2 Ebyomubiha 26 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omutuki Wusia owa Yuda

¹ Abaandu ba Yuda boosi badoola Wusia owali emyaaka ehumi neende kisaasaba (16) eky'obuhuluundu, omwaana wa Amasia ohukobola mu makulu ka laatang'ene koti omutuki.

² (Byali luunyuma lw'ohufwa hwa Amasia lu Wusia yanyala ohuwaamba Eloti, mani yoombaha buyaaha esiko syeene esyo.)

³ Wusia yeehaswa ohuba omutuki naali neende emyaaka ehumi neende kisaasaba, mani yaanyala ohutukira mu Yerusalemu ohumala embaka y'emyaaka amahumi kataanu neende kibiri. Ng'ina yali Yekolia ohutula mu Yerusalemu bweene omwo.

⁴ Mani n'aloondakana neende esyohuboneraho sya laatang'ene, yesi yaholaanga ebisaangaasa Omwaami.

⁵ Koti lu Sakaria yali naali omulamu, alala neende abakeraki bae b'esinadiini, yahalaabaniraanga sa Omwaami neende obweesikwa, mani Nasaae yesi yaanyala ohumuberesaanga ehabi.

⁶ Wusia yachia yalwaania Abafilisiti. Yanyala ohulikula ebida by'ebiko bya Gaati, Yaminia, neende Asidoodi byaweera aasi, mani yoombaha ebiko bisitiriirwe aambi neende Asidoodi haandi neende mu Filisitia mwoosi.

⁷ Nasaae niye owamuhoonya yaanyala ohuyiingira Abafilisiti, Abaaraabbu bali bamenya mu Guribbaali, haandi neende Abameuni.

⁸ Abaamooni batungaanga omukabo kwaabwe eyiri Wusia, mani yeehola yaaba ow'amaani muno ohwoola eliita lyae lyamanyihana lyasalaana lyoola mu Misiri.

⁹ Wusia yomiisa ohusitirira Yerusalemu niyoombaha amakutu hu buli Siruwa syoohu Soonda, neende hu Siruwa sy'Ehooho, haandi neende buli abuundu yi sida syekoderaanga.

¹⁰ Haandi yoombaha eminaara kyasitiirirwa mu siparara mani yaayabaanga amadiba amaangi muno, olwohuba yali neende ebidwooli bihoongo muno eby'ebyaayo ebyali mu nandaalira ch'ebigulu by'emuumbo, haandi mu syaalo siyanjaafu. Ohweema koti lu wuno yali niyaheera muno obulimi, yesi yasaayianga abaandu boosi ohulima emichuungwa mu syaalo sy'ebigulu haandi neende ohutakaanga ebilime biindi mu loba ly'embolera.

¹¹ Yatekeha eye bibitiirifu elinyala ohulwaana ebiita. Ebyandiiko bilidiiraho byabiihibwa neende Yeieli neende Maseya abali abasaati bae nibali aasi w'obunyala bwa Hanania, owali mulala hu bahalaabani b'omutuki.

¹² Eye lino lyali nililagirwa neende abahoongo elifu chibiri neende emia chisaasaba (2,600).

¹³ Aasi w'abeene abo, waliwo abanamaye elifu emia chidatu neende chitaanu-na-chibiri neende emia chitaanu (307,500) abanyala ohulwaanira omutuki oyo bulai bweene, neende abasuku boosi.

¹⁴ Wusia yanyala ohuberesa eye elyo engabo, amafumo, ekofia ch'esibya, ebbeendera ch'obwaami, obuyiingo neende obusaale, alala neende amakina k'ohulasibwa neende emiruuta.

¹⁵ Mu Yerusalemu namwo omwali abayiiyi bae, bali nibaholaanga ebiindu binyala ohulasa obusaale, haandi ebinyala ohusukunaanga emikina mihoongo muno ohutulira hu minara haandi neende mu soonda ch'esida sy'esiko esyo. Obulai bwae bwasalaana bwoola buli abuundu, mani yeehola ow'amaani muno ohweema hu buhoonyi bu yanyolaanga ohutula eyiri Nasaae mweene.

Wusia asaandiriswa ohweema hu suunga Yae

¹⁶ Nae Omutuki Wusia niyomiira, yachaaka ohwemeeda ohudyaabuha, ohwamuyira yoola ohukwiira elalira. Yahayuhira Omwaami owali Nasaae wae mani naachia niyeengira mu Nyuumba ya Nasaae ohunioohesera obubbaani hu alutaari y'obubaani.

¹⁷ Bulaanu Asaria omulaami, naali alala neende abalaamisi baandi amahumi kataanu-na-kadatu (80) abajiing'u muno, baloonda hu mutuki oyo

¹⁸ ohuchia ohumuyiingania. Niboola baboola bati, “Ewe Wusia! Ewe haba sofukiirirwa ohunioohesa obubbaani eyiri Omwaami daawe. Abalaamisi boong'ene haandi ab'olwiibulo lutula hu Arooni nibo abalabiswa ohunyala ohuholaanga batyo. Ewe tula Abuundu Woolerefu ano. Ewe omalire ohunyoolesa Omwaami Nasaae hale, mani sosiiriho neende ehabi chae choosi daawe.”

¹⁹ Wusia nae yali niyeemere abweene ao mu Nyuumba ya Nasaae endulo w'alutaari y'obubbaani n'akiingire esinioohesaanga obubbaani mu mahono. Yanyoolerera abalaamisi abo mani abweene ao, obulwaae bw'esihoba bubi bwamutulikana mu bweeni.

²⁰ Asaria neende abalaamisi baandi abo, nibahang'aasa emoni chaabwe hu mutuki oyo mu bweeni bwae neende amatiichasi, bamubirikisa muno nibamutusa mu Nyuumba ya Nasaae. Yabbibbiirihana muno ohutula mu Nyuumba ya Nasaae omwo, olwohuba Omwaami hane yali n'amalire ohumutaaho esibonereso.

²¹ Mani mu bulamu bwae bwoosi obwali nibudoong'ereo, Omutuki Wusia yadoong'a sa naali ow'omufuto ohweema hu bulwaae bwae obwo. Koti lu yali n'atanyala kata ohwiingira mu Nyuumba ya Nasaae ehabi liindi, yeboyeraanga sa mu nyuumba wae, n'atusirweho obunyala bwoosi, Yotamu omwaana wae nae naatuka esyaalo esyo.

²² Omunabbi Yisaaya, omwaana wa Amosi yandiika ebiindu ebyo byoosi bi Mutuki Wusia yahola mu biha by'obwaami bwae.

²³ Wusia yafwa mani yaasiihwa mu lwaanyi lw'obwaami lw'ohusiihamo abaami, nae ohweema hu bulwaae bwae, haba si yasiihwa mu ng'ani ch'abaami daawe. Yotamu niye owamukobola mu makulu koti omutuki.