2 Ebyomubiha 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omutuki Yotamu owa Yuda

¹ Yotamu yeehaswa ohuba omutuki naali neende emyaaka amahumi kabiri neende kitaanu (25), mani yaanyala ohutukira mu Yerusalemu ohumala embaka y'emyaaka ehumi neende kisaasaba (16). Ng'ina yali Yerusa, omuhaana wa Sadoki.

² Yaholaanga ebyasaangasaanga Omwaami, koti sa lu laatang'ene yaholaanga; nae ataali koti laatang'ene oyo, haba siyanyala ohwonoona nanioohesa obubbaani mu Nyuumba ya Nasaae. Nae abaandu baandi nabo bemeeda sa ohwonoonaanga.

³ Yali Yotamu owanyala ohwoombaha Esiruwa sy'Emukulu esy'Enyuumba ya Nasaae, haandi yaahola omulimo muhoongo muno hu sida sy'esiko esiri mu bweyaango bulimo Yerusalemu esilaangwa mbwe Ofeli.

⁴ Muungulu cha Yuda, yoombahamo ebiko, nae mu bichaha, yoombahamo amadaala k'ohweikamamo neende eminaara.

⁵ Yanyala ohulwaania Omutuki w'Amooni neende eye lyae mani yaabayiingira. Niyamala atyo, yachia mani yaayika Abaamooni ohumutuungaanga emikero kya buli mwaaka kino, ohumala esiha sy'emyaaka kidatu emilaamba: etaani chine ech'efeesa, etaani ndala (1,000) ey'engaano, haandi etaani ndala (1,000) ey'amabere masuungu.

⁶ Yotamu yemeeda ohunyoola amaani koti lu mweene yali niyeesika haandi naatya Omwaami Nasaae wae.

⁷ Ebihole biindi by'obwaami bwa Yotamu, koti ebiita, neende ehola chae, byoosi byandiikwa mu sitabo sya Ebyaliwo by'abatuki ba Yisiraeli neende Yuda.

⁸ Yotamu yali naali emyaaka amahumi kabiri neende kitaanu (25) eky'obuhuluundu niyeehaswa ohuba omutuki, mani yaanyala ohutukira mu Yerusalemu ohumala embaka y'emyaaka ehumi neende kisaasaba.

⁹ Yafwa mani yasiihwa mu Siko sya Daudi mani Ahasi omwaana wae yaamukobola mu makulu koti omutuki.