2 Petero 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abeekesa bobubacha

¹ Abanabbi bobubacha bosi balichiingi mu baandu ba Nasaae, mani mweeng'we muchia ohubechaangamo abeekesa bobubacha. Abeekesa bobubacha bachia ohuleeta enjekesa ch'obubacha mbi echinyaasa, haandi bachia ohwekaana Omwaami wabanunula, mani beleeteere ohufwa bwaangu.

² Abaandu baangi bachia ohuloonda engira chaabwe chidiisa esoni haandi ohweema hu biholwa byaabwe abaandu baandi bachia ohulomaloma bubi hu ngira yadyeeri.

³ Mu kuliira kwaabwe, abeekesa bobubacha bano bachia ohubanyoolamo engaanga muno ohweema hu ngano chi beene beeholera. Omusaango kwaabwe kwamala ohuheengwa hale muno, haandi ohusihiriswa hwaabwe haba sihukona daawe.

⁴ Kata Nasaae hale haba siyakwiira esisa bamalaika bahola ebyonoono nae yabasukuna mu nyaanja y'omuliro yi baboyerwa mu siirima nibaliindire oludaalo lw'ohuheengerwaho omusaango.

⁵ Haandi Nasaae haba siyakwiira esisa esyaalo sihale, nae yaleeta amaachi k'ofwomboole hu syaalo eyiri abonooni; nae yaawonia Nowa, owayalaanga obuluungifu neende abaandu baandi bataanu-na-babiri boong'ene.

⁶ Olwohuba Nasaae yaheengera omusaango ebiko bya Sodomu neende Gomora, n'abisihirisa neende omuliro, mani yaabahola esyohuboneraho esichia ohuholehanaanga eyiri abonooni boosi.

⁷ Nasaae yawonia Looti omuundu mulai, owachuunirwa muno ehola mbi y'abaandu batadeeba hu malako.

⁸ Omuundu mulai oyo yali yabamenyamo, mani buli ludaalo yachuunisibwaanga mu mwooyo n'abona haandi n'awulira ebiholwa byaabwe bibi ebyo.

⁹ Mani sakira, Omwaami yamanya engeri yohuwonia abalai beesa oluyaali mu Nasaae, ohutula mu mateemo kaabwe, neende ohuleha abonooni mu husaandisibwa hwaabwe ohwoola hu ludaalo lw'ohuheengeraho omusaango,

¹⁰ neende abo abomiirira mu biima byaabwe bibolu neende obwekoombi bw'omubiri mani baalekeeresa amaani ka Nasaae. Abeekesa bobubacha bano, babulaho neende esiindu sibatya, haandi sibadiirwa esoni ohunyeka abaandu b'oluyaali.

¹¹ Kata bamalaika bali neende amaani kahirao, haba sibabaabiraangaho omusaango mu moni w'Omwaami nibabanyeka.

¹² Nae abeekesa bobubacha bano balomaloma bubi hu biindu bibakoteerwe elalira. Bafwaana koti esolo ndeende echitaali neende ebibaaso echidiirwa mani cheetwa; bachia ohusihiriswa koti esolo ndeende.

¹³ Bachia ohubatuunga neende ohusaandisibwa huli koti hu basaandisiramo abaandu baandi. Esaangaalo lyaabwe liri mu hung'wa esideete ng'alang'ala nibasaangaasa emibiri kyaabwe. Sy'esoni muno haandi sibi nibeehala mu sidyaalo alala naang'we, olwo nibasaangaalira mu ngira chaabwe mbi!

¹⁴ Nae neende emoni chaabwe bewuunja buli siindu neende obucheke mani beekoomba buli muundu yi babona. Obwekoombi bwaabwe bw'ohuhola ebyonoono haba sibuyenjeera. Bakwiisa abaandu bakata mu muteego haandi baheera ohuhola ebiindu by'okuliira. Bali koti abaandu ba Nasaae yamala ohubwaaba!

¹⁵ Baleha engira nuungifu, mani baakota nibadiirire engira yi Bbalamu, omwaana wa Bbeyori yaloonda, owali niyaheera eseende chanyoola hulw'ohuhola ebyonoono,

¹⁶ mani yoolobisibwa hulw'esyonoono syae. Nae esuhiri yitalomaloma yamulomalomera mu kono ly'omunabbi niyimwoolobya hulw'ebiholwa byae by'elalu.

¹⁷ Abaandu bano bali koti esulo chahama, haandi koti amaleesi k'omuyaka kuwuucha; Nasaae yababiihira obweyaango bwaabwe mu siirima sya titititi.

¹⁸ Beehoonyera emboosi ch'obusiru haandi echohwefumia, beehoonyera obwekoombi bw'emibiri kyaabwe ohuteka abaandu bahachaakira ohweetusa hu baandu bali mu ngira mbi echileeta ohusihiriswa.

¹⁹ Babasuubisa obulehuule, nae abeene badoong'a nibali ababoye mu biima bibi bibatuka mu buboye, olwohuba omuundu aba omuboye w'esiindu simuyiingire.

²⁰ Abo abeeruha ohutula mu hunyaasiha hw'esyaalo nibamalire ohumanya Omwaami weefwe haandi Omuwonia Yesu Kristo, mani baakobola mu hunyaasiha hw'esyaalo haandi baayiingirwa, obulamu bwaabwe obwo buba obubi ohuhiraho obwataangira.

²¹ Syahabeere esilai muno yi bali baaba nibatamanya engira y'obuluungifu, ohuhira ohumanya engira eyo, nae haandi baleha amalako moolerefu ka bababeresa.

²² Esiindu syabeeholehaho syeekesa siti engaado chino chadyeeri, “Embwa yikobola yahoomba ebiindu bi yisalire” neende “Embiichi yookerwe yikobola yefuufula haandi mu madosi.”