2 Ebyomubiha 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Yehosafati yafwa mani yaasiihwa mu ng'ani ch'abaami mu Siko sya Daudi, mani Yehoramu omwaana wae yaamukobola mu makulu koti omutuki.

Omutuki Yehoramu owa Yuda

² Yehoramu omwaana w'Omutuki Yehosafati owa Yuda yali neende bamwaanang'ina basaasaba bano: Asaria, Yehieli, Sakaria, Asarihu, Mikaeli neende Safatia.

³ Saabwe yababeresaanga esaabbu, efeesa, alala neende emyaandu kiindi mibitiirifu, mani yatechaanga buli mulala mu siko syasitirirwa esya Yuda. Nae olwohuba Yehoramu niye owali omuhuluundu, Yehosafati yamuhola yaaba niye omukobola mu makulu.

⁴ Yehoramu niyali nihamala ohwomiisa bulai obwaami, yeeta bamwanaang'ina boosi, haandi yeeteramo neende Abaisiraeli bahoongo baandi.

⁵ Yehoramu yeehaswa ohuba mutuki naali neende emyaaka amahumi kadatu neende kibiri eky'obuhuluundu, mani yaanyala ohutukira mu Yerusalemu ohumala embaka y'emyaaka kitaanu-na-kidatu.

⁶ Yaloonda esyohuboneraho esimayaanu ey'Omutuki Ahabbu haandi alala neende abatuki baangi, olwohuba yali niyadeehya mulala hu bahaana ba Ahabbu. Yonoona mu moni w'Omwaami,

⁷ nae Omwaami haba siyali naadaha ohusihirisa obwaami bwa Daudi daawe, olwohuba yali niyahola endagaano neende Daudi mani niyasuubisa ati abeechuhulu bae nibo abachia ohulumiriraanga ohwemeeda ohutukaanga.

⁸ Mu bwaami bwa Yehoramu, Edomu syekabula hu Yudah mani syeehola obwaami bweemala.

⁹ Mani Yehoramu neende abahoongo batula olukeendo neende ebigaari byaabwe mani baseeta Edomu. Ebweene eyo, eye ly'Abaedoomu lyabeebodohania, nae mu sirosiro banyala ohweeyiba mani baahalaka omuteego okwo mani beeruha.

¹⁰ Edomu syadoong'a ni syeemala esyeene, nisyahaliha hu Yuda ohutula hw'olwo. Mu siha syeene sino, Esiko sya Libbina syosi syehalaka, olwohuba Yehoramu yali niyajwaang'a Omwaami, Nasaae wa bakuukaang'ene.

¹¹ Kata haandi yoombahaanga abuundu wohwiinamiraangamo w'abakafiiri, mu sigulu sya Yuda ohwonooneraangayo Omwaami.

¹² Omunabbi Elija yatumira Yehoramu ebbarwa, eyali niyisoma yiti: “Omwaami, Nasaae wa kuukao Daudi, ahwoolobya, olwohuba ewe wahaya ohuloonda esyohuboneraho sya lataao, Omutuki Yehosafati, kata sa esya kuukao Omutuki Asa.

¹³ Mubweyaango bw'ebyo, ewe waloondakana neende esyohuboneraho sy'abatuki ba Yisiraeli mani waayira abaandu ba Yuda neende Yerusalemu mu hutaba abeesikwa eyiri Nasaae, koti sa Ahabbu neende abamulondaangaho bayiraanga Yisiraeli mu butaali obweesikwa. Ewe haandi weeta bamwaanamaao, abali abaandu balai ohuhuhira.

¹⁴ Esichia ohutulamo Omwaami achia ohusaandya abaandu bao muno, abaana bao, haandi neende abahasi bao, haandi achia ohusihirisa emyaandu kyao kyosi.

¹⁵ Ewe mweene ochia ohulwaala oluumbe luchuuni muno olwoomu mala, olucha ohwemedaanga ohubiiya buli buhya.”

¹⁶ Abafilisiti baandi neende Abaaraabbu baandi bali nibamenya aambi neende abuundu yi Abaitiopia bali nibamenya hu lwaasi lw'enyaanja. Omwaami yabachuuba baachia ohulwaana ebiita neende Yehoramu.

¹⁷ Bafumaalira Yuda, bapeeya edooho ly'obwaami, mani bayira abahasi neende abaana basyaani b'abatuki boosi koti abawaambe ohutusaho Ahasia, omwaana wae muyere mweene.

¹⁸ Mani luunyuma lwa bino byoosi, Omwaami yaleeta hu mutuki oyo oluumbe lululu lweene, olwo'humumala.

¹⁹ Ohumala embaka y'emyaaka aambi kibiri, lwemeeda ohubiyaanga sa, ohwoola lu mutuki oyo yafwa naali mubuchuuni bweene. Abasuumba bae haba sibabwaana amakeenga hu masika kae koti lu yali niyaholeraanga bakuukaang'ene.

²⁰ Yehoramu yali niyamala ohwiihaswa ohuba omutuki naali neende emyaaka amahumi kadatu neende kibiri mani niyanyala ohutukira mu Yerusalemu ohumala emyaaka kitaanu-na-kidatu kyoong'ene. Abulao omuundu yeesi owadiirwa esibeera niyafwa. Bamusiiha mu Siko sya Daudi, nae ataali mu ng'ani ch'abaami daawe.