2 Ebyomubiha 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Hesekia omutuki wa Yuda

¹ Hesekia yeehaswa ohuba omutuki wa Yuda naali neende emyaaka amahumi kabiri neende kitaanu, mani yaanyala ohutukira mu Yerusalemu ohumala embaka y'emyaaka amahumi kabiri neende kitaanu-na-kine. Ng'ina yali Abbija, omuhaana wa Sakaria.

² N'aloondakana neende ehola y'Omutuki Daudi kukaang'ene, yaholaanga ebiindu byasangasaanga Omwaami.

Ohulabiswa hw'Enyuumba ya Nasaae

³ Mu mwoosi kutaangira okw'omwaaka kwaloonda hu Hesekia ohwiihaswa ohuba omutuki, yachia yeekulao haandi ebiruwa by'Enyuumba ya Nasaae mani yaabitereesa bulai.

⁴ Yalaanga omukaanda kw'abalaamisi neende Abaleefi mani bebuusira ebukwe w'olwaanyi lw'Enyuumba ya Nasaae

⁵ mani yaabalomalomera nibali eyo. Yababoolera ati, “Eng'we Abaleefi muhoyere ohweelabya mani mwaalabya Enyuumba y'Omwaami, Nasaae wa bakuuka yeeng'we. Tuse mu Nyuumba ya Nasaae eyo buli siindu si yibaha omukwoobo.

⁶ Bakuuka yeefwe balichiingi abataali abeesikwa eyiri Omwaami, Nasaae weefwe mani baholaanga ebyamunyoolesaanga. Bamujwaang'a mani boobba emikoongo kyaabwe eyiri abuundu yi yamenya.

⁷ Beekala emilyaango ky'Enyuumba ya Nasaae, baaleha amataara kaasima, haandi baakama ohunioohesaanga obubbaani, kata neende ohuyanaanga ebiyaanwa bisaambe mu Nyuumba ya Nasaae ya Nasaae wa Yisiraeli.

⁸ Mani ohweema hu sino, Omwaami yanyoolerera Yuda neende Yerusalemu, mani esiindu syabiholeremo byasiindusa haandi byatiisa buli muundu. Ewe omanyire sino bulai bweene.

⁹ Baseefwe beeterwaanga mu biita, haandi abahasi beefwe neende abaana beefwe bayirwaanga koti ababoye.

¹⁰ “Bulaanu ese malire ohuheengao ohuhola endagaano neende Omwaami, Nasaae wa Yisiraeli, haandi atanyalaho ohutunyoolerera haandi.

¹¹ Eng'we basyaani baange, mutadoondobaniaho ebiha byoosi daawe. Eng'we niing'we abaandu ba Omwaami yadoola ohumuniooheseraanga obubbaani, haandi neende ohwiimiriraanga abaandu mu humwiinamiraanga.”

¹² Mani Abaleefi basiingira, Mahati omwaana wa Amasai, neende Yoeli omwaana wa Asaria, ohutula hu nyuumba y'Abakohati; neende enyuumba y'Abameraari, Kisi omwaana wa Abbudi, neende Asaria omwaana wa Yehaleleeli; neende Abagerisoni; Yoa omwaana wa Siima, neende Edeni omwaana wa Yoa;

¹³ neende abaana ba Elisafani, Simuri neende Yeueli; neende abaana ba Asafu, Sakaria neende Matania;

¹⁴ neende abaana ba Hemani, Yehueli neende Simei; neende abaana ba Yedutuuni, Semaya neende Wusieli.

¹⁵ Abasaacha bano boosi bebuusa alala neende Abaleefi basyaabwe, mani beelabya. Bulaanu, koti sa lu mutuki yali naabalagiire ohuhola, bachaakiraniramo ohulabya neende Enyuumba ya Nasaae yosi, ohuloondakana neende Amalako k'Omwaami.

¹⁶ Abalaamisi beengira mu Nyuumba ya Nasaae eyo ohuyilabya, mani bachaaka ohusoomba nibatusa mu lwaanyi lw'Enyuumba ya Nasaae buli siindu syalichiingi nisiri esy'omufuto. Ohutula omwo, Abaleefi batusa byoosi erwaanyi w'esiko esyo, mani baabiyira mu Hoondo lya Kidironi.

¹⁷ Omulimo okwo kwachaaka hu ludaalo lutaangira lw'omwoosi kutaangira, mani ohwoola hu ludaalo lwa hataanu-na-hadatu bali nibamalire omulimo okwo kwoosi, n'oteereho neende mu siseenge siingira mu Nyuumba ya Nasaae bweene. Haandi bachaaka ohuhola emirimo kiindi ohumala endaalo chitaanu-na-chidatu chiindi, ohwoola hu ludaalo lw'ehumi neende hasaasaba lw'omwoosi okwo, nibateresaanga sa Enyuumba ya Nasaae eyo ey'ohwiinamiraangamo Nasaae.

¹⁸ Abaleefi bachia baaboolera Omutuki Hesekia bati: “Efwe humalire omuduunga kw'ohulabisibwa Enyuumba ya Nasaae yoosi, n'oteereho neende alutaari y'ebiyaanwa bisaambwa, neende emeesa y'emigaati myoolerefu, haandi neende ebiindu biholerwamo emirimo mu bweene omwo.

¹⁹ Humalire neende ohukobosamo ebiindu biholerwamo emirimo byoosi bi Mutuki Ahasi yali niyamalamo mu myaaka ki yali nataali neende efukiirira mu Nasaae, mani hwaamala hwabiwaayo eyiri Nasaae haandi. Byoosi biri mu moni w'Alutaari y'Omwaami.”

²⁰ Ataali ohuhiinda, Omutuki Hesekia yabuusa alala abasaacha bahunuufu bomu siko omwo, mani alala boosi baachia eyiri Enyuumba ya Nasaae.

²¹ Koti esiyaanwa simalao ebyonoono by'edaala ly'edooho ly'abaami haandi neende ebya abaandu baandi aba Yuda, haandi neende ohulabya Enyuumba ya Nasaae, bayira esurusi chitaanu-na-chibiri, amakoondi kataanu-na-kabiri, amakoondi madoto kataanu-na-kabiri, haandi neende embusi chitaanu-na-chibiri. Omutuki oyo yaboolera abalaamisi abo abali abeechuhulu b'Arooni, ohuyaanayo ebisolo koti ebiyaanwa hu alutaari.

²² Abalaamisi abo bataangira ohwiita esurusi echio, mani baloondyaho amakoondi, mani haandi baloosaho amakoondi madoto, mani nibanyulaanyusa amabaanga kabuli siyaanwa hu alutaari.

²³ Muhumaliirisa, babukula embusi echio mani baachiyirira omutuki, haandi neende abeenamiraanga Nasaae baandi, abachaalisaangaho amahono kaabwe.

²⁴ Ebyo nibiweere, abalaamisi abo beeta embusi echio mani baachuha amabaanga kachio hu alutaari ohuba koti esiyaanwa esimalao esyonoono sy'abaandu boosi, olwohuba omutuki oyo yali n'alagiire ati ebiyaanwa bisaambwa, neende ebiyaanwa by'esibi biholerwe Yisiraeli yoosi.

²⁵ Omutuki oyo yaloondakana neende amakerako ka Omwaami yali niyaberesa Omutuki Daudi ohubitira mu Gaadi, owali omunabbi w'omutuki oyo, haandi neende ohubitira mu Natani omunabbi; yatekeha Abaleefi mu Nyuumba ya Nasaae, nibali neende obuhana neende nyaangili,

²⁶ ebihubba ebifwaana koti ebyo bi Mutuki Daudi yehoonyeraanga. Abalaamisi bosi beema abweene ao, nibali neende eturumbete.

²⁷ Hesekia yalagira ebiyaanwa bisaambwa bileetwe; mani koti ohuyaanayo ebiyaanwa nihwachaaka, abaandu beemba enyembo chifumia Omwaami, mani abeembi bosi bachaaka ohuubba eturumbete alala neende ebihubba biindi.

²⁸ Buli muundu yeesi owali abweene ao yeengira mu hwiinamira Omwaami ohwo, mani ohweemba neende ohuubba ebidoong'ereyo byosi byemeeda ohweemba bityo ohwoola lu biyaanwa byoosi byamala ohuyia.

²⁹ Mani Omutuki Hesekia alala neende abaandu boosi nibasigama aasi, nibalaama Nasaae waabwe.

³⁰ Omutuki oyo alala neende abeemirisi bomu syaalo omwo, baboolera Abaleefi ohweembera Omwaami enyembo ch'ohufumia, echali nichaandiikwa neende Daudi mweene, haandi neende Asafu omunabbi. Mani buli muundu yembaanga neende esangaalo liingi nibasigaame nibenamiire Nasaae.

³¹ Hesekia yaboolera abaandu ati, “Bulaanu koti lu muli aboolerefu, leete ebiyaanwa nibiba koti ebiyaanwa by'ohweebasa Omwaami.” Abaandu abo bawulira, mani abaandu hu beene abo beeyama ohuleetaanga ebisolo biyaanweyo koti ebiyaanwa bisaambe.

³² Baleeta esurusi amahumi kataanu-na-kabiri, amakoondi emia ndala (100) neende amakoondi madoto emia chibiri (200), ohuba koti ebiyaanwa bisaambwa eyiri Omwaami;

³³ haandi baleeta esurusi emia chisaasaba (600) neende amakoondi elifu chidatu (3,000) ohuba ebiyaanwa by'abaandu ohulya sa.

³⁴ Koti lu yitaliyo abalaamisi bamala ohwiita ebisolo bino byoosi, Abaleefi bachia baabahoonyaho, ohwoola lu mulimo kuno kwoosi kwawa bulai. Ebiha ebyo abalaamisi baandi bosi bali nibamalire ohwelabya. (Abaleefi bali abeesikwa muno ohuhiraho abalaamisi mu ngeri y'ohweliinda ohubeechaanga abachweenufu)

³⁵ Ohumeeda hu huyaanayo ebiyaanwa bisaambwa byoosi, abalaamisi nibo abali nibahoyera ohusambaanga amasinya ka bayaanangayo ohutula hu biyaanwa bi baandu balichaanga sa, haandi nibahoyera ohuchuhaanga efiini yaleeterwaanga alala neende ebiyaanwa bisaambwa byoosi. Mani sakira ohwiinamira mu Nyuumba ya Nasaae nihuchaakira abweene ao haandi.

³⁶ Omutuki Hesekia alala neende abaandu boosi basaangaala, olwohuba Nasaae yali naanyalire ohubahoonya ohunyala ohuhola ebiindu bino byoosi byaawa bwaangu.