2 Ebyomubiha 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiita hu Edomu

¹ Luunyuma hooho, amaye ka Moabbu neende Abaamooni, alala neende abahoonyi basyaabwe, koti Abameuni, baseeta Yuda.

² Bawamwaanda baandi balaangirira eyiri Omutuki Yehosafati bati: “Eye bitiirifu ohutula mu Edomu mbao liichire ohutulira mu mbeka chiindi ech'Enyaanja y'Omuunyu ohuhuseeta. Bamalire neende ohuwaamba Hasasoni Tamari.” (Lino nilyo eliita liindi elya Engedi.)

³ Yehosafati yatya muno mani yaasaba Omwaami amukerake. Mani yaatusa omunwa ohusiiba hubeeo mu syaalo omwo mwoosi.

⁴ Ohutula mu buli siko sya Yuda, abaandu babbibbiirihana ohuchia mu Yerusalemu ohweteeba hu Omwaami abakerake,

⁵ mani abo alala neende abaandu ba Yerusalemu beecha bebuusira alala mu lwaanyi luyaaha lw'Enyuumba ya Nasaae. Omutuki Yehosafati yesi yachia mani yeema mu moni waabwe

⁶ mani yalaama neende ekono ly'aakulu ati, “Ewe Omwaami Nasaae wa bakuuka yeefwe, ewe niiwe otukiraanga muukulu ebyaalo byoosi ebiri mu syaalo muno. Ewe oli ow'amaani haandi ow'obunyala, mani abulao oyo yeesi onyala ohuhuyiingania.

⁷ Ewe niiwe Nasaae weefwe. Yisiraeli abaandu bao beengira mu syaalo muno, ewe niiwe owerusaanga abaandu bali nibamenyaanga muno, mani noomala n'oberesa abeechuhulu ba Abburahamu esyaalo sino, abali abeecha bao, oti sibecheenge esyaabwe endaalo choosi pe.

⁸ Bamenya muno mani boombaha Enyuumba ya Nasaae ohuhuberesaanga oluyaali, nibamanyire bati,

⁹ ‘Nikali mbwe amasira koosi kabakwaaho ohubasaandya koti: ebiita, oluumbe, neende enjala, baba bachia ohwiichaanga mani beema mu moni w'Enyuumba ya Nasaae yino, abuundu yi winamirwaangamo. Bahuliriraanga nibali mu bidinyu byaabwe, mani ewe obawuliraanga mani obanunula.’

¹⁰ “Bulaanu, abaandu ba Abaamooni, Moabbu, neende Edomu mbano batuseetere. Bakuuka yeefwe nibatula mu Misiri, haba si wabakanya ohwiingira mu byaalo ebyo, mani bakuuka yeefwe baachia mani baabyebodoohania baahaya ohubisihirisa daawe.

¹¹ Bulaanu yino niyo engeri yibali ohututuunga nibeechere ohututusa mu syaalo sino si ewe omweene watuberesa.

¹² Ewe niiwe Nasaae weefwe! Basaandie ewe omweene, olwohuba efwe huwuma obuchiiro mu moni w'eye bitiirifu lino eliri ohutuseeta. Efwe haba sihumanyire esiindu sy'ohuhola daawe, nae efwe hutingaalire sa yooli otuhoonye.”

¹³ Abasaacha ba Yuda boosi, alala neende abahasi baabwe neende abaana baabwe, boosi bali nibeemere aambi neende Enyuumba ya Nasaae.

¹⁴ Mwooyo w'Omwaami yeeha hu Muleefi wuundi owali naali abweene ao mu sidiiyiha sy'abaandu abo. Eliita lyae lyali mbwe Yahasieli omwaana wa Sakaria; yali mulala hu baandu b'enono ya Asafu, haandi yali omwiichuhulu wa Asafu ohubitira mu Matania, Yeieli, neende Bbenaya.

¹⁵ Yahasieli yaboola ati, “Ewe ow'Oluyaali, alala neende eng'we mweesi abaandu ba Yuda neende Yerusalemu, Omwaami aboola ati, eng'we mutawaamo omwooyo daawe, kata sa mwaatya daawe ohuchooma eye bitiirifu lino. Ebiita bya Nasaae nibyo, nae haba si byao daawe.

¹⁶ Ewe baseete sa muchuli niboola sa bati mu Paasi mu Siisi. Ochia ohubanyoola emutwe w'ehooho lichiira mu syaalo sy'esiparara esiri aambi wa Yerueli.

¹⁷ Haba soochia hunyaahana ohulwaana ebiita bino daawe. Chia sa mani w'etekehe bulai mu bituundu by'ohulwaaniramo mani oliindirire sa; mani ochia ohubona koti lu Omwaami achia ohuhuberesa obuyiingiri. Abaandu ba Yuda neende abaandu ba Yerusalemu, otesiinduha, haandi otatya daawe. Tula ochie mu biita, Omwaami achia ohuba naawe!”

¹⁸ Bulaanu, Omutuki Yehosafati yaguunama aasi bweene, obweeni bwae bwegeeng'a hu buloba, mani abaandu boosi bosi baguunama nae mani beenamira Omwaami.

¹⁹ Balala hu nono chia Abaleefi echia Kohati neende Koora chasiingira cheema mani chehuumira aakulu nichifumia Omwaami, Nasaae wa Yisiraeli.

²⁰ Echulichuli nibwahya oludaalo luloondaho, abaandu baniina baachia mu syaalo sy'esiparara esiri aambi neende Tekoa. Mani koti lu bali hu bachaaka olukeendo, Yehosafati yabalomalomera emboosi chino chiti: “Eng'we abaandu ba Yuda neende Yerusalemu! Mweesikeenge Omwaami Nasaae weeng'we, muba muchia ohuba abomiifu. Fukiirireenge ebiindu bi banabbi bae bababoolera, muba muchia ohubitaangamo.”

²¹ Luunyuma lw'ohweteeba hu baandu baandi, omutuki oyo yalagira abeembi baandi ohwefwaala amaganjuula ka befwaalaanga hu miholo myoolerefu, mani nibamala nibahuumbira mu moni w'eye, nibeemba bati, “Omwaami afumisibwe! Obuheeri bwae bw'endaalo choosi pe!”

²² Mani nibachaaka ohweemba, Omwaami yafumaalira amaye ako mani kaachaaka ohuteenga.

²³ Abaamooni neende Abamoabbu baseeta eye ly'Abaedoomu mani baalisihirisira elalira, mani nibakaluuhananira abeene-na-beene nibalwaana ebilulu.

²⁴ Mani eye lya Yuda nilyoola hu munara okwali mu siparara, batingaalaho eyiri omusuku mani baabona bati boosi bali nibalambaalire hu buloba nibafwiire hale. Abulao kata mulala owali naanyalire ohuwonamo.

²⁵ Yehosafati alala neende amaye kae ba beengiramo ohuyaaya sa omwaandu, mani banyoola eng'oombe embitiirifu, eby'ohwehoonyera, engubo, alala neende ebiindu biindi eby'obukusi bw'aakulu. Bamala endaalo chidatu enaamba nimbasaanga omwaandu okwo, nae byali ebibitiirifu byabahaya ohumalayo byoosi.

²⁶ Hu ludaalo lwohune, bebuusira mu Hoondo lya Bberaka mani baafumia Omwaami hulw'esiindu si yali n'abaholeere. Sakira ehooho elyo li silaangwa mbwe “Bberaka.”

²⁷ Yehosafati yeemirira amaye kae yaakakobosa engo mu Yerusalemu mu buyiingiri, olwohuba Omwaami yali n'amalire ohubayiingirira hale abasuku baabwe.

²⁸ Niboola mu siko esyo, bahuumba nibachoomere eyiri Enyuumba ya Nasaae nibachiira ohuhubba amaduungu neende eturumbete.

²⁹ Buli syaalo syoosi esyawuliraangaho koti lu Omwaami yayiingiriramo abasuku ba Yisiraeli, byatya muno,

³⁰ Mani Yehosafati yaatukira mu muleembe, mani Nasaae yaamuberesa obuliindi hu buli lubeka.

Enjakamo y'obwaami bwa Yehosafati

³¹ Yehosafati yali niyeehaswa ohuba omutuki wa Yuda naali neende emyaaka amahumi kadatu neende kitaanu haandi yali n'atukiire mu Yerusalemu hulw'embaka y'emyaaka amahumi kabiri neende chitaanu. Ng'ina yali Asubba, omuhaana wa Silihi.

³² Nafwaana sa koti Asa laatang'ene wamutaangira hu bwaami, yesi yaholaanga sa ebihoyera mu moni w'Omwaami;

³³ nae ebituundu by'ohwiinamiraangamo eby'abakafiiri, haba sibyasihiriswa daawe. Abaandu haandi sa haba sibakaluuhaniraanga hu hwiinamiraanga Nasaae wa bakuuka yaabwe neende omwooyo mulala daawe.

³⁴ Buli siindu siindi si Yehosafati yahola, ohuchaakira elalira hu njaako y'obwaami bwae ohwooleral elalira hu njakamo, byandiikwa mu sitabo sya Ebyaliwao bya Yehu omwaana wa Hanani, esiri silala hu bituundu by'esitabo sya Ebyaliwo by'abatuki ba Yisiraeli.

³⁵ Esiha siindi Omutuki Yehosafati owa Yuda yahola obusaangirani neende Omutuki Ahasia wa Yisiraeli, owahola ebiindu bimayaanu ebiingi.

³⁶ Hu sikobero sya Esionigebberi, nihwo hu boombahiraanga emeeri chisyaabala hu nyaanja hoongo.

³⁷ Nae Elieseeri omwaana wa Dodafaahu, ohutula mu siko sya Maresa, yalabula Yehosafati ati, “Koti lu wingiire obusaangirani neende Ahasia, Omwaami achia ohusihirisa buli siindu si woombaha.” Mani emeeri cheebiswa mani chaahaya ohusyaabalaho haandi.