2 Ebyomubiha 32 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abasiria batiisa-tiisa Yerusalemu

¹ Luunyuma lw'ebiindu bino byoosi ohubaao, bi Mutuki Hesekia yahalaabaniraangamo Omwaami neende obweesikwa, Senakeribbu, omuhoongo wa Asiria, yaseeta Yuda. Yaamba ebiko bisitirire mani yaatusa elako amaye kae ohudomola engira mu sida.

² Mani Hesekia niyabona ati, Senakeribbu yali naadaha ohuseeta Yerusalemu yesi,

³ yatekeha neende abahoongo bae neende abalwaani balulu bae ohwaakamia ohuhulukusa hw'emyaalo kyalichiingi nikitula erwaanyi w'esiko; mani baamuhoonya.

⁴ Abaandu bebuusa mu buungi, mani baanyala ohwaakamya emyaalo kyoosi neende wadi okwahulukusaanga nikuhalakania mu syaalo esyo, nibaboola bati, “Siina syeene esikera abatuki ba Siria nibeecha banyale ohwakaana amaachi maangi muno?”

⁵ Omutuki wuno yomiisa obuliindi bw'esiko esyo neende ohutereesa buyaaha esida, neende ohwoombahaanga amakutu hu sida bweene ohwo, haandi neende ohwoombahiraho esida siindi esy'erwaanyi. Ohumeeda ohwo, haandi yatereesa buyaaha ebiindi nibyoombahwaanga mu syaalo esyo ebyeechuswaanga hu lubeka lw'ebukwe w'esituundu sihale sya Yerusalemu. Haandi yetaania amafumo neende engabo ebiingi muno.

⁶ Yata abasaacha boosi mu siko aasi w'obunyala bw'abanamaye bahoongo mani yaabahola bebuusira mu situundu siyanjaafu esiri hu siruwa sy'esiko. Yababoolera ati,

⁷ “Ewe guma mani omaliirire, mani otatya omuhoongo w'Abasiiria, kata sa eye lyali nalyo. Efwe huli neende obunyala ew'efwe eno ohuhiraho koti lwaali.

⁸ Oyo ali neende amaani k'abaandu, nae efwe huli neende Omwaami Nasaae weefwe ohutuhoonya, haandi ohutululwanira ebiita byeefwe.” Abaandu bagumisibwa emyooyo neende emboosi chino ech'omutuki waabwe oyo.

⁹ Ebiha nibyabitao ebidiidi, Senakeribbu neende eye lyae nibali nibasisiiri mu Lakisi, yatuma emboosi chino eyiri Hesekia alala neende abaandu ba Yuda abali nibali nae mu Yerusalemu ati:

¹⁰ “Ese, Senakeribbu, Omuhoongo w'Asiiria, ndi ohuteeba esikera syeene abaandu eng'we nimuba abomiifu ohudoong'a nimuli mu Yerusalemu mu buwaambe.

¹¹ Hesekia ali ohuhuboolera ati, “Omwaami Nasaae wao niye ochia ohuhuwonia ohutula hu bunyala bw'efwe, nae Hesekia ali ohuhubachaanga mani achia ohukera ofwe enjala neende obuluwo.

¹² Oyo niye owasihirisaanga ebiyeembeho neende alutaari ch'Omwaami mani yaboolera abaandu ba Yuda neende Yerusalemu ohwiinamiraanga haandi neende ohunioohesaanga obubbaani eyiri alutaari ndala yoong'ene.

¹³ Ewe haba soomanyire oti bakuuka yaange neende ese, bi hwahola abaandu b'ebyaalo biindi? Mani banasaae b'ebyaalo biindi ebyo banyala ohuwoniaho abaandu baabwe ohutula bunyala bw'Asiiria?

¹⁴ Ni liina lu banasaae b'ebyaalo ebyo byoosi banyalaho ohuwonia ebyaalo byaabwe ohutuhaya ohuyiingira? Bulaanu siina syeene esiba nisihuhola nochaaka ohubaasa oti nasaa wao oyo anyala ohubawonia?

¹⁵ Bulaanu, otakanya Hesekia yaahubachirisa, kata yaahudoondobania atyo. Otamufukiiriramo daawe! Abulao nasaae ow'esyaalo syoosi owanyalaho ohuwonia abaandu bae ohutula hu bunyala bw'omuhoongo wa Asiria. Mani sakira siri mbwe nasaae wao wuno haba saacha ohuhuwonia daawe!”

¹⁶ Abahoongo ba Asiria baboola kata ebyonoono bihiraho obubi hu Omwaami Nasaae neende Hesekia, omuhalaabani w'Omwaami.

¹⁷ Ebbarwa yi muhoongo oyo yandiika yachalaasa Omwaami, Nasaae wa Yisiraeli. Yaboola yiti, “Banasaae b'ebyaalo biindi haba si baoniangaho abaandu baabwe ohutula hu bunyala bwaange daawe, haandi kata nasaae wa Hesekia yesi haba saachia hunyala ohuwonia abaandu bae ohutula hu bunyala bwaange daawe.”

¹⁸ Abahoongo abo beehuuma ebyeene ebyomu lulimi lu Yibburania mbwe hu banyale ohutiisa-tiisa, haandi neende ohudeembula abaandu ba Yerusalemu abalichiingi hu sida sy'esiko esyo.

¹⁹ Balomaloma hu Nasaae wa Yerusalemu mu ngeri nasilala yi balomalomera hu banasaae b'abaandu baandi, ebiloongaloongwe byaholwa neende amahono k'abaandu sa.

²⁰ Omutuki Hesekia alala neende Yisaaya omunabbi, omwaana wa Amosi yalaama Nasaae mani yaamulirira amuhoonye.

²¹ Omwaami yatuma malaika weeta abanamaye, alala neende abahoongo b'eye ly'Asiria. Mani omuhoongo wayo yaanyala ohukobola enyuma mu Asiria niyewunamiire. Mani ludaalo luundi niyali naali mu Nyuumba ya Nasaae ya nasaae wae, abaandi hu basyaani bae bamwiita neende engaanga chaabwe.

²² Mu ngeri yino, Omwaami yanyala ohununula Omutuki Hesekia alala neende abaandi ba Yerusalemu ohutula hu bunyala bwa Senakeribbu, omuhoongo w'Asiiria, haandi neende ohutula hu basuku baabwe baandi. Yahola abaandu bachaaka ohumenyaanga mu muleembe alala neende ebyaalo bibasibiraane.

²³ Abaandu baandi beecha mu Yerusalemu, nibaleeta ebiyaanwa by'Omwaami haandi neende ebiyaanwa bya Hesekia, hu bulaanu ohutula esiha esyo, neende ohwemeeda mu moni, ebyaalo byoosi byesaanga oluyaali mu Hesekia.

Obulwaae bwa Hesekia neende esuunga yae

²⁴ Aambi esiha syeene sino, nisyo si Mutuki Hesekia yachaakiramo ohulwaala mani yaaba aambi ohufwa. Yalaama, mani Omwaami yaamuberesa esilolero syeekesa mbwe kata katyo achia ohuwona.

²⁵ Nae Hesekia yali neende esuunga nyiingi muno, yaamukaira neende ohweebasaho ebiindu bi Omwaami yali naamuholeere, sakira Yuda neende Yerusalemu byoola ohusaandiswa.

²⁶ Munjakamo, kata katyo, Hesekia alala neende abaandu ba Yerusalemu beefunaka, mani Omwaami yaahaya ohusaandya abaandu, ohwoola luunyuma lw'ohufwa hwa Hesekia.

Emyaandu neende Esiroonyo sya Hesekia

²⁷ Omutuki Hesekia yayiindiyala muno, mani buli muundu yaamutichaanga. Yali neende ebiseenge bibiihiro byoombahirwa esaabbu yae, neende efeesa yae, amakina k'engaanga kae, ebiluungo byae, engabo chae, haandi neende ebiindu biindi by'engaanga biindi byae.

²⁸ Ohumeeda ohwo, yali neende amayuumba kabiihwamo ebiindu ebyoombahirwa emere yae, efiini yae, neende amafuta k'enaasi kae; ehoonge ch'eng'oombe chae; haandi neende ebidwooli by'amakoondi kae.

²⁹ Ebiindi ohutula hweebyo, Nasaae yali niyamuberesa amakoondi neende eng'oombe, haandi alala neende emyaandu kiindi ebyamuhola yaanyala ohwoombaha ebiko ebiingi.

³⁰ Yali niye Omutuki Hesekia owekalira ohuhukusa hw'Omwaalo Gihoni mani yaakasa amaachi kaahulukusa nikabitira mu lwangaacha ohwoola abuundu waandi mukati w'ebida bya Yerusalemu. Hesekia yanyala ohubitaangamo mu buli siindu si yaholaanga,

³¹ kata neende wamwaanda wa Bbabbilooni niyeecha ohweteeba hu bidiira hu biindu bitaali ebyabuli nyaanga ebyali nibikwiireo mu syaalo omwo, Nasaae yaleha Hesekia yechiira ewae ohuteemaho ohumanya ebiima byae koti lu biri.

Enjakamo y'Obwaami bwa Hesekia

³² Buli siindu syoosi si Mutuki Hesekia yahola, haandi neende ohweyaanayo hwae, eyiri Omwaami, byandiikwa mu sitabo silaangwa mbwe Ohuboneherwa hwa omunabbi Yisaaya omwaana wa Amosi, haandi neende mu sitabo silaangwa mbwe, Ebyaliwo by'abatuki ba Yuda neende Yisiraeli.

³³ Hesekia yafwa mani yasiihwa mu situundu sy'emukulu w'eng'ani ch'obwaami. Abaandu boosi ba Yuda neende Yerusalemu bamwiisamo oluyaali luhoongo muno niyafwa. Manaase omwaana wae niye owamukobola mu makulu koti omutuki.