2 Ebyomubiha 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omutuki Solomooni niyamaliirisa omulimo kwoosi okudiira hu Nyuumba ya Nasaae, yata mu Nyuumba ya Nasaae eyo ebiseenge bibiihwamo ebiindu byoosi bi Daudi Simwaana yali niyayaanayo eyiri Omwaami: efeesa, esaabbu, neende ebyehoonyerwa biindi.

Esanduuku ly'Endagaano liingiswa mu Nyuumba ya Nasaae

² Bulaanu Omutuki Solomooni yalaaliha abeemirisi b'enono neende ab'amadaala ka Yisiraeli boosi ohwebuusira alala mu Yerusalemu, ohuyira Esanduuku ly'Endagaano y'Omwaami, ohutula mu Siyooni, Yerusalemu, ohuliyira mu Nyuumba ya Nasaae.

³ Mani boosi bebuusa alala mu biha by'Esidyaalo sy'Ebikaali.

⁴ Mani abeemirisi boosi nibali nibamalire ohwebuusa, Abaleefi basiingisa Esanduuku ly'Endagaano elyo

⁵ baalikiinga baaliyira mu Nyuumba ya Nasaae. Abalaamisi alala neende Abaleefi bosi basiingira baachaaka ohusudia Eyeema ly'Ohubaao hw'Omwaami, haandi neende ebiindu byahwo byoosi baabiyira mu Nyuumba ya Nasaae.

⁶ Omutuki Solomooni neende abaandu ba Yisiraeli boosi bebuusira mu moni w'Esanduuku ly'Endagaano mani bayaanayo amakoondi neende eng'oombe mu buungi ebitabaliha.

⁷ Mani abalaamisi bachia bakiinga Esanduuku ly'Endagaano y'Omwaami, nibaliingisa mu Nyuumba ya Nasaae, mani nibalita Abuundu Ahiramo Obwoolerefu, mu lwaalo w'abakerubbi.

⁸ Embaya chabo chabaambuha echo chabwiihaanga Esanduuku elyo, neende emiguulo kyalikiingaanga.

⁹ Buli emutwe w'emiguulo ekyo byabonehanaanga neende buli muundu yeesi owalichiingi niyeemere niyeluungiihe mu moni w'Abuundu Ahiramo Obwoolerefu, nae ataali buli abuundu woosi yooba nooli. (Emiguulo ekyo kisisiiriwo ohwoola endaalo chino.)

¹⁰ Abulao esiindu syoosi esyalichiingi mukati w'Esanduuku ly'Endagaano, ohutusaho ebituundu bibiri eby'amakina kala ka Musa yali niyata omwo hu Lugulu lwa Sinai, koti lu Omwaami yahola endagaano neende abaandu ba Yisiraeli koti lu bali nibatula mu Misiri.

Oluyaali lw'Omwaami

¹¹ Bulaanu abalaamisi nibatula erwaanyi w'abuundu woolerefu (olwohuba abalaamisi boosi abaleetwa bali nibeelabya, nibatafwaayo huhukabuhanamo hwaabwe,

¹² kata neende abeembi b'abaleefi b'Asafu, aba Hemani, neende aba Yedutuuni, abaana baabwe, neende abeeho baabwe, beyaanja mu byefwaalo byaabwe by'elaasi enyirifu, nibali neende nyaangili, obuhana, neende amaduungu, beemeraanga ebukwe w'alutaari nibali neende abalaamisi emia ndala neende amahumi kabiri (120) aboobba eturumbete).

¹³ Omulimo kw'aboobbi b'eturumbete neende abeembi baandi, kwali ohwedinya ohuwuliirihanaanga nibeembera alala nibafumia haandi nibeebasa Omwaami, haandi neende olweembo nilwanihwaanga aakulu, neende eturumbete neende nyaangili kata neende ebihubba biindi, nibafumia Omwaami bati: “Fumie Omwaami, olwohuba mulai niye, Haandi obuheeri bwae bw'endaalo choosi.” Koti abalaamisi bali nibatula mu Nyuumba ya Nasaae, abweene ao, enyuumba eyo yeechulamo sa esireesi

¹⁴ siri neende ohwaaduha haandi ohumesamesana, mani byaahaya abalaamisi ohwemeeda ohwiimirira ohwiinamira Nasaae ohwo, hulwohuba oluyaali lw'Omwaami lwali nilwichuule mu Nyuumba ya Nasaae eyo.