2 Ebyomubiha 30 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endekeha ya Paasaka

¹ Hesekia yatuma omunwa mu Yisraeli yoosi neende Yuda, mani haandi yandiika ebbarwa ohuchiira Efuraimu neende Manaase, mbwe bahoyere ohwiicha mu nyuumba y'Omwaami mu Yerusalemu, ohuhusira Omwaami Nasaae wa Yisiraeli Paasaka.

² Olwohuba omutuki neende abahoongo bae, neende omuhung'aano kwoosi okuli mu Yerusalemu bali nibeekesaanie ohuhusa Paasaka mu mwoosi kwa habiri

³ (olwohuba abo haba sibali nibanyala ohuyihusa mu siha syasyo syeene olwohuba abalaamisi bahira obuungi bali nibateelabya, haandi abaandu bosi bali nibataanyala ohwebuusira mu Yerusalemu).

⁴ Mani omutuki oyo alala neende abaandu boosi basaangaalira endekeha yaabwe eyo,

⁵ mani beecha balaaliha Abaisiraeli boosi, ohutulira elalira mu Daani emukulu bweene ohwoola mu Bberisebba emwaalo bweene, ohwiicha ohwebuusira alala mu Yerusalemu mani balye Paasaka eyo ohuloondekana neende Amalako, mu buungi ohuhiraho koti lu byali ni byanyala ohunyaliha hale.

⁶ Bawamwaanda batula ohweema hu lako ly'omutuki neende abahoongo bae mani baabita mu Yuda mwoosi haandi mu Yisiraeli mwoosi neende ohulaaliha huno huti: “Eng'we abaandu ba Yisiraeli, mwanyala ohuwonao mu huyiingirwa hw'esyaalo syeefwe neende Abasiria. Bulaanu kobole eyiri Omwaami, Nasaae wa Abburahamu, Yisaka, neende Yakobbo, mani yesi anyale ohukobola yi muli.

⁷ Mutaba koti bakuuka yeeng'we, haandi neende koti abeeho beeng'we Abaisiraeli abataba abeesikwa eyiri Omwaami Nasaae waabwe. Koti lu munyala ohubona, yababoneresa ebilulu.

⁸ Mutaba neende esiyiingwa koti lu baba, nae eng'we muticheenge Omwaami. Yiche eyiri Enyuumba ya Nasaae mu Yerusalemu, mu Omwaami Nasaae weeng'we yahola ohubeechaanga esyoolerefu endaalo choosi, mani mumwiinamire hu ahaye haandi ohubanyoolereraanga.

⁹ Nikali mbwe muchia ohunyala ohukobolera Omwaami, mani abo boosi abanyala ohuyira abeeho beeng'we koti ababoye bachia ohunyala ohubakwiira esisa mani babalehe bakobole engo. Omwaami Nasaae weeng'we, ali neende esisa haandi w'esasaakisi, mani nimukobola yaali, aba achia ohubafukiirira sa.”

¹⁰ Bawamwaanda banyala ohwoola mu buli siko esiri mu syaalo sy'enono chia Efuraimu neende Manaase, haandi neende ohwoola emukulu bweene hu nono ya Sebbuluuni, nae abaandu baabacheheerera sa nibabakachula bukachula.

¹¹ Kata katyo, yaliyo abaandi ohutula mu nono cha Aseri, Manaase, neende Sebbuluuni abakanya ohwiicha mu Yerusalemu.

¹² Nasaae yali naali hu mirimo kyae mu Yuda mani yaanyala ohuwambaania abaandu mu humaliirira hwaabwe ohutya byaadaha nibanyala ohuloondakananaanga neende amalako k'omutuki oyo alala neende abahoongo bae.

Paasaka yihuswa

¹³ Abaandu bahiramo obuungi banyala ohwebuusira alala mu Yerusalemu mu mwoosi kwa habiri ohuhusa Esidyaalo sy'Emigaati kitaali Emibbaahe.

¹⁴ Bakiinga alutaari choosi echalichiingi nichehoonyerwa mu Yerusalemu ohuyanirwaangaho ebiyaanwa, neende ohuniooheserwaangaho obubbaani, mani nibamala nibachisukuna choosi mu Hoondo lya Kidironi.

¹⁵ Mani hu ludaalo lwa ehumi-na-hane, olw'omwoosi okwo, bachia mani beeta amakoondi madoto ak'esiyaanwa sya Paasaka. Abalaamisi neende Abaleefi abali nibataamala ohulabiswa, badiirwa esoni muno boola ohweyaanayo sa abeene eyiri Omwaami, hu baanyala bulaanu ohuyaana ebiyaanwa bisaambe mu Nyuumba ya Nasaae.

¹⁶ Bachia mani beehala mu bweyaango bwaabwe mu Nyuumba ya Nasaae eyo, ohuloondakana neende enjekesa y'Amalako ka Musa, omuundu wa Nasaae oyo. Abaleefi bayaanayo amabaanga k'ebiyaanwa ebyo eyiri abalaamisi, abakanyulaanyusa hu alutaari.

¹⁷ Koti lu baandu baangi bali nibataalabisibwa, mani sibali nibafukiirirwa ohwiita amakoondi madoto ka Paasaka daawe, mani Abaleefi nibo ababaholera batyo, mani bayaana amakoondi madoto ako eyiri Omwaami.

¹⁸ Ohumeeda ohwo, abaangi hu baandu bali nibeechere ohutula mu nono cha Efuraimu, Manaase, Yisakari, neende Sebbuluuni, bali nibasisiiri ohuhola omuduunga kw'ohweelabya daawe, mani bali nibali ohuhusaanga Paasaka eyomu ngeri yitahoyera daawe. Omutuki Hesekia mani yabekongooyera eyiri Omwaami ati:

¹⁹ “Ewe Omwaami, Nasaae wa bakuuka yeefwe, mu bulai bwao kanya ohulehera abo abali ohuhwiinamiraanga neende emyooyo kyaabwe kyoosi, kata neende nibataali abeyosere daawe.”

²⁰ Omwaami yanyala ohukobola mu hulaama hwa Hesekia; yalehera abaandu abo mani yaahaya ohubaholaho esyonoono syoosi daawe.

²¹ Mani, ohumala embaka y'endaalo chitaanu-na-chibiri, abaandu bali nibebuusiire mu Yerusalemu balya Esidyaalo sy'Emigaati kitaali Emibbaahe neende esangaalo liingi muno, mani buli ludaalo, Abaleefi alala neende Abalaamisi bafumiaanga Omwaami neende amaani kaabwe koosi.

²² Hesekia yafumia Abaleefi muno hulw'amakesi kaabwe muhwiimirira ohulaama Omwaami ohwo. Luunyuma lw'endaalo chitaanu-na-chibiri chi bayaaniraangamo ebiyaanwa nibafumia Omwaami, Nasaae wa bakuuka yaabwe,

Ohuhusa hwa habiri

²³ boosi baheengao ohwemeeda ohuhusa ohwo ohumala endaalo chiindi chitaanu-na-chibiri. Mani baahusa nibasisiiri neende esangaalo eliingi muno.

²⁴ Omutuki Hesekia yoobba esurusi elifu ndala (1,000) neende amakoondi elifu chitaanu-na-chibiri abaandu beete balye, haandi abahoongo bosi boobba esurusi chiindi elifu ndala (1,000), haandi neende amakoondi elifu ehumi (10,000). Abalaamisi bahiramo obuungi bali nibamala ohubita mu muduunga kw'ohweelabya.

²⁵ Buli muundu yali neende esangaalo abaandu ba Yuda, Abalaamisi, Abaleefi, abaandu bali nibatulire emukulu, haandi neende abakeni bali nibamenyera elalira mu Yisiraeli neende mu Yuda.

²⁶ Esiko sya Yerusalemu syeechula esangaalo, olwohuba abulao esiindu siindi syaliho nisifwana koti esyeene sino esyali nisyeeholaho sityo daawe, ohutula mu ndaalo ch'Omutuki Solomooni, omwaana wa Daudi.

²⁷ Abalaamisi neende Abaleefi basaba ehabi ch'Omwaami chibe hu baandu abo. Mu daala lyae muukulu, Nasaae yawulira ohulaama hwaabwe yabafukiirira.