2 Samueli 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amunooni neende Tamari

¹ Abbusalomu omwaana wa Daudi yali neende mboochoong'ene w'esiiso silai muno nae owali n'asisiiri ohudeehisibwa olaangwa ati Tamari. Amunooni, omwaana wuundi wa Daudi yadaha mboochoong'ene oyo.

² Yamwekoomba muno ohwoola lu yooleraho ohulwaala, olwohuba syabonehana siti haba sisinyalihana ohubaaho alala nae daawe. Nae koti lu yali nasiiri ohweyalisaho neende omusaacha, yali yaliindwa muno hwaahae ohubukaananaho neende omusaacha yeesi.

³ Nae Amunooni yali naali neende omwiicha wae, owali omusaacha omudinyu muno olaangwa mbwe Yonadabbu, omwaana wa Saama, owali naali mwanaang'ina Daudi.

⁴ Yonadabbu oyo yaboolera Amunooni ati, “Ewe ngaandi oli omwaana w'omutiki wuno, nae ese hunyolaanga sa buli ludaalo nooli omwelalihirifu. Sidinyu siina syeene esikera nooba oti?” Nae yakobolamo ati, “Ese ndekoombaanga Tamari, mboochoong'ene Abbusalomu mwaanaama wuundi.”

⁵ Yonadabbu haandi yamuboolera ati, “Ewe teemaho weehole sa koti oli omulwaae, mani ochie weyalise mu buliri. Mani lataao n'anaba niyeecha yooli, ewe muboolere oti, ‘N'ofukiirira, boola Tamari mboocho yaange oyo niye oba yeeche yandiise ebyohulya. Ese ndaha omweene oyo yeeche yaandeehere ebyohulya ebyo ano yi syesi nyala ohumubonaangaho, mani amale omweene yaanyinulire, huunyemeo nyale ohulyaaho.’ ”

⁶ Kata katyo, Amunooni yeehola koti oli omulwaae, mani yaamala yaachia mu buliri yeeyalisa. Bulaanu Omutuki Daudi niyeecha ohumubonaho, ao niwo yi bulaanu Amunooni yasiingirira mani yaamuboolera ati, “Laata nookanya, lehaho Tamari yeeche muno mani yaahubbireho otukeeki tudiidi tuti niimubona, mani omweene amale atuunyinulire tulye.”

⁷ Abweene ao, Daudi yatuma emboosi eyiri Tamari mu dooho eyiboola yiti: “Ewe chia ena nyuumba ya Amunooni mani omudeehereyo ebyohulya.”

⁸ Tamari yasiingiraniramo mani yaachia ebweene eyo yamwakaana naali mu buliri bwae. Yali akiingire obusye bukaande, yabutekeha, yabuubbiramo otukeeki abuundu yi yali naanyala ohumubonaanga. Yamala ohuubba otukeeki otwo

⁹ mani yaamwiinulira ati atulye, nae yaahaya ohutulya. Yaboola ati, “Ewe tusayo buli muundu wuundi yeesi oli ano aweeo” mani boosi baawaayo.

¹⁰ Bulaanu Amunooni yaboolera Tamari ati, “Ewe bulaanu, leeta ano otukeeki otwo, aambi neende obuliri bwaange buno sa, mani otuumberese ewe omweene.” Tamari yabukula otukeeki otwo mani yasiingira yaachia yi Amunooni yaali.

¹¹ Niyali sa mbwe hwamudiisa otukeeki otwo ati, Amunooni yamudiira mani yamala yaboola ati, “Ewe, yicha hweyalise naawe mu buliri bwaange buno!”

¹² Nae Tamari yaboola sa ati, “Ese haba.” Haandi Tamari yameedaho ohuboola ati, “Ewe otanjiika ohuhola esiindu sidiisa esoni syakiire ao sityo! Esiindu esyo sy'omukwoobo muno!

¹³ Nae ese mba njia ohukeendaanga endye mu baandu ningololoose omutwe kwaange haandi? Nae ewe omweene, ewe oba ochia ohunyolera elalira esoni mu Yisiraeli yoosi. Mani n'okanya, chia mberi oboolereho omutuki mweene, nihaandi koti sa lu ese manyire, aba achia ohukanya ohuhundiisa mu mahono kao.”

¹⁴ Nae Amunooni kata siyakanyaho ohutekeeresa bi Tamari yali n'aboola daawe; mani koti lu yali naamuhira amaani, yamuyiingira mani yaamukwaaho.

¹⁵ Bulaanu Amunooni niyaba n'amalire ohuhola atyo, yasyuula Tamari muno. Yamusyuula muno ohuhiraho koti lu yali namwekombaanga hale. Yamuboolera ati, “Ewe bulaanu tula muno!”

¹⁶ Nae bulaanu Tamari yaamukobolamo ati, “Ese haba.” Haandi yaamuboolera ati, “Ewe ohunjirusa mbweeo sa endyo siba sichia ohuba obutemo buhunuufu muno ohuhiraho neende esiholwa si wahamala ohuuhola sino!” Kata katyo, Amunooni nae haba siyanyala ohumuwulira daawe.

¹⁷ Amunooni yacha sa mu moni neende ohulaanga omuhalaabani wae yeeche yengire mu nyuumba omwo mani yaaboola ati, “Ewe diira omuhasi wuno omutuse emberi waange bwaangu! Musukune erwaanyi bwaangu mani omale wiikaleo olwiiki olwo olwomiise!”

¹⁸ Omuhalaabani oyo yatusa Tamari oyo mu nyuumba omwo, mani yeekalao olwiiki bulai. Esiha esyo, Tamari yali niyefwaalire engubo yereera ohwoola hu bisiisiro, haandi eyiriho amahono maleeyi, efwaala yali eyihoyeraanga omuhaana w'omutuki osisiiri ohudeeha endaalo echo.

¹⁹ Tamari yatula ao mani yaachia yebbuuka ekohe hu mutwe kwae, yataandula engubo yae yereera eyo, mani yachaaka ohukeendaanga n'abwiihire obweeni bwae bwoosi na mahono kae n'awaao n'alira.

²⁰ Abbusalomu mboochoong'ene niyamuhubbyaho sa ati emoni chae, yateeba ati, “Omusaacha Amunooni wuno, afwaana koti omalire ohuhunyaasa, kose? N'ofukiirira, muhaana weefwe, otakanya esiindu sino syaahunyoolesa muno daawe. Amunooni oyo ni mboochoo wuundi sa, mani otacha wachaaka ohubibooleraho omuundu yeesi daawe.” Tamari yachaaka ohumenyaanga mu nyuumba y'Abbusalomu, niyeelalihirira, haandi naali neende esyeyiingo sikali muno.

²¹ Omutuki Daudi niyawulira esyali nisyeeholeehe, yanyoolera muno.

²² Abbusalomu yesi yasyuula Amunooni muno hulw'ohukwa hu Tamari mboochoong'ene oyo, mani yaakama ohulomalomaanga nae ohutula oolwo.

Ohwetuunga hwa Abbusalomu

²³ Emyaaka kibiri nikyawa, Abbusalomu yali naali ohubekeraanga amakoondi kae obwooya mu Bbaali Hasoori, aambi neende esiko sya Efuraimu, mani niyalaaliha abaana ba omutuki waabwe oyo boosi ohubaayo.

²⁴ Yachia eyiri Omutuki Daudi mani yaboola ati, “Ewe ow'Oluyaali, ese mbano njia ohuba neende omuholo kw'ohubeka amakoondi kaange obwooya. Ewe alala neende abasaacha bahoongo bao abo munyala mweecha mwesi mwaabahoo mu muholo kweene okwo?”

²⁵ Nae omutuki oyo yakobolamo ati, “Musyaaning'ene, haba.” Haandi yameedaho ati, “Esyo siba sichia ohuba omusiigo musito muno ewe yooli efwe fweesi nihwiicha.” Nae Abbusalomu yemeeda sa ohusaba hwae ohwo, nae kata katyo omutuki oyo yaahaya ohufukiirira daawe, mani yaboolera Abbusalomu atule ao aweeo.

²⁶ Kata katyo, nae Abbusalomu yemeeda ohuboola ati, “Esyo silai nisyo, nae kata nisiri sityo, ewe onyala walehuulaho Amunooni mwaanaama yeeng'ene sa ati, yeecha?” Nae omutuki oyo haandi yateeba ati, “Siina syeene esiba nisikera yeeche?”

²⁷ Nae Abbusalomu yesi yemeeda sa ohusaba, ohwoola lu Daudi yaluya yafukiirira Amunooni alala neende abaana bae baandi boosi ohuchia neende Abbusalomu. Abbusalomu yatekeha emideeho kihoyera sa omutuki

²⁸ yakerakira abahalaabani bae ati: “Eng'we mwehaliirisaanga mubonera elalira muti Amunooni oyo anyoola ebyohung'wa ebibitiirifu, mani niinjicha ndaatusa elako, muchie mani mumwiitireo. Mutatya daawe. Ese mweene niise ochia ohubaaho omusaangao okwo. Mube abalulu mani muhaye ohwekoyaania daawe!”

²⁹ Abahalaabani baloonda bulai engeraka ya Abbusalomu, mani beeta Amunooni. Abaana badoong'ereo boosi aba Daudi baniina hu suhiri chaabwe mani beeyiruhira beweerao.

³⁰ Nibali hu bali hu ngira nibakobola engo waabwe, Daudi yaboolerwa ati: “Abbusalomu wula ngaandi amalire ohwiita abaana bao boosi, abulao kata mulala hu bo odoong'ere daawe!”

³¹ Omutuki wuno yasiingira yeema, mani yataandula engubo chae choosi chaamuwa hu mubiri naali mu sibeera, haandi niyefulaafusa aasi mu lufu. Abahalaabani bosi abali esiha esyo aambi nae betaandulaho engubo batyo.

³² Nae Yonadaabbu, omwaana wa Saama mwanaang'ina Daudi wuundi yaboola sa ati, “Ewe ow'Oluyaali, mbwe haba sibeetere abaana bao boosi daawe. Mbwe Amunooni yeeng'ene niye ofwiire. Olwohuba omuundu yeesi yanyalaanga ohusimanyirao ohweema hu mbonehana yali eya Abbusalomu mbwe yali naamaliriire ohuhola atyo ohutulira elalira hu ludaalo lu Amunooni yakwiira hu Tamari mboochoong'ene.

³³ Ewe otafukiira amakeni kaboola mbwe abaana bao boosi bafwiire. Amunooni yeeng'ene niye owiitirwe.”

³⁴ Nae esiha syeene esyo, Abbusalomu yali n'amalire ohweyiruhira niyewereereo. Abweene ao, omusaacha mulwaani owaba naali hu mulimo kw'ohuliinda mani yaabona esidiiyiha sihoongo nisiihirira esigulu hu ngira yitulira mu Horonaimu. Yachia eyiri omutuki yabuula ebyo byoosi bi yali nabweene.

³⁵ Yonadaabbu yaboolera Daudi ati, “Abo nibo abaana bao abali ohwiicha, koti sa lu mboolere endi bachia ohukobola.”

³⁶ Niyamala sa ati ohulomalomaanga atyo, abaana ba Daudi bafuduha muungo. Bachaakiraniramo sa ohulira, Daudi neende abasaacha bahoongo bae boosi baalira lukali muno.

³⁷ Nae Abbusalomu yeeruha yeweerao, mani yaachia eyiri Talimai omwaana wa Amihuudi, omutuki wa Gesuri. Daudi yaliraanga Amunooni omwaana wae oyo buli ludaalo.

³⁸ Abbusalomu yeeruha yawaao, mani yaamala yaachia mu Gesuuri, mani yaamenya eyo embaka y'emyaaka kidatu kyoosi.

³⁹ Nae kata katyo, niyamala ohwenalisa ohufwa hwa Amunooni, yachaaka ohwekoomba Abbusalomu omwaana wae wuundi oyo yesi.