2 Samueli 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi neende Sibba

¹ Daudi niyali n'amalire ohukeenda yaabitaho aakulu bweene ew'olugulu olwo, yeduuyanaho neende Sibba, omuhalaabani wali owa Mefibboseti, owali naali neende esuhiri enyiingi nichedwiihire emigaati emia chibiri (200), haandi neende ehanya emia ndala eby'emisabbiibbu myomu (100), ehanya emia ndala ech'ebyaamo biyaaha (100), haandi neende esibbuka sy'eseero esichuule efiini.

² Omutuki Daudi yamuteeba ati, “Siina syeene si ewe ochia ohuholera ebiindu bino byoosi?” Nae Sibba yakobolamo ati, “Esuhiri chino choosi ch'edaala lyao Ewe ow'Oluyaali ohukeenderaangaho, nae emigaati alala neende ebyaamo by'abasaacha ohulichaanga, nae efiini yaabwe ohung'wechaanga nikali mbwe banyala ohujong'aanga nibali mu sichiimi muno.”

³ Omutuki oyo haandi yamuteeba ati, “Nae Mefibboseti, omwiichuhulu wa Saulo omwaami wao ali yeena bweene?” Sibba nae yamukobolamo ati, “Oyo ali sa mu Yerusalemu, olwohuba ali suubi mbwe bulaanu Abaisiraeli bachia ohumukobosera obwaami bwa Saulo kukaang'ene.”

⁴ Omutuki wuno haandi yaboolera Sibba ati, “Bulaanu, buli siindu syoosi esyali nisiri esya Mefibboseti syao nisyo.” Nae Sibba yamukobolamo ati, “Ese mbano ndi sa omuhalaabani wao, mani hoya ndaanyala ohuhusangasaanga ebiha byoosi, Ewe ow'Obunyala!”

Daudi neende Simei

⁵ Omutuki Daudi wuno niyoola mu Bbahuriimu, Simei omwaana wa Geera, omwiiho wuundi wa Saulo, yatula erwaanyi ohwiicha omubukaanira, nae n'amwebwaaba niyeecha yaali.

⁶ Simei yachaakiraniramo sa ohulasa Daudi amakina neende abahoongo bae boosi alala, kata neende Daudi niyali niyebodohaanie abasaacha bae alala neende abaliindi bae.

⁷ Simei yemeeda sa ohumubwaabaanga n'aboola ati, “Ewe tula muno! Tula muno! Ewe omwiiti! Omutemo mweene!

⁸ Ewe wanyala ohubukula obwaami bwali obwa Saulo, bulaanu Omwaami mbao ali ohuhusaandyaanga olw'ohwiita obuduhunyi bw'abaandu b'edaala lya Saulo. Omwaami mbao amalire ohuberesa obwaami obwo Abbusalomu omwaana wao mweene, mani ewe omalire ohusihirira, ewe omwiiti mweene!”

⁹ Nae Abbisai, yi ng'ina yali Seruya, yaboolera omutuki oyo ati, “Ewe ow'Oluyaali, siina syeene esikera ewe waaleha embwa yeene yino yaahubwaabaanga sa yityo? Leha ese njie mumaleho sa omutwe kwae okwo!”

¹⁰ Nae omutuki oyo yaboolera Abbisai alala neende Yoabbu mwanaang'ina ati, “Kuno haba sikuli omulimo kwao kata nabudiidi. Nikali mbwe ali ohumbwaaba, Omwaami naaba niye omuboleere ati ahole atyo, wiina mweene oba ali neende obunyala ohweteeba esiba nisikera naahola esyeene esyo?”

¹¹ Daudi haandi yaboolera Abbisai neende abahoongo bae boosi ati, “Eng'we; omwaana waange mweene nguno niye oli ohuteemaho ohuunjita; siina syeene esiba nisikera eng'we nimwesiinduha Omubbenjamiini wuno? Omwaami awuundi niye omuboleere ohumbwaaba; mani eng'we mumulehe abe mani ahole sa syaadaha ohuhola esyo.

¹² Awuundi Omwaami anyala yaabona engisa yaange mani yamberesaho ehabi chiindi ohwiichusa mu bweyaango bw'esibwaabo syae.”

¹³ Daudi neende abasaacha bae bemeeda sa nibawaao hu ngira. Simei nae yesi yabahayiraho sa, nakeenderaanga hu ndulo w'esigulu; yalumirira sa ohubwaabaanga haandi neende ohulasaanga sa amakina kae ako alala neende ebikoha n'akeenda.

¹⁴ Mani omutuki alala neende abasaacha bae boosi bajoong'a muno niboola hu Yorodaani, mani baanyala ohuwuluuhira abweene ao.

Abbusalomu naali mu Yerusalemu

¹⁵ Abbusalomu alala neende Abaisiraeli boosi abali nibali nae beengira mu Yerusalemu, nae Ahitofeeli yesi yali ali sa alala nabo.

¹⁶ Husaai, omwiicha yi Daudi yali niyeesika muno, niyabukaanana neende Abbusalomu, yehuuma n'aboola ati, “Omutuki Oyiindire! Omutuki Oyiindire!”

¹⁷ Abbusalomu nae yamuteeba ati, “Siina syeene esyeholeehe hu butiiririrwa bwao eyiri Daudi omwiicha wao? Lwasiina haba sochiire nae mani?”

¹⁸ Husaai nae yakobolamo ati, “Naange ndahachiire nae koti naanu? Ese niise oyo yeeng'ene owadoolwa neende Omwaami, neende abaandu bano, haandi neende Abaisiraeli boosi. Ese njia ohumenya sa naawe muno.

¹⁹ Ataali ao, wiina mweene yi mba niinjia ohuhalaabaniraanga, nataali omwaana w'omwaami waange sa? Koti lu ndahalaabaniraanga lataao, nilwo lu njia ohuhalaabaniraanga ewe weesi.”

²⁰ Abbusalomu yakaluuhanira Ahitofeeli yaaboola ati, “Eng'we bulaanu koti efwe hudoong'ere muno huti, siina syeene si munyala ohutukeraka ohuhola?”

²¹ Ahitofeeli yamukobolamo ati, “Ewe chia sa mani ochaake ohweyalisaanga neende abahasi b'erwaanyi bali aba lataao bayaleha enyuma ohuliindaanga edooho. Buli muundu yeesi oli mu Yisiraeli aba achia ohumanyira elalira ati, lataao ahubonaanga nga omusuku wae, mani abaloondi bao bosi baba bachia ohulema emyooyo muno.”

²² Boombaha eyeema lya Abbusalomu hu sirama sy'edooho, mani mu moni wa buli muundu, Abbusalomu yachia yeengiraanga mukati niyeyalisa neende abahasi b'erwaanyi bali aba laatang'ene.

²³ Buli ekerako li Ahitofeeli yatusaanga mu ndaalo echo, lyawulirwaanga koti elyahabeere ely'emboosi cheene cha Nasaae; Daudi neende Abbusalomu baloondaanga elyeene elyo.