2 Ebyomubiha 34 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yosia omutuki wa Yuda

¹ Yosia yali naali neende emyaaka kitaanu-na-kidatu eky'obuhuluundu niyeehaswa ohuba omutuki wa Yuda, mani yaanyala ohutukira mu Yerusalemu ohumala embaka y'emyaaka amahumi kadatu neende mulala.

² Yaholaanga ebyasangaasaanga Omwaami; yalondakanaanga neende esyohuboneraho esy'Omutuki Daudi kukaang'ene, naali neende esinani sy'ohuwuliraanga amalako koosi aka Nasaae.

Yosia alwaania ohwiinamira Nasaae hw'esikafiiri

³ Mu mwaaka kwa hataanu-na-hadatu Yosia naali omutuki, n'asisiiri omuyere muno, yachaakiraniramo ohwiinamiraanga Nasaae w'Omutuki Daudi kukaang'ene. Emyaaka kine nikyawa yachaaka ohusihirisaanga ebifwo bikafiiri eby'ohwiinamiraanga nasaae, alala neende ebifwaanani bya Asera nasaae muhasi, alala neende ebiloongaloongwe biindi byoosi.

⁴ Ohweema huhulagira hwae, alutaari choosi chi Bbaali yenamirwaangamo byasaasakulwa, neende alutaari ch'ohuniooheseraanga obubbaani byalikulwa byaweera aasi. Basia banyuhuulaanga nibiba koti olufu, ebifwaanani by'Asera neende eby'ebiloongaloongwe biindi byoosi, mani baamala baabakalaanga olufu olwo hu biriindwa by'abaandu babiyaaniraanga ebiyaanwa.

⁵ Yasambiraanga amakuumba k'abalaamisi bakafiiri hu alutaari chi beenamiraangaho. Ohuhola bino byoosi yanyala ohuhola Yuda neende Yerusalemu byaaba ebyoolerefu ehabi liindi.

⁶ Yaholaanga atyo mu biko neende mu bituundu byali byasakuulwa ebya Manaase, Efuraimu, neende Simeoni, haandi neende ohwoola emukulu hu Nafutaali.

⁷ Ohumalaho esyaalo syoosi esy'Obwaami bw'Emukulu, yakeendaanga nasaasakulaanga alutaari echio, neende ebifwaanani by'Asera, haandi nasyechaanga ebiloongaloongwe nibyeehola olufu, haandi yadonyadonyaangamo mu bituundu bidiidi byeene alutaari choosi ech'ohuniooheseraangaho obubbaani. Mani yaamala atyo yekobolerayo engo mu Yerusalemu.

Ohunyoolehana hw'esitabo sy'Amalako

⁸ Mu mwaaka kw'ehumi neende chitaanu-na-chidatu eky'obutuki bwae, niyali n'amalire ohulabya esyaalo syoosi, haandi neende Enyuumba ya Nasaae, niyaakamia ohwiinamiraanga obukafiiri, Omutuki Yosia yatuma abasaacha badatu bano ohuchia ohutereesa buyaaha Enyuumba ya Nasaae ey'Omwaami Nasaae: Safani omwaana wa Asalia, Maseya, gafana wa Yerusalemu, neende Yoa omwaana wa Yoahasi, omuhoongo muhunuufu muno.

⁹ Eseende chi abaliindi b'Abaleefi bali nibasoloseere mu Nyuumba ya Nasaae, chadiiswa Hilikia Omulaamisi Muhuluundu. (Chali nicha soloswa ohutula hu baandu ba Efuraimu neende aba Manaase, haandi neende ohutula mu Bwaami bw'Emukulu bwoosi obudoong'ereyo, haandi neende ohutula mu Yuda, Bbenjamini, neende Yerusalemu.)

¹⁰ Eseende chino cheecha haandi chadiiswa abasaacha bala badatu abali nibafunaanibwa neende ohutereesa Enyuumba ya Nasaae buyaaha, mani bosi baamala baachidiisa

¹¹ abaraandi b'embaao neende aboombahi ohukulamo amakina, haandi neende embaao ech'ohwehoonyera mu hutereesa ebyoombahe bi batuki ba Yuda bali nibaleha ni byabola.

¹² Abasaacha bahola omulimo kuno bali abeesikwa beene. Bahubbiriswaanga neende Abaleefi bane bano: Yahaati, neende Obbadia ow'enono ya Merari, neende Sakaria neende Mesulamu ow'enono ya Kohati. (Abaleefi bano bali boosi abeembi babalaabalanu.)

¹³ Abaleefi baandi bali nibahulira engiinga y'ebiindu byehoonyerwa, haandi neende ohuhubbirisaanga abahalaabani abali hu mirimo kikabuhaane, nae abaandi baandikaanga ebyakwichaangao, nae abaandi baaholaanga koti abaliindi sa.

¹⁴ Eseende nichali mbwe hu chiri ohutuswa mu nyuumba y'Omwaami mu biseenge bi chibiihwaangamo, Hilikia yeduuya hu Malako k'Omwaami ka yali niyaberesa Musa.

¹⁵ Yaboolera Safani ati, “Ese ngaandi malire ohunyoola Esitabo sy'Amalako ano mu Nyuumba ya Nasaae muno.” Yabukula esitabo esyo mani n'asiberesa Safani,

¹⁶ mani Safani yaasiyira eyiri omutuki. Yaboola ati, “Efwe huholere buli siindu syoosi syolagiire.

¹⁷ Ngaandi efwe humalire ohuyira eseende chabiihwaanga mu Nyuumba ya Nasaae, mani hwachidiisa abahalaabani alala neende banyaapara baabwe.”

¹⁸ Mani nae yameedaho ati, “Ese naange mbano ndi ano neende sitabo si Hilikia yambereese.” Mani yachaaka ohusisomeramo omutuki mu kono ly'aakulu.

¹⁹ Mani omutuki oyo niyawulira koti esitabo esyo syali nisiri ohusomwa, yetaandulaho engubo mu hwesiinduha sa

²⁰ mani yaamala yaaberesa Hilikia omwaana wa Safani, haandi neende Abbudoni omwaana wa Miika, neende Safani, omusaati womwu kooti, haandi hu Asayia, omuliindi w'omwaami elako lino ati:

²¹ “Ewe chia mani wundeteebereho alala neende abaandu bali nibadoong'a mu Yuda neende mu Yisiraeli hu Omwaami. Manyira elalira ameeko k'esitabo sino. Omwaami mbao atunyoolereere olwohuba bakuuka yeefwe haba sibanyala ohuwuliraanga emboosi ch'Omwaami, mani haandi sibaholaanga ebiindu bi sitabo sino siboola siti nibyo ebihoyeere ohuholwaanga.”

²² Ohweema huhulagira hw'omutuki, Hilikia alala neende abaandu baandi, bachia mani beteeba hu muhasi wuundi olaangwa Hulida, omunabbi wali niyamenya mu situundu siyaaha syeene esya Yerusalemu. (Saluumu wamwe, omwaana wa Tikifa, haandi omwiichuhulu wa Harihaasi, niye owali neende obunyala hu byefwaalo byomu Nyuumba ya Nasaae.) Bachia mani baamutotolera byoosi ebyali nibikwiireo,

²³ mani omuhasi oyo yaanyala ohubaboolera ohukobolayo eyiri omutuki oyo mani bamuberese

²⁴ emboosi chiloondaho chino ohutula eyiri Omwaami: “Ese njia ohusaandya Yerusalemu alala neende abaandu basyo boosi neende ebibwaabo byandiikwa mu sitabo sisomeerwe omutuki oyo.

²⁵ Mbao banjwaang'ire mani bayaana ebiyaanwa byaabwe eyiri banasaae baandi, mani batyo basaangulusa etima lyaange neende ebyo byoosi bi baholere. Etima lyaange mbao li singiriire hu Yerusalemu, mani haba silichia hukwa omuya daawe.

²⁶ Nae eyiri omutuki mweene, sino nisyo si ese, Omwaami Nasaae wa Yisiraeli ndi ohuboola endi: Ewe koti lu owuliire ebyandiikwa mu sitao ebyo,

²⁷ mani weeyolobya omweene, haandi weefunaka omweene mu moni waange, ni wetaandulaho engubo chao, haandi noolira, koti lu owuliire koti ese ndatiihirisa ohusaandya Yerusalemu neende abaandu basyo boosi. Ese mbao mbuliire ohulaama hwao ohwo,

²⁸ mani esibonereso simbeere niinjia ohuleeta hu Yerusalemu, haba sisichia hwiicha ohwoola luunyuma lw'ohufwa hwao. Ese njia ohuhola ewe onyale ohufwiira mu muleembe sa.” Abasaacha abo bakobola eyiri Omutuki Yosia neende emboosi echio.

Yosia ahola Endagaano ohuwuliraanga Omwaami

²⁹ Omutuki Yosia yalaanga abeemirisi boosi aba Yuda neende Yerusalemu,

³⁰ mani boosi alala nibachia eyiri Enyuumba ya Nasaae, nibachiana neende abalaamisi baabwe, haandi neende Abaleefi, haandi neende abaandu badoong'ereo boosi, abanyali neende abamanani sidubaanie. Mani mu moni waabwe, omutuki oyo yanyala ohubasomera mu kono ly'aakulu esitabo esyo syoosi esy'endagaano esyo, esyali nisinyoolerwe mu Nyuumba ya Nasaae eyo.

³¹ Omweene nae yeema hu kutu ly'obwaami, mani naahola endagaano neende Omwaami ohumuwuliraanga, ohwooseresaanga amalako kae, neende ebilagiro neende omwooyo kwae kwoosi, neende obulamu bwae bwoosi, haandi neende ohutechanga mu hola ebidahibwa byoosi ebichiira hu ndagaano eyo, koti lu byandiikwa mu sitabo esyo.

³² Yahola abaandu ba Bbenjamini neende buli muundu yeesi owaliwo mu Yerusalemu ohusuubisa ohuliindaanga endagaano yibali nibaholere neende Nasaae owa bakuuka yaabwe.

³³ Omutuki Yosia yasihirisa ebiloongaloongwe byoosi ebisinyisa ebyalichiingi mu syaalo esyo esyali esy'abaandu ba Yisiraeli, mani mu bulamu bwae bwoosi, yadahaanga abaandu boosi ohuhalaabaniraanga Omwaami, Nasaae wa bakuuka yaabwe.