2 Ebyomubiha 35 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosia ahusa Paasaka

¹ Omutuki Yosia yahusira Paasaka mu Yerusalemu mu luyaali lw'Omwaami; hu ludaalo lw'ehumi-na-hane olw'omwoosi kutaangira nilwo lu beeteraho ebisolo by'esidyaalo esyo.

² Yaberesa abalaamisi emirimo ki bali nibahoyere ohuhola mu Nyuumba ya Nasaae mani haandi yaabasaaya banyale ohukihola bulai.

³ Haandi yakerakira Abaleefi, Abeekesa ba Yisiraeli, abali bewaayo eyiri Omwaami ati: “Bakuuka mute Esanduuku ly'Endagaano yoolerefu mu Nyuumba ya Nasaae yi Mutuki Solomooni, omwaana wa Daudi yoombaha. Eng'we simusiilikiingaanga buli yi muchiira, nae muchia ohuhalaabaniraanga Omwaami Nasaae weeng'we neende Yisiraeli abaandu bae.

⁴ Mweekabe ebituundu byeeng'we mu Nyuumba ya Nasaae ohuloondakana neende enono, haandi ohuloondehana neende obunyala bu mwabereswa neende Omutuki Daudi neende Omutuki Solomooni omwaana wae,

⁵ mani mweyaanje abaandi hweeng'we babecheengeo ohuhoonya buli daala ly'abaandu ba Yisiraeli.

⁶ Muhoyere ohwiita ekoondi doto lya Paasaka alala neende embusi. Bulaanu mweeyose mani mutekehe ebiyaanwa, ohuhola koti Abaisiraeli baasyeeng'we, ohuloondehana neende amalako k'Omwaami yababeresa ohubitira mu Musa.”

⁷ Hu baandu banyale ohwehoonyera mu Paasaka, Omutuki Yosia yoobba naatusa hu hoonge chae neende ebidwooli bya, amakoondi elifu amahumi kadatu (30,000), amakoondi madoto, haandi neende embusi njere, neende esurusi elifu chidatu (3,000).

⁸ Abahoongo bae bosi boobbera abaandu, neende abalaamisi, haandi neende Abaleefi ohwehoonyera. Mani abahoongo bali neende obunyala bw'Enyuumba ya Nasaae nibo: Hilikia, Omulaamisi Muhuluundu, Sakaria, neende Yehieli, baberesa abalaamisi abo amakoondi madoto elifu chibiri neende emia chisaasaba (2,600) haandi embusi njere neende esurusi emia chidatu (300) ohuba koti ebiyaanwa mu biha by'esidyaalo.

⁹ Abeemirisi b'Abaleefi: Konania, Semaya neende Netaneeli mwanaang'ina, Hasabbia, Yeieli, neende Yosabbaadi, boobba amakoondi madoto elifu chitaanu (5,000) neende embusi njere neende esurusi emia chitaanu (500) hu lw'Abaleefi ohuyaana koti ebiyaanwa.

¹⁰ Buli siindu nisyamala ohutekehwa bulai hulwa Paasaka, abalaamisi neende Abaleefi badiira obweyaango bwaabwe, koti lu mutuki yali n'alagiire.

¹¹ Luunyuma lw'amakoondi madoto neende embusi nibimalire ohwiitwa, Abaleefi babibaaka, mani abalaamisi bachaaka ohunyulaanyusa amabaanga hu alutaari.

¹² Nibamala batyo, bachaaka ohukabula abaandu, mu mikaanda ky'amadaala, ebisolo by'ohusaambwa, hu banyale ohubiyaanayo ohuloondehana neende amakerako kali mu Malako ka Musa.

¹³ Abaleefi basaamba ebiyaanwa bya Paasaka hu muliro, ohuloondehana neende amalako, haandi badeehera ebiyaanwa byoolerefu mu nuungiro, amaika, neende ebifulya, mani babbibbiirihana ohukabula enyama abaandu balye.

¹⁴ Luunyuma lwa bino ohuwa, Abaleefi beekaba enyama chaabwe abeene, haandi neende ech'Abalaamisi b'olwiibulo lw'Arooni, olwohuba abalaamisi badiiyiha neende emirimo ohwoola esiro syeene, nibasaamba ebisolo byali nibihoyere ohusaambwa ebilaamba, haandi neende amasinya k'ebiyaanwa.

¹⁵ Abeembi bano ab'enono y'Abaleefi b'Asafu bali nibabeereswa ohweema hu lako ly'Omutuki Daudi: Asafu, Hemani, neende Yedutuuni, omunabbi w'omutuki. Abaliindi bohu biruwa by'Enyuumba ya Nasaae haba sibali nibahoyera ohutula mu bituundu byaabwe daawe, olwohuba Abaleefi baandi nibo abali nibali nibabatekeheere Paasaka yaabwe.

¹⁶ Mani, koti lu Mutuki Yosia yali n'alagiire, buli siindu nilwo lu syeehola ludaalo olwo mu hwiinamira Omwaami, ohuhusa Esidyaalo sya Paasaka, haandi neende esiyaanwa sy'ebiyaanwa bisaambirwe hu alutaari.

¹⁷ Ohumala endaalo chitaanu-na-chibiri enaamba, abaandu boosi aba Yisiraeli abaliwo bahusa Paasaka neende Esidyaalo sy'Emigaati Kitabbaahirwe.

¹⁸ Ohutulira elalira hu ndaalo ch'omunabbi Samueli, Paasaka yali siyihuswaangaho ohwaaka ano. Abulao omutuki yeesi hu baliwo hale owali niyanyala ohuhusa Paasaka ohwaaka neende huno ohwahuswa neende Omutuki Yosia, abalaamisi, Abaleefi, haandi neende abaandu ba Yuda, Yisiraeli, neende Yerusalemu,

¹⁹ mu mwaaka kw'ehumi neende chitaanu-na-chidatu okw'obwaami bwa Yosia.

Enjakamo y'Obwaami bwa Yosia

²⁰ Luunyuma lw'Omutuki Yosia ohumala ohuholera bino byoosi Enyuumba ya Nasaae, Omutuki Neko owa Misiri yeemirira eye ohwiicha ohulwaanira mu Karikemisi hu Mwaalo kwa Ewufuraate. Yosia yateemaho ohumwaakamia,

²¹ nae Neko yamutumira emboosi chino: “Ebiita biindi ohulwaana bino, haba si bihudiiraho daawe, ewe Omutuki Yuda. Ese haba siinjichire ohuhulwaania daawe, nae ese njichire ohulwaania abasuku baange, mani Nasaae yamboleere nyanguyeho. Nasaae ali hu lubeka lwaange, mani otanyiingania daawe, aba achia ohuhusihirisa.”

²² Nae Yosia yali n'aheengereo ohulwaana sa. Yahaya ohutekeeresa bi Nasaae yaboola ohubitira mu Mutuki Neko, mani yefuula mani yaachia mu biita hu syaalo syayanjaala sya Magido.

²³ Mani ebiha by'ebiita, Omutuki Yosia yafumitwa neende obusaale bw'Abamisiri. Yalagira abahalaabani bae ati, “Eng'we muunduse muno; Ese nyaaliihe bubi!”

²⁴ Bosi bamukiinga baamutusa mu sigaari syae, mani baamuta mu sigaari siindi si yali naali nasyo ebweene eyo, mani baamala baamuyira mu Yerusalemu. Eyo niyo yi yafwiira mani yasiihwa mu ng'ani ch'abaami. Abaandu boosi aba Yuda neende Yerusalemu balira muno ohufwa hwae.

²⁵ Omunabbi Yeremia yachaakisa olweembo lw'amaliro k'Omutuki Yosia. Lwamala ohweehola omuduunga mu Yisiraeli eyiri abeembi boosi, abasaacha neende abahasi, ohwehoonyeraanga olweembo luno nibeechulisa ohumulira. Olweembo luno lunyoolehana mu mukaanda kw'amaliro.

²⁶ Buli siindu si Yosia yahola ohweyaanayo hwae eyiri Omwaami, obuwulisi bwae bw'Amalako,

²⁷ haandi neende ebyaliwo byae ohutulira elalira hu njaako ohwoola hu njakamo byandiikwa in mu sitabo silaangwe mbwe, Ebyaliwo by'abatuki ba Yisiraeli neende Yuda.