2 Ebyomubiha 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yehosafati yeehaswa ohuba omutuki

¹ Yehosafati niye owakobola mu makulu ka Asa laatang'ene ohuba omutuki mani yomiisa obweyaango bwae obwo natachiana neende Yisiraeli.

² Yatekeha amaye kae mu biko byasitirirwa ebya Yuda, mu ngoongo ch'esyaalo sya Yudea, haandi neende mu biko bi Asa yali niyaamba mu syaalo sya Efuraimu.

³ Omwaami yaberesa Yehosafati ehabi koti lu yalondakana neende ebiholwa byali ebya laatang'ene n'asisiiri omuraaga mani yaahaya ohwiinamiraangaho Bbaali.

⁴ Yahalaabaniraanga Nasaae wali owa laatang'ene, yesaanga oluyaali mu malako ka Nasaae, mani yaahaya ohweehola koti lu batuki baandi ba Yisiraeli baholaanga.

⁵ Omwaami yaberesa Yehosafati obunyala bw'ohwomiisa obwaami bwa Yuda, mani abaandu boosi bachaaka ohumuleeteraanga ebiyaanwa, mani yeehola omuyiinda haandi oweswamo oluyaali luhoongo.

⁶ Yedahiraanga mu huhalaabaniraanga Omwaami mani yaasihirisaanga ebituundu by'obukafwiiri by'ohwiinamiraangamo byoosi kata neende ebilolero bya Asera nasaae muhasi mu Yuda mwoosi.

⁷ Mu mwaaka kwa hadatu kw'obutuki bwae yatusa erwaanyi abahoongo bano ohuchia ohweekesaanga mu biko bya Yuda: Bbenihaili, Obbadia, Sakaria, Netaneeli, neende Mikaaya.

⁸ Bali alala neende Abaleefi bataanu-na-bane haandi neende abalaamisi babiri. Abaleefi bano bali Semaya, Netania, Sebbadia, Asaheeli, Seiramooti, Yehonataani, Adonija, Tobbia, neende Tobbadonia; nae abalaamisi bali Elisaama neende Yehoramu.

⁹ Bachia neende esitabo sy'Amalako k'Omwaami mani nibamala nibachia nibahalakania ebiko byoosi ebya Yuda, nibakeekesa abaandu.

Obuhunuufu bwa Yehosafati

¹⁰ Omwaami yahola obwaami bwoosi obwali nibwabebodoohania bwaatya ohulwaania Omutuki Yehosafati ebiita.

¹¹ Abafilisiti baandi baleetera Yehosafati efeesa mu buungi, haandi neende ebiyaanwa biindi, nae Abaaraabbu baandi nabo bamuleetera amakoondi elifu chitaanu-na-chibiri neende emia chitaanu-na-chibiri (7,700) haandi neende embusi chosi elifu chitaanu-na-chibiri neende emia chitaanu-na-chibiri (7,700)

¹² Mani Yehosafati yemeeda ohuhula-hulana ohuba neende amaani. Mu Yuda yoosi, yoombahangamo ebisitirira haandi neende ebiko,

¹³ bi biindu byehoonyerwa byabiihwaangwa mu buungi. Mu Yerusalemu namwo yatekehamo abahoongo bahiramo,

¹⁴ nibaloondakana neende enono chaabwe. Adina niye owali omuhoongo w'amaye katula mu nono cha Yuda, mani yali neende abanamaye elifu emia chidatu (300,000) aasi wae.

¹⁵ Oloondaho mu buhoongo yali Yehohanani, naali neende abanamaye elifu emia chibiri neende amahumi kataanu-na-kadatu (280,000),

¹⁶ nae owohudatu yali Amasia omwaana wa Sikiri, naali neende abanamaye elifu emia chibiri (200,000). (Amasia yali niyeetusa sa ohuhalaabaniraho Omwaami.)

¹⁷ Omuhoongo w'amaye katula mu nono chia Bbenjamini yali Eliada omunamaye muhunuufu, naalagira abanamaye elifu emia chibiri (200,000) nibali neende engabo neende obuyiingo.

¹⁸ Owali naamuloondaho mu buhoongo yali Yehosabbadi naali neende abanamaye elifu emia ndala neende amahumi kataanu-na-kadatu (180,000), abefwaliire elalira ohulwaana ebiita.

¹⁹ Abanamaye bano boosi bahalaabaniraanga omutuki mu Yerusalemu, haandi ohumeedaho yatekeha abaandi mu biko biindi bya Yuda ebyasitirirwa.