2 Ebyomubiha 33 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Manaase omutuki wa Yuda

¹ Manaase yali naali emyaaka ehumi neende kibiri eky'obuhuluundu niyeehaswa ohuba omutuki wa Yuda, mani yaanyala ohutukira mu Yerusalemu ohumala embaka y'emyaaka amahumi kataanu neende kitaanu.

² Ohuloondakana neende ebiholwa bisinyisa by'ebyaalo bi Omwaami yeemaho mani yeerusa mu syaalo omwo abaandu bae nibeengiramo, Manaase yesi yonoona mu moni w'Omwaami.

³ Yoombaha buyaaha ebituundu bikafiiri eby'ohwiinamiraangamo banasaae baabwe bi Hesekia laatang'ene yali ni yasihirisa. Yoombaha alutaari ech'ohwiinamiraangamo bbaali, haandi yaahola ebifwaanani by'Asera nasaae muhasi, nae omweene yeenamiraanga eng'ining'ini.

⁴ Yoombahaanga alutaari ch'esikafiiri mu Nyuumba ya Nasaae, abuundu yi Omwaami yali niyaboola ati niwo yi yali n'ahoyeere ohwiinamirwaangamo endaalo choosi pe.

⁵ Mu nyanyi chibiri ech'Enyuumba ya Nasaae, yoombahamo alutaari ech'ohwiinamiraangaho eng'ining'ini.

⁶ Yayaniraangayo abaana bae mu hooho lya Hinoomu koti ebiyaanwayo bisaambe. Yaholaanga obulakusi neende amayia, haandi yeteebaanga hu balakusi neende abaseebe. Yonoona yabitiirisa mu moni w'Omwaami, mani yaabira etima.

⁷ Yata esifwaanani mu Nyuumba ya Nasaae, abuundu yi Nasaae yali yabooleraho Daudi neende Solomooni omwaana wae ati, “Ano mu Yerusalemu, haandi mu Nyuumba ya Nasaae muno, niwo abuundu yi ndedooleramo ohutula mu syaalo syoosi ew'enono ehumi neende chibiri echia Yisiraeli koti abuundu yi ese ndeenamirwaanga.

⁸ Mani abaandu ba Yisiraeli nibachia ohwiisa oluyaali mu malako kaange koosi, haandi booseresaanga Amalako koosi ka Musa omuhalaabani waange yababeresa, mani ese haba siimba niinjia ohubakanya ohutusibwa mu syaalo si ndaberesa bakuuka yaabwe.”

⁹ Manaase yayira abaandu ba Yuda mu huholaanga ebyonoono bihira ebyo ebyaholwaanga neende ebyaalo bi Omwaami yali niyeerusaanga naamala mu syaalo esyo abaandu bae nibasiingiramo.

Manaase yeyolobya

¹⁰ Kata neende Omwaami ni yalabulaanga Manaase neende abaandu bae, bahayaanga sa ohuwulira.

¹¹ Mani Omwaami yaaleha abalamuli b'eye lya Asiria baseeta Yuda. Bawaamba Manaase, baamuhomamo amalobo, baamuboya mu nyororo, mani baamala baamuyira mu Bbabbilooni.

¹² Mani mu husaanda hwae yewota, mani yaakaluuhanira Omwaami Nasaae wae, mani yamwekweeda amuhoonye.

¹³ Nasaae yesi yawulira sa ohulaama hwa Manaase mani yaahukobolamo neende ohumunyalira ohukobolayo engo mu Yerusalemu haandi neende ohutuka ehabi liindi. Sino syeekesa Manaase siti hane Omwaami oyo niye owali Nasaae wadyeeri.

¹⁴ Luunyuma lw'esyeene sino, Manaase yanyala ohuleeyiaho haandi obuleeyi bw'esida sy'erwaanyi hu lwaande lw'ebukwe wa Yerusalemu, ohutulira abuundu ali ehooho liri aambi neende Esulo ya Gihoni emukulu w'Esiruwa sy'Eng'eeni, haandi neende abuundu ali esiko silaangwa mbwe Ofeli. Haandi yachia mani yaata omunamaye muhoongo ohulagiraanga omukaanda kw'abalwaani mu buli siko syasitirirwa esya Yuda.

¹⁵ Yatusa mu Nyuumba ya Nasaae banasaae bateende, alala neende esifwaanani si yali niyata mu bweene omwo, haandi neende alutaari ch'esikafwiiri echalichiingi hu sigulu si Nyuumba ya Nasaae yoombahwaho, haandi neende mu bituundu biindi mu Yerusalemu; yabukula ebiindu bino byoosi mani yaabitusa erwaanyi w'esiko esyo, mani yaamala yaabisukuna eyale.

¹⁶ Haandi yatereesa buyaaha alutaari yi Omwaami yenamirwaangaho, mani yayaaniraho ebiyaanwa by'ohusaasania abaandu haandi neende eby'ohweebasa. Yalagira abaandu boosi ba Yuda ohwiinamiraanga Omwaami yeeng'ene, Nasaae wa Yisiraeli.

¹⁷ Kata neende abaandu nibemeeda ohuyaaniraanga ebiyaanwa mu bituundu biindi by'ohwiinamiraangamo, babiyanaanga sa eyiri Omwaami mulala wuno yeeng'ene.

Enjakamo y'obwaami bwa Manaase

¹⁸ Buli siindu siindi syoosi si Manaase yaholaho, ohulaama hu yayira eyiri Nasaae wae, alala neende emboosi ch'abanabbi bamutuumbuliraanga emboosi mu liita ly'Omwaami Nasaae wa Yisiraeli, byoosi byandiikwa mu sitabo sya Ebyaliwo by'abatuki ba Yisiraeli.

¹⁹ Ohulaama hw'omutuki neende esikobolwamo sya Nasaae, haandi neende olukano lw'ebyonoono bi yahola n'asisiiri ohweeyolobya embi chiyaholaanga, ebituundu bikafiiri by'ohwiinamirangamo, alala neende ebifwaanani bya Asera nasaae muhasi bi yaholaanga neende nasaae bobubacha ba yeenamiraanga byoosi byandiikwa mu sitabo sya Ebyaliwo bya Abanabbi.

²⁰ Manaase yafwa mani yaasiihwa mu dooho, nae Abaamooni omwaana wae niye owakobola mu makulu kae koti omutuki.

Omutuki Amooni owa Yuda

²¹ Amooni yali naali neende emyaaka amahumi kabiri neende kibiri eky'obuhuluundu nibamwiihasa ohuba omutuki wa Yuda, mani yaanyala ohutukira mu Yerusalemu ohumala embaka y'emyaaka kibiri kyoong'ene.

²² Koti sa Manaase laatang'ene, yesi yonoona mu moni w'Omwaami, mani yeenamiraanga banasaae bobubacha ba laatang'ene yesi yeenamiraanga.

²³ Nae ohukabuhanaho neende laatang'ene oyo, haba siyanyala ohufuniha mani yaanyala ohukaluuhanira Omwaami; mani yali omwonooni mubi muno ohuhiraho koti lu laatang'ene yali.

²⁴ Abahoongo ba Abaamooni nibo aboola baamuhoba, mani baanyala ohumwiitira mu dooho bweene omwo.

²⁵ Abaandu ba Yuda bosi banyala ohwiita abaandu beeta Abaamooni abo, mani beehasa Yosia omwaana wae ohuba omutuki.