2 Ebyomubiha 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiita akatikaati wa Abbija neende Yerobboamu

¹ Mu mwaaka kw'ehumi neende chitaanu-na-chidatu okw'obutuki bw'Omutuki Yerobboamu wa Yisiraeli, Abbija yeehaswa ohuba omutuki wa Yuda,

² mani yaanyala ohutukira mu Yerusalemu embaka y'emyaaka kidatu. Ng'ina yali Mikaaya, owali omuhaana wa Urieli ohutula mu siko sya Gibbeya. Ebiita byakwaao akatikaati wa Abbija neende Yerobboamu.

³ Abbija yanyala ohwoombaha eye ly'abanamaye elifu emia chine (400,000), nae Yerobboamu yamuyiinganiaanga neende eye ly'abanamaye elifu emia chitaanu-na-chidatu (800,000).

⁴ Amaye kano kabukaananiraanga mu syaalo sy'ebigulu sya Efuraimu. Omutuki Abbija yachia mani yaniina hu Lugulu lwa Semaraimu, mani yehuuma Yerobboamu neende Abaisiraeli ati: “Eng'we mu tekereeseho!

⁵ Eng'we haba simumanyire muti Omwaami, Nasaae wa Yisiraeli, yahola endagaano yitahaliha neende Daudi, naamuberesa haandi naaberesa abeechuhulu bae obutuki hu Yisiraeli endaalo choosi?

⁶ Yerobboamu omwaana wa Nebbati yeehalaka hu Solomooni, omutuki wae.

⁷ Luunyuma yabuusa alala omukaanda kw'abonooni, mani bayiikirisa bi badaha hu Rehobboamu omwaana wa Solomooni, owali naali omuyere muno haandi otaali neende obumanyirifu obw'ohubayiingania.

⁸ Bulaanu ewe heengao ohulwaania ohuyiingania obunyala bw'obwaami bu Omwaami yaberesa abeechuhulu ba Daudi. Ewe mbano oli neende eye bitiirifu, haandi oli neende esurusi njere ch'esaabbu chi Yerobboamu yeetanya ohubeechaanga banasaae bao.

⁹ Ewe wanyalaho ohwiirusa abalaamisi b'Omwaami, abeechuhulu ba Arooni, haandi wanyalaho ohwiirusa Abaleefi. Mubweyaango bwaabwe, ewe weteerao abalaamisi bao nasilala nga lu baandu b'ebyaalo biindi baholaanga. Buli muundu ochia ohwiichaange neende esurusi, kata sa amakoondi kataanu-na-kabiri niyaawulwa ohuba omulaamisi w'abo abelaanga mbwe banasaae bao abo.

¹⁰ “Nae efwe husiihalaabanira Omwaami Nasaae weefwe, haandi husisiiri ohumujwaang'a kata nabudiidi. Abalaamisi batulana hu Arooni nibo abaholaanga emirimo kyaabwe, nae Abaleefi nibabahoonya.

¹¹ Buli echuli, haandi neende buli engoloobe, bamuyaaniraanga obubbaani neende ebisolo biyaanwayo nibisaambwa bulaambiriire. Bairayo ebiyaanwa by'emigaati hu meesa yalabiswa, haandi buli ngoloobe nibo abaambianga amataara akali hu biteeni by'amataara by'esaabbu. Efwe huholaanga ebyo bi Omwaami yalagira, nae eng'we mwamala ohumujwaang'a hale.

¹² Nasaae mweene niye omwiimirisi weefwe, haandi abalaamisi bae mbano bali ano neende eturumbete, nibeetekeehe ohuchuubba nibatulaanga ohwiicha ohulwaana ebiita naawe. Abaandu ba Yisiraeli, sibalwanianga Omwaami daawe, Nasaae wa bakuukaao! Ewe haba soochia ohunyala ohuyiingira daawe!”

¹³ Abweene ao, Yerobboamu yali naatumire abaandi hu maye kae ohuchia ohubbabuluhira hu maye ka Yudea nibatulira emukoongo, abaandi badoong'ereo nabo nibabewuunjire ohutulira mu moni.

¹⁴ Abayudea batingaala bebodoohania emoni chaabwe, banyala ohubona bati hane bali nibamalire ohubodoohanwa. Balirira Omwaami abahoonye, mani abalaamisi bachaaka ohuubba eturumbete echio.

¹⁵ Abayudea nabo beehuuma olwaang'a lw'aakulu muno, mani nibeemiriirwe neende Abbija, bachia mani baachaaka ohuseeta; Nasaae yanyala ohuyiingira Yerobboamu alala neende eye lyoosi elya Yisiraeli.

¹⁶ Abaisiraeli beeruha Abayudea, mani Nasaae yaakera Abayudea baabayiingira.

¹⁷ Abbija neende eye lyae bahola Abaisiraeli ohuyiingirwa hw'esoni, Abaisiraeli esituundu sy'emilioni (500,000) esilaamba esy'abanamaye bahiramo obulai beetwa esiha silala esyo syoong'ene.

¹⁸ Mani katyo, abaandu ba Yuda bayiingira Yisiraeli, olwohuba abo beesika Omwaami, Nasaae wa bakuuka yaabwe.

¹⁹ Abbija yeeruhania eye lya Yerobboamu mani yaanyala ohuchia ohwiingira mu biko byae biindi bino: Bbeteli, Yesaana, neende Efirooni, haandi neende engoongo chalichiingi aambi neende buli situla.

²⁰ Yerobboamu haba siyanyala ohwekoboseraho obunyala bwae ehabi liindi daawe mu ndaalo ch'obwaami bwa Abbija. Ohumaliirisa, Omwaami yamwaduluhiraho, mani yaakwa yafwiira abweene ao.

²¹ Abbija kata katyo, yemeeda sa ohuba ow'amaani neende obunyala. Yali neende abahasi ehumi neende bane, mani yeebula abaana basyaani amahumi kabiri neende babiri neende abaana bahaana ehumi neende basaasaba

²² Ebyaliwo biindi ebya Abbija, neende ebyo bi mweene yalomalomaanga, haandi neende bi yaholaanga, byandiikwa mu sitabo silaangwa mbwe Ebyaliwo bya Yido omunabbi.