae omuhasi oyo yabakobolamo ati, “Abo bamalire hale ohwaambuha omwaalo bakwiire engereha.” Abasaacha abo babakoonya nae byaabahaya ohubabona daawe, mani beekobolerayo mu Yerusalemu.

²¹ Luunyuma lw'ohuwaao, Ahimaasi neende Yonatani baniina baatula mu sidiba esyo, mani baachia baboolera Omutuki Daudi. Bamuboolera ebyo byoosi bi Ahitofeeli yali naatekeehe ohumuhola mani baboola bati, “Ewe yanguyaho waambuhe omwaalo.”

²² Daudi alala neende abasaacha bae boosi batulaniramo mani bachaakiraniramo ohwaambuha Yorodaani, mani nibwali nibuhya, bali nibamalire ohweyambuhira nibaweereo.

²³ Ahitofeeli niyabona ati, engeraka yae haba sibali nibayiloondere, yaniina hu suhiri yae, mani yeekobolerayo engo mu siko si yali niyamenyamo. Niyamala sa ati ohutekeha ebiindu byae byoosi bulai bweene, yesagamo omukoye mani yeemika yaafwa. Bamusiiha mu ng'ani y'edaala.

²⁴ Daudi nae yali n'amalire ohwoola mu siko sya Mahanaimu mu siha si Abbusalomu neende Abaisiraeli bamaliramo ohwaambuha Yorodaani.

²⁵ Bulaanu, Abbusalomu yali n'amalire ohuta Amasa mu bwiimirisi bw'eye elyomu bweyaango bwa Yoabbu. Amasa yali naali omwaana wa Yeteeri Omuyisimaeli; ng'ina yali Abbigaili, owali omuhaana wa Naahasi, haandi naali mwanaang'ina Seruya ng'ina Yoabbu.

²⁶ Abbusalomu alala neende abasaacha bae boombaha ekaambi mu loba lya Gileadi.

²⁷ Daudi niyoola sa ati mu Mahanaimu, yabukaanirwa neende Soobbi omwaana wa Naahasi, owali naatula mu siko sya Rabba mu Abaamooni, haandi neende Makiri omwaana wa Amieli, ohutula Lodebbari, haandi neende Bbarisilaali, ohutula Rogeliimu mu Gileadi.

²⁸ Bamuleetera ebitaanda, ebbeseeni, kata neende endamu ch'eloba, engaano, amabere masuungu, obusye, emere ehubbake, amaraagwe alala neende eng'ooli ch'olaayo.

²⁹ Baleeta obuuhi, alala neende amabeere maboyu, haandi neende amakoondi, amafuta k'ebyaayo, nibaleetera Daudi alala neende abaandu bali nae ohulichaanga; olwohuba bali nibabolaanga bati, “Abaandu abo bali neende enjala, haandi bajoong'u muno, haandi balumwa obuluwo ohutula mu sichiimi.”