2 Samueli 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Daudi neende Bbatiseebba

¹ Mu toocho lyaloondaho, mu siha si batuki bachiiraangamo mu biita, Daudi yatuma Yoabbu ohutula achie alala neende abahoongo bae neende eye lya Yisiraeli; bachia baseeta mani bayiingira Abaamooni, haandi nibawaamba esiko sya Rabba. Nae Daudi mweene yadoong'a sa mu Yerusalemu.

² Hu ludaalo luundi, esijaambo, Daudi yasiingira naatula mu tudoolo twae twesideete, mani yaniina hu sirama sy'edooho lyae. Nae koti lu yali nang'alaalaanga niyebodoohania aakulu bweene eyo, yabona omuhasi wali niyeeyoka. Yali omuhasi w'esiiso muno.

³ Kata katyo, Daudi yatuma wamwaanda achie abone omuhasi wuno mbwe wiina mweene, mani yamanya ati yali naali Bbatiseebba, omuhaana wa Eliamu haandi omuhasi wa Wuria Omuhiiti.

⁴ Daudi haandi yatuma bawamwaanda abaangi bachie bamuleetere; mani bosi nibamuleetera Daudi, niyeyalisa nae. (Omuhasi oyo yali niyahamala sa ati endaalo chae ch'esihasi cha buli mwoosi ch'ohulabiswa.) Niyamala atyo, omuhasi oyo yasiingira yaakobola engo wae.

⁵ Luunyuma omuhasi wuno niyamanya ati adiirire amabaanga, yatuma emboosi yaachiira Daudi niyimweekesa yityo.

⁶ Bulaanu Daudi yatuma emboosi yaachiira Yoabbu niyiboola yiti: “Ewe tuma Wuria Omuhiiti yeeche yiindi bwaangu.” Yoabbu yesi yaamutuma yaachia eyiri Daudi.

⁷ Wuria niyoola, Daudi yamuteeba nikali mbwe Yoabbu alala neende abalwaani boosi bali sa ebilai, haandi koti lu hulwaana hwali nihuchiiririra.

⁸ Bulaanu Daudi yaboolera Wuria ati, “Ewe chiaho engo wao bulaanu buti mani owuluuheho budiidi mberi.” Wuria yawulira akeene ako yasiingira yawaao, mani Daudi yaamala yamuloosaho engo wae esirabo.

⁹ Nae Wuria haba siyachiaho engo wae daawe; mu bweyaango bw'ohuhola atyo, yachia yeyalisa ena siruwa sy'edooho elyo, alala neende abaliindi ba Daudi Omutuki.

¹⁰ Daudi niyawulira ati hane Wuria haba siyali n'achiire engo wae, yamulaanga mani n'amuteeba ati, “Ewe mbano wahakobola sa buti noomalire esiha sireeyi noobulao; lwasiina haba sochiire woolaho engo wao?”

¹¹ Wuria nae yakobolamo ati, “Abasaacha ba Yisiraeli neende aba Yuda boosi bali eyale mu biita, nihaandi Esanduuku ly'Endagaano liri ebweene eyo nabo; Yoabbu omuhoongo waange, alala neende abahoongo bae boosi bali erwaanyi alafu nae. Nae ese ndahachia endye engo waange, ndaalya haandi ndaang'wa, haandi ndeeyalisa neende omuhasi waange? Haandi noomalire ebyo byoosi, esyo siba siri esy'omusiro, mani ese ndeechuba endi haba siinjia ohuholaho esiindu sifwaanaho sityo daawe!”

¹² Nae Daudi yaboola ati, “Ewe doong'a sa ano olwaalero lwoosi, muchuli mba njia ohuhutuma okoboleyo.” Wuria yadoong'a mu Yerusalemu oludaalo olwo lwoosi, haandi neende olwaloondaho lwosi.

¹³ Daudi bulaanu yamulaanga yeeche alye nae esy'engoloobe mani yaamung'weesa yameera. Nae haandi kata katyo, esiro syeene esyo, Wuria haba siyachaho engo wae daawe; mu bweyaango obwo, yachia yeekonera sa hu bburungeete lyae mu siseenge sy'abaliindi syomu dooho elyo.

¹⁴ Nibwahya echuli, Daudi yaandiikira Yoabbu ebbarwa, nayiyira ohubitira hu Wuria mweene oyo.

¹⁵ Mu bbarwa omwo Daudi yandiikamo ati, “Ewe bukula Wuria wuno mani omale omute emutwe bweene, yi hulwaana huhira ohuba ohw'amaani, mani mweseende mumulehe yeetwe.”

¹⁶ Yoabbu niyali hwadiyiisye esiko esyo, yatuma Wuria ohuchia abuundu yi yali naamanyire ati ao omusuku yali naali neende amaani maangi muno.

¹⁷ Eye ly'abasuku lyatula erwaanyi w'esiko esyo, lyalwaania eye lya Yoabbu muno; ao, abahoongo baandi aba Daudi mweene bosi beeterwao, mani Wuria yeesi yaaluchiiramo.

¹⁸ Bulaanu, Yoabbu yatuma emboosi eyiri Daudi niyamuboolera ebidiira hu biita,

¹⁹ yakerakira bawamwaanda ati, “Nimunaba nimumalire ohuboolera omutuki ebidiira hu biita bino byoosi,

²⁰ anyala yanyoolera mani yoola ohubateeba ati, ‘Nae lwasiina eng'we musudire aambi bweene neende esiko mutyo mbwe hu munyale ohubalwaania? Haba simumanyireengeho muti abo banyala bachaaka ohulasaanga obusaale nibeemere aakulu w'ebida daawe?

²¹ Eng'we haba simwiichulisaho koti lu Abbimeleki omwaana wa Gidioni yeetwa daawe? Byali mu Tebbeesi, yi muhasi yasukunira olukina aasi ohutula aakulu hu sida, mani yamwiita. Lwasiina mani mwoolere ohusudira elalira aambi neende hu sida bweene?’ Omutuki Daudi naabateeba atyo, eng'we mumuboolera sa muti, ‘Ngaandi Wuria omuhoongo wao oyo yesi yeeterwe.’ ”

²² Wamwaanda oyo yesi yachia eyiri Daudi yaamuboolera bi Yoabbu yali naamulagiire ohuboola.

²³ Yaboola ati, “Abasuku beefwe babeere neende amaani kahira akeefwe, mani baanyala ohutula erwaanyi w'esiko syaabwe beecha ohutulwaanisira mu sipaapi alafu peengerere, nae kata katyo hwiichire luunyuma hwaanyala ohubeerusa hwaboosa hu siruwa sy'esiko syaabwe.

²⁴ Bachaakire ohutulasaanga obusaale nibali aakulu w'esida, mani abaandi hu bahoongo bao, Ewe Ow'Oluyaali, boola ohwiitwa; Wuria omuhoongo wao oyo yesi yeeterwe.”

²⁵ Nae Omutuki Daudi yaboolera wamwaanda oyo sa ati, “Ewe kobolayo sa mani ogumie Yoabbu omuboolere atasinyiha daawe, koti lu otahanyala ohumanya oyo yeesi onyala ohufwiira mu biita. Chia mani omuboolere atekeheyo ohuseeta huundi ohw'amaani muno hu siko esyo mani munyale ohusiaamba.”

²⁶ Bbatiseebba yawulira ati hane wamwe yali naamalire ohwiitwa, yamulira muno.

²⁷ Esiha sy'amasika nisyawa, Daudi yatuma omuundu yaleeta Bbatiseebba ohumenya mu dooho; yeehola omuhasi wae, yamwiibulira omwaana musyaani. Nae Omwaami haba siyasaangaalira daawe esiindu si Daudi yahola esyo.