2 Ebyomubiha 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ahasi omutuki wa Yuda

¹ Ahasi yeehaswa ohuba omutuki naali neende emyaaka amahumi kabiri kyoong'ene, mani yaanyala ohutukira mu Yerusalemu ohumala embaka y'emyaaka ehumi neende kisaasaba. Haba siyanyala ohuloondakana neende ehola ndai y'Omutuki Daudi kukaang'ene; nae, yaholaanga ebitasaangaasa Omwaami

² mani yaloondakana neende ebiholwa by'abatuki ba Yisiraeli. Yahola ebifwaanani bya Bbaali by'ebichuma,

³ yanioohesaanga obubbaani mu Hoondo lya Hinoomu, haandi kata yayanaangayo abaana bae beene koti ebiyaanwa bisaambe eyiri ebiloongaloongwe, niyekeraania neende ebiholwa bimayaanu eby'abaandu ba Omwaami yali niyeerusa mu syaalo koti Abaisiraeli bayindulaanga nibeengira.

⁴ Mu bituundu bikafiiri eby'ohwiinamiraangamo, hu bigulu, haandi neende mu buli siiniha sy'omusaala kwoosi, Ahasi yayaaniraangamo ebiyaanwa, haandi yaniooheseraangamo obubbaani.

Ebiita hu Siria neende Yisiraeli

⁵ Mani sakira Omwaami Nasaae wae yamuyaanayo mu mahono k'omutuki Aramu, owanyala ohumuyiingira mani yapeeya omuhunu kw'abaandu bae mani yaabaleeta mu Damasiko. Haandi yayaanwayo mu mahono k'omutuki wa Yisiraeli, yesi owanyala ohumuyiingira nabeeteremo obuduhunyi bw'abaandu.

⁶ Peka omwaana wa Remalia yeeng'ene yeeta abasaacha elifu emia ndala neende amahumi kabiri (120) mu Yuda oludaalo lulala lwoong'ene, boosi nibali abalwaani balulu, ohweema koti lu bali nibajwaang'a Omwaami, Nasaae wa bakuuka yaabwe.

⁷ Omuisiraeli wuundi omunamaye olaangwa mbwe Sikiri yeeta Maseya omwaana w'Omutuki Ahasi, Asirikaamu omwimirisi w'edooho, neende Elikana, owali n'aloonderera mu bunyala hu mutuki mweene.

⁸ Kata neende Abayudea bali abeeho baabwe beene, eye ly'Abaisiraeli lyaamba abahasi elifu emia chibiri (200,000) neende abaana beene baabayira koti ababoye, mani baakobola nabo engo mu Samaria, alala neende ebiindu bipeeye ebisaabi.

Omunabbi Odedi

⁹ Omusaacha wuundi olaangwa mbwe Odedi, omunabbi w'Omwaami, yali niyamenya mu siko sya Samaria. Yacha mani yabukaanana neende eye ly'Abaisiraeli lyali nilikobola engo niliri neende Abayudaaya baboye abo niliri aambi ohwiingira mu siko omwo, mani yaboola ati, “Omwaami Nasaae wa bakuuka yeeng'we yanyoolerera Yuda mani yaaleha mwayiingirwa, nae bulaanu awuliire engira mbi yi mwabeeteramo.

¹⁰ Haandi muli ohuhola abasaacha neende abahasi ba Yerusalemu neende Yuda ohuba abawaambe beeng'we. Ewe haba soomanyireho oti ewe mweene wesi oli ohuholaanga ebyonoono mu moni w'Omwaami Nasaae wao daawe?

¹¹ Bulaanu ewe tekeeresa bi mboola! Abaandu baboye bano boosi, ni bamwaanamaao neende ba mboochoo beene sa. Ewe balehe beweereo, ataali ao, Omwaami achia ohuhusaandya omweene neende etima lyae.”

¹² Bane hu basaacha bahunuufu bomu Bwaami bw'Emukulu, Asaria omwaana wa Yehohanani, Bberekia omwaana wa Mesilemoti, Yehisikia omwaana wa Saluumu, neende Amasa omwaana wa Hadilai bosi bayiingania ehola yali ey'abanamaye eyo.

¹³ Baboola bati, “Eng'we, mutateemaho mwaleeta ababoye abo muno! Efwe humalire ohwonoona mu moni w'Omwaami, haandi humunyoleese ebiyera ohutuboneereserao. Bulaanu haandi muli ohuhola esiindu esichia ohutumeedaho omusaango.”

¹⁴ Mani, eye elyo lyadiira ababoye abo alala neende ebiindu bipeeye byoosi abaandu neende abeemirisi baabwe,

¹⁵ mani abasaacha bala bane badoolwa ohuberesaanga ababoye abo engubo ohutula mu biindu bipeeye. Bababeresa engubo neende ebiraato ohwefwalaanga, haandi baababeresa ebyohulya bibamala haandi neende ebyohung'wa bibamala, haandi baabatechaanga amafuta k'enaasi mu makoonjo kaabwe. Abo abalichiingi nibali abajoong'u muno nibatanyala ohukeenda babaniinianga hu suhiri, mani ababoye boosi baayirwa mu syaalo sya Yudea mu Yeriko, esiko sy'emisaala minaasi. Mani Abaisiraeli baanyala ohwekoboolera engo waabwe mu Samaria.

Ahasi asaba Asiria obuhoonyi

¹⁶ Esiha syeene esyo, Omutuki Ahasi yalakiirisa naasaba omutuki wa Asiria obuhoonyi.

¹⁷ Olwohuba Abaedomu bali haandi nibafumaliire mani nibayingiire Yuda, nibamalire haandi neende ohuwaao neende ababoye.

¹⁸ Haandi esiha syeene sino, Abafilisiti bosi bali nibali ohusetaanga ebiko byomu nandaalira w'ebigulu by'emuumbo, haandi neende mu Yuda sy'emwaalo. Baamba ebiko bya Bbeeti Semeesi, Aijalooni, neende Gederooti, haandi neende ebiko bya Sooko, Timuna, neende Gimuso, alala neende engoongo chaabwe chiene, mani nibamenya eyo endaalo choosi.

¹⁹ Koti lu Mutuki Ahasi wa Yuda yali n'anyaasire obulehuule bw'abaandu bae, haandi n'amalire ohudiimbira Omwaami, Omwaami yaheengao ohuleeta ebidinyu hu Yuda.

²⁰ Omuhoongo w'Asiiria, ohutusaho ohuhoonya Ahasi, yamuyiingania haandi yaamuleetera ebidinyu.

²¹ Mani Ahasi yabukula esaabbu ohutula mu Nyuumba ya Nasaae, neende mu dooho, haandi neende mu madaala k'abeemirisi b'abaandu, mani yaayiberesa omuhoongo oyo, nae kata bino byoosi haba si byahoonya daawe.

Ebyonoono bya Ahasi

²² Ebidinyu byae nibyabitiirira, omusaacha oyo Ahasi yonoona mu moni w'Omwaami muno ohuhiraana.

²³ Yayaana ebiyaanwa eyiri banasaae b'Abasiiria, abali nibabayiingira. Yaboola ati, “Banasaae ba Siria bahoonyaanga abatuki ba Siria, mani nikali mbwe mbayaanira ebiyaanwa, baabahoonyaho bosi.” Sino syamuleetera amasira haandi neende hu syaalo syae.

²⁴ Ohumeeda ohwo, yachia mani yaabukula ebyehoonyerwaanga mu Nyuumba ya Nasaae byoosi mani yaabisasaakula. Yeekalao Enyuumba ya Nasaae mani yoombaha alutaari mu buli situundu mu Yerusalemu.

²⁵ Mu buli siko sihunuufu, haandi mu buli siko sidiidi, esiri mu Yuda, yoombahaangamo ebituundu bikafiiri eby'ohwiinamiraangamo, yi bubbaani bwasaambirwaanga eyiri banasaae bakeni. Mu ngira yino omweene yeleetaho etima ly'Omwaami, Nasaae wa bakuukaang'ene.

²⁶ Ebiindu biindi ebyakwaao mu biha by'obwaami bwae, ohutulira elalira hu njaako, ohwoolera elalira hu njakamo byandiikwa mu sitabo sya Ebyaliwo by'abatuki ba Yuda neende Yisiraeli.

²⁷ Omutuki Ahasi yafwa mani yasiihwa mu Yerusalemu, nae ataali mu ng'ani ch'obwaami daawe. Hesekia omwaana wae niye owamukobola mu makulu koti omutuki.