2 Ebyomubiha 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyehoonyerwa mu Nyuumba ya Nasaae

¹ Solomooni yahola alutaari y'omugasa, eyali ey'emiita chitaanu-na-chine enyaande choosi, nae emiita chine neende otutoonyese tutaanu (4.5) ohuniina aakulu.

² Haandi yahola epipa lyeebodoohania ely'omugasa, eliri emiita chibiri neende otutoonyese tubiri (2.2) obwoloberefu, emiita chine neende otutoonyese tune (4.4) ohutaatabafu, haandi neende emiita ehumi-na-chidatu neende otutoonyese tubiri (emiita ehumi-na-chidatu neende otutoonyese tubiri) ohwebodoohania.

³ Humukulu w'olunikaanika lw'epipa hwaliho enyiriri ch'obusaate chibiri, lulala niluli aakulu w'oluundi. Obusaate buno bwali nibufwaanana neende esurusi, nibwayambaanisibwa hu pipa elyo.

⁴ Epipa elyo lyali nilyateengehwa hu mikoongo ky'esurusi ch'omugasa echatingaala erwaanyi, choosi chidatu nichitingaalire embeka chikabuhaane.

⁵ Omubiri kw'epipa elyo kwali emilimiita amahumi kataanu-na-kabiri neende chitaanu obuhomefu. Olunikaanika lwalyo lwali nilufwaana koti olw'esikoombe, nilweekodera erwaanyi koti amatwi k'esimuli. Epipa elyo lyali nilinyala ohukiinga amaachi kaera elita elifu amahumi kasaasaba (60,000).

⁶ Haandi bahola ebbeseeni ehumi, chitaanu chateebwa emwaalo w'Enyuumba ya Nasaae, nae chitaanu chateebwa emukulu. Ebbeseeni chino chali ech'ohwehoonyerwa ohwoosaanga ebituundu by'ebisolo byasaambwaanga koti ebiyaanwa bisaambwe byoosi. Amaachi kalichiingi mu pipa ehoongo, kali ak'ohwehoonyeerwaanga neende abalaamisi ohweeyosa.

⁷ Yahola ebiteeni by'amataara ehumi eby'esaabbu, mani baabita mu Nyuumba ya Nasaae, bitaanu hu lwaande lw'emwaalo, nae bitaanu biindi hu lwaande lw'emukulu.

⁸ Haandi yahola emeesa ehumi, mani yaamala yaachita mu Nyuumba ya Nasaae, chitaanu hu lwaande lw'omuhono muluungi, nae echiindi chitaanu hu lwaande lw'omuhono mukaada. Haandi yahola ebbeseeni emia ndala ech'esaabbu.

⁹ Haandi bahola olwaanyi lwomuukati bweene hulw'abalaamisi, haandi neende olwaanyi lw'erwaanyi. Enjiki chohu siruwa, akatikaati w'enyanyi chali nichawomwaho omugasa.

¹⁰ Bata epipa aambi neende esoonda y'ebukwe emwaalo w'Enyuumba ya Nasaae.

¹¹ Haandi Huramu yahola endamu, ebitiiyo haandi neende ebbeseeni. Mani ao niwo yi Huramu yamalira omulimo ku yaholera Omutuki Solomooni hu nyuumba ya Nasaae:

¹² emisiiro kibiri, ebbakuli, neende emisiruunga ky'aakulu w'emisiiro; haandi neende ebifuuniho bibiri eby'ohufuunihaanga hu bbakuli chohu misiruunga kyali aakulu w'emisiiro;

¹³ emoondolo emia chine echohu bifuuniho ebyo, ohufuunihaanga hu bbakuli chohu misiruunga ekyali hu misiiro.

¹⁴ Yahola ebiteeni, ebbeseeni chohu biteeni,

¹⁵ epipa lala, haandi neende eng'oombe eyeeyi ehumi-na-chibiri ech'omugasa echayikiha epipa elyomu lwaalo walyo.

¹⁶ Endamu, ebitiiyo, ebitiiyo by'ewuma, haandi neende ebyehoonyerwa byoosi Huramu yabihola ohutula mu mugasa kwanyiriswa muno, koti sa lu Mutuki Solomooni yali n'alagiire, ohwehoonyerwaanga mu Nyuumba ya Nasaae y'Omwaami.

¹⁷ Omutuki yalagira ebiindu byoosi byaaholerwa mu siroombe syali akatikaati wa Sukooti neende Seereda mu Hoondo lya Yorodaani.

¹⁸ Ebiindu ebibitiirifu byaholwa bi abulao omuundu yeesi owanyala ohubaliirira obusito bwoosi obw'omugasa obwehoonyerwa.

¹⁹ Omutuki Solomooni haandi yalagira ohunyirisa hw'esaabbu hwaaholwa hu Nyuumba ya Nasaae eyo: alutaari, haandi neende emeesa ch'emigaati kyayaanwa eyiri Nasaae;

²⁰ ebiteeni by'amataara, haandi neende amataara k'esaabbu enyirifu muno niko akaadusirwaanga mu moni w'Abuundu Ahiramo Obwoolerefu, ohuchianakana neende endekeha yaliwo;

²¹ ebisaate by'ebimuli, amataara, haandi neende magalo;

²² ebiyaambia amataara, ebbakuli, endiisi ch'obubbaani, haandi neende ebibbaati byakiingaanga amaanda kaaduha. Ebiindi bino byoosi byaholwaanga mu saabbu haya. Emilyaango ky'erwaanyi w'Enyuumba ya Nasaae, neende emilyaango kiingira Abuundu Ahiramo Obwoolerefu woosi yaomwaangaho esaabbu.