2 Ebyomubiha 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Misiri siseeta Yuda

¹ Esiha syeene si Rehobboamu yomiisiramo obunyala bwae koti omutuki, omweene oyo alala neende abaandu baandi boosi balehana neende Amalako k'Omwaami.

² Mu mwaaka kwa hataanu okw'obutuki bwa Rehobboamu, obutawulira bwaabwe bw'Omwaami bwatuungwa neende esibonereso. Omutuki Sisaki owa Misiri yaseeta Yerusalemu

³ neende eye ly'ebigaari elifu ndala neende emia chibiri (1,200), abalwaanira hu faraasi elifu amahumi kasaasaba (60,000), neende abanamaye abaangi batabaliha, n'oteereho neende Abalibbya, Abasuuki, neende Abaitiopia.

⁴ Yanyala ohuwaamba ebiko byali nibyasitirirwa ebya Yuda mani yaamala yemeeda mu moni ohwoola hu Yerusalemu.

⁵ Semaya omunabbi yachia eyiri Omutuki Rehobboamu neende omwiimirisi Omuyudea, abali nibebuusiire mu Yerusalemu niberuuhe Sisaki. Yababoolera ati, “Yino niyo emboosi yeeng'we eyitulire eyiri Omwaami: Eng'we mwanjwaang'a, mani sakira bulaanu syesi mbajwaang'ire mu mahono ka Sisaaki.”

⁶ Omutuki oyo alala neende abeemirisi abo bafukiirira bati hane bali nibonoona, baaboola bati, “Mani esiindu sino si Omwaami ali ohuhola sihoyera.”

⁷ Mani Omwaami niyabona atyo, yalomaloma haandi eyiri Semaya n'aboola ati, “Koti lu beene beeyamire ebyonoono byaabwe ebyo, ese siinja ohubasihirisa daawe. Mani Sisaki nanaba naachia ohubaseeta, bachia ohuwonera alafu. Yerusalemu sisicha huwuliraho obululu bw'amaani kaange koosi daawe,

⁸ mani Sisaki achia ohubayiingira, mani hu beeke engabuhano yiriwo akatikaati w'ohuhalaabanira neende ohuhalaabanira abeemeresi bohu syaalo.”

⁹ Omutuki Sisaki yoola mu Yerusalemu mani yaayaaya emyaandu ohutula mu Nyuumba ya Nasaae, haandi neende ohutula mu dooho bweene. Yayira buli siindu syoosi, haandi n'oteereho neende engabo ch'esaabbu chi Mutuki Solomooni yali niyetaanya.

¹⁰ Ohuchikobosao echeene echio, Rehobboamu nae yahola engabo ch'emigasa, mani yaamala yaachisigira abahoongo bali neende obunyala bw'ohuliindaanga ebiruwa by'edooho.

¹¹ Mani buli siha si mutuki yachichaanga mu Nyuumba ya Nasaae, abaliindi bakiingaanga engabo echio, haandi nibamalaanga bachikobosaangayo mu biseenge bi chaliindirwamo.

¹² Koti lu yeyaanayo eyiri Omwaami, etima ly'Omwaami lyosi silyanyala ohumusihirisira elalira daawe, nae ebiindi byachaaka sa ohwemeeda ohuchia bulai mu Yuda.

Ak'obwaami bwa Rehobboamu mu bwiimbikiti

¹³ Rehobboamu wuno yatukiraanga mu Yerusalemu mani yaanyala ohwiingiya amaani kae koti omutuki. Yali naali emyaaka amahumi kane neende mulala eky'obuhuluundu niyeehaswa ohuba omutuki, mani yaanyala ohutukira mu Yerusalemu ohumala embaka y'emyaaka ehumi neende kitaanu-na-kibiri, esiko si Omwaami yali niyedoolera ohutula mu byaalo biindi byoosi ebya Yisiraeli ohubeechaanga abuundu yi yali nahoyeere ohwiinamirwangamo. Ng'ina Rehobboamu yali niye Naama, ohutula mu syaalo sy'Amooni.

¹⁴ Yahola esyonoono, koti lu yahaya ohuteemaho ohumanya ebiindu bi Omwaami adaha.

¹⁵ Ebiholwa bya Rehobboamu ohuchaakira elalira mu njaako, ohwoola hu njakamo, haandi neende eby'enyuma bidiira hu daala lyae, byoosi binyoolwa mu sitabo silaangwa mbwe Ebyaliwo bya Semaya Omunabbi Rehobboamu neende Ebyaliwo bya Yido omunabbi. Yerobboamu bali nibalumiirira ohulwanakanaanga ebiita abeene neende abeene.

¹⁶ Rehobboamu yafwa mani yasiihwa mu ng'ani ch'abaami echiri mu Siko sya Daudi mani Abbija omwaana wae yaamukobola mu makulu ohuba omutuki.